अजित पवारांनी फोनवर फटकारलेल्या IPS अंजली कृष्णा कोण? वडिलांचा कपड्यांचा व्यवसाय तर आई टायपिस्ट! सर्वसामान्य परिस्थितीतून घडवले आयुष्य

उपमुख्यमंत्री अजित पवार यांनी एका महिला आयपीएस अधिकाऱ्याला फोनवरून दम दिल्याचा व्हिडिओ सध्या सोशल मीडियावर जोरदार व्हायरल होतोय. अवैध मुरुम उत्खनन सुरू असल्याच्या तक्रारीवर कारवाई करण्यासाठी डीएसपी अंजली कृष्णा आपल्या टीमसह घटनास्थळी आल्या होत्या.

मुंबई : उपमुख्यमंत्री अजित पवार यांनी महिला आयपीएस अधिकाऱ्याला दम दिल्याचा व्हिडिओ सोशल मीडियावर जोरदार व्हायरल झाला आहे. हा प्रकार सोलापूरच्या माढा तालुक्यातील कुर्डू गावात घडला. गावात अवैध मुरुम उत्खनन सुरू असल्याची तक्रार आल्यानंतर तहसीलदार आणि तलाठी कारवाईसाठी गेले होते. मात्र, तिथेच काही लोक लाठ्या-काठ्या घेऊन दाखल झाले आणि अधिकाऱ्यांना दमदाटी केली. 

ही माहिती मिळाल्यानंतर करमाळा उपविभागाच्या पोलिस उपअधीक्षक अंजली कृष्णा आपल्या पथकासह तिथे दाखल झाल्या आणि कारवाई सुरू केली. यावेळी राष्ट्रवादी काँग्रेस पक्षाच्या एका कार्यकर्त्याने थेट अजित पवार यांना फोन लावला. त्यानंतर अजित पवार यांनी अंजली कृष्णा यांच्याशी बोलताना त्यांना कारवाईबाबत चांगलाच दम दिला, असा व्हिडिओ आता व्हायरल झाल्याने या घटनेची राज्यभर चर्चा सुरू आहे.

अंजली कृष्णा यांचे पूर्ण नाव अंजना कृष्णा वी. एस. असे आहे. त्या सध्या सोलापूर जिल्ह्यातील करमाळा तालुक्यात पोलीस उपअधीक्षक (डीएसपी) म्हणून कार्यरत आहेत. त्यांच्या कार्यशैलीमुळे त्या डॅशिंग व कर्तव्यनिष्ठ अधिकारी म्हणून ओळखल्या जातात. प्रामाणिकपणा, नैतिकता आणि शिस्तीला प्राधान्य देत त्या जबाबदाऱ्या पार पाडतात.

अंजली कृष्णा यांचा जन्म 12 डिसेंबर 1997 रोजी केरळच्या तिरुवनंतपुरम जिल्ह्यातील मलयंकीजू गावात झाला. त्यांचे वडील बीजू कपड्यांचा छोटा व्यवसाय चालवतात, तर आई सीना या स्थानिक न्यायालयात टायपिस्ट म्हणून कार्यरत आहेत. अंजली एका सर्वसामान्य कुटुंबातून येतात आणि आपल्या मेहनतीच्या जोरावर त्यांनी मोठे यश मिळवले आहे.

अंजली कृष्णा यांनी UPSC CSE 2022-23 मध्ये AIR-355 रँक मिळवत आयपीएस पद मिळवले. त्यांनी प्राथमिक शिक्षण पूजप्पुरा येथील सेंट मॅरीज सेंट्रल स्कूलमधून पूर्ण केले. त्यानंतर तिरुवनंतपुरमच्या नीरमंकरा येथील HNMSPB NSS कॉलेज फॉर वुमेन मधून पुढील शिक्षण घेतले. गणित विषयात बीएससी पदवी संपादन केल्यानंतर त्यांनी UPSC परीक्षेची तयारी सुरू केली आणि पहिल्याच प्रयत्नात यश मिळवत देशभरात आपली ओळख निर्माण केली.