BMC Election 2026 : शरद पवारांच्या राष्ट्रवादीची ठाकरे गट–काँग्रेससोबत युतीची चाचपणी, संभाव्य उमेदवारांची नावे समोर
सार
BMC Election 2026 : मुंबई महापालिका निवडणूक 2026 साठी शरद पवारांच्या राष्ट्रवादीकडून ठाकरे गट आणि काँग्रेससोबत युतीची चाचपणी सुरू आहे. संभाव्य उमेदवारांची नावे समोर आली आहेत.
BMC Election 2026 : मुंबई महापालिका निवडणुकीसाठी (BMC Election 2026) राजकीय हालचालींना वेग आला आहे. शिवसेना (उद्धव बाळासाहेब ठाकरे) आणि मनसे युती जाहीर झाल्यानंतर आता शरद पवारांच्या राष्ट्रवादी काँग्रेस पक्षाकडून ठाकरे गट आणि काँग्रेससोबत जाण्याबाबत चाचपणी सुरू असल्याची माहिती समोर आली आहे. याच पार्श्वभूमीवर राष्ट्रवादीच्या संभाव्य उमेदवारांची यादीही पुढे आली असून, अंतिम आघाडी कोणासोबत होणार याकडे राजकीय वर्तुळाचे लक्ष लागले आहे असे एबीपी माझाच्या एका वृत्तात म्हटले आहे.
ठाकरे गट आणि काँग्रेससोबत आघाडीचा पर्याय खुला
मुंबई महापालिकेसाठी शरद पवारांच्या राष्ट्रवादीकडून दोन्ही पर्याय खुले ठेवण्यात आले आहेत. एकीकडे ठाकरे गटासोबत आघाडी, तर दुसरीकडे काँग्रेससोबत युती करण्याबाबत अंतर्गत चर्चा सुरू आहे. सूत्रांच्या माहितीनुसार, राष्ट्रवादीने शिवसेना (उबाठा)कडे 31 जागांचा तर काँग्रेसकडे 29 जागांचा प्रस्ताव दिला आहे. आज होणाऱ्या चर्चेनंतर याबाबतचा अंतिम निर्णय स्पष्ट होण्याची शक्यता आहे.
राष्ट्रवादीचे संभाव्य उमेदवार कोण?
मुंबई महापालिकेसाठी शरद पवारांच्या राष्ट्रवादी काँग्रेसचे सहा संभाव्य उमेदवार समोर आले आहेत. यात मुंबई अध्यक्षा राखी जाधव (प्रभाग 131), माजी नगराध्यक्षा मनीषा रहाटे (प्रभाग 119), जिल्हाध्यक्ष अजित रावराणे (प्रभाग 43), जाहिदा सिराज अहमद (प्रभाग 124), माजी नगरसेवक धनंजय पिसाळ (प्रभाग 111) आणि रुई खानोलकर (प्रभाग 170) यांचा समावेश आहे. या उमेदवारांच्या नावांमुळे पक्षाची तयारी स्पष्ट होत आहे.
जयंत पाटील–उद्धव ठाकरे भेटीकडे लक्ष
आघाडीबाबतच्या चर्चेची आज अंतिम फेरी पार पडणार आहे. दुपारी 1 वाजता राष्ट्रवादीचे नेते जयंत पाटील उद्धव ठाकरे यांची मातोश्रीवर भेट घेणार असून जागावाटप आणि युतीवर अंतिम चर्चा होणार आहे. दुसरीकडे प्रदेशाध्यक्ष शशिकांत शिंदे काँग्रेस नेत्यांशी संवाद साधणार आहेत. या भेटीनंतर राष्ट्रवादी कोणासोबत जाणार हे स्पष्ट होणार आहे.
मुंबई महापालिका निवडणूक कार्यक्रम आणि पार्श्वभूमी
मुंबई महानगरपालिकेत एकूण 227 प्रभाग असून 15 जानेवारी 2026 रोजी मतदान तर 16 जानेवारीला मतमोजणी होणार आहे. 2017 च्या निवडणुकीत शिवसेनेला 84, भाजपला 82, काँग्रेसला 31 आणि राष्ट्रवादीला 9 जागा मिळाल्या होत्या. 7 मार्च 2022 पासून पालिकेवर प्रशासक आहे. त्यामुळे यंदाची निवडणूक राजकीयदृष्ट्या अत्यंत महत्त्वाची मानली जात आहे.