Baba Siddique Murder Case : बाबा सिद्दीकी हत्याप्रकरणात नवी फसवणूक उघड, सीमकार्ड सिग्नलमुळे तपासाला कलाटणी

राष्ट्रवादी काँग्रेसचे माजी आमदार बाबा सिद्दीकी यांच्या हत्या प्रकरणात नवा खुलासा झाला आहे. सिद्दीकी यांच्या मोबाइल नंबरचा वापर दुसऱ्या सीमकार्डवर सुरू करण्याचा प्रयत्न करण्यात आल्याची बाब समोर आली आहे. 

मुंबई : राष्ट्रवादी काँग्रेसचे माजी आमदार बाबा सिद्दीकी यांच्या हत्याप्रकरणात एक मोठा खुलासा झाला आहे. गेल्यावर्षी विजयादशमीच्या दिवशी मुंबईतील वांद्रे परिसरात लॉरेन्स बिश्नोई टोळीशी संबंधित गुंडांनी गोळ्या झाडून सिद्दीकी यांची हत्या केली होती. या घटनेनंतर मुंबईत एकच खळबळ उडाली होती आणि काही मारेकऱ्यांना अटक झाली होती. मात्र, हत्येचा सूत्रधार आणि अन्य बाबींबाबत तपास सुरूच होता. आता या प्रकरणात एक नवा फसवणुकीचा प्रकार उघडकीस आला आहे.

दिल्लीतील सीमकार्ड सिग्नलमुळे उघड झाला प्रकार

बाबा सिद्दीकी यांच्या मोबाईल क्रमांकाचा वापर दुसऱ्या सीमकार्डवर सुरू करण्याचा प्रयत्न करण्यात आला होता. याबाबत वांद्रे पोलिसांनी दिल्लीतील बुराडी परिसरातून एका संशयिताला अटक केली आहे. या आरोपीविरोधात याआधीही सायबर गुन्हे दाखल असून, तो बाबा सिद्दीकी यांचा मोबाईल क्रमांक वापरून फसवणूक करण्याच्या तयारीत होता. मुंबईतील बोरीवली आणि मुख्य दंडाधिकारी न्यायालयात त्याच्याविरोधात गुन्हे प्रलंबित आहेत.

मेलच्या माध्यमातून बनावट कागदपत्रांचा वापर

२४ जून रोजी बाबा सिद्दीकी यांच्या पत्नी शेहझीन सिद्दीकी यांच्या नावाने एक ई-मेल आला होता. त्यात मोबाईल क्रमांकाच्या अधिकृत स्वाक्षरी अधिकाराची मागणी** करण्यात आली होती. या मेलमध्ये बनावट आधार कार्ड, पॅन, जीएसटी क्रमांक, आणि त्यांच्या कंपनीचे बनावट लेटरहेड वापरण्यात आले होते. कंपनीने ही माहिती ई-मेलद्वारे कुटुंबीयांना पाठवली आणि डॉ. अर्शिया सिद्दीकी (मुलगी) यांनाही सीसी मध्ये ठेवले होते. त्यामुळे हा प्रयत्न फसवणुकीचा असल्याचे उघडकीस आले.

फसवणुकीसाठी वापरले गेलेले कलमे

या प्रकरणी वांद्रे पोलिसांनी भारतीय न्याय संहितेअंतर्गत कलम ३१९(२) फसवणूक करणे,कलम ६२ कैदेस पात्र असलेल्या गुन्ह्याचा प्रयत्न,कलम ३३५ खोटे दस्तऐवज तयार करणे, कलम ३३६(२) आणि ३३६(३) दस्तऐवजांचे बनावटीकरण, कलम ३४०(२) बनावट इलेक्ट्रॉनिक नोंदी खऱ्या असल्याचे भासवणे अशा कलमांखाली गुन्हा दाखल केला आहे: या नव्या फसवणूकप्रकरणामुळे बाबा सिद्दीकी हत्येचा तपास नव्या दिशेने वळला असून पुढील तपासात अजून काही धक्कादायक बाबी समोर येण्याची शक्यता आहे.