"मी हेक्टर देत होतो, पण त्यांनी फॉर्च्युनरच मागितली", वैष्णवीच्या वडिलांचा संतप्त खुलासा

वैष्णवी हगवणे आत्महत्या प्रकरणात वडिलांनी पत्रकार परिषद घेऊन भावनिक प्रतिक्रिया दिली आहे. फॉर्च्युनर गाडी न दिल्यास लग्न मोडण्याची धमकी दिल्याचा आरोप त्यांनी केला आहे. वैष्णवीच्या चारित्र्यावर शंका घेण्यात येत असल्याबद्दल त्यांनी संताप व्यक्त केला.

पुणे: वैष्णवी हगवणे आत्महत्या प्रकरणाने महाराष्ट्रात खळबळ उडवून दिली आहे. या प्रकरणात आरोपी पक्षाकडून न्यायालयात मांडण्यात आलेल्या युक्तिवादानंतर आता वैष्णवीचे वडील अनिल कस्पटे यांनी पत्रकार परिषद घेऊन थेट आणि भावनिक प्रतिक्रिया दिली आहे.

"फॉर्च्युनर न दिल्यास हेक्टर पेटवून देईन", धमकीचा आरोप

अनिल कस्पटे म्हणाले, "मी एमजी हेक्टर गाडी बुक केली होती. मात्र हगवणे कुटुंबाने फॉर्च्युनर गाडीची मागणी केली. वादावादी करत स्पष्ट धमकी दिली की, 'फॉर्च्युनर नाही दिलीत तर तुमची हेक्टर पेटवून देईन.' इतकंच नाही, तर फॉर्च्युनर न दिल्यास लग्न मोडण्याची धमकीही दिली." त्यामुळे अखेर दबावाखाली येऊन आम्ही फॉर्च्युनर गाडी घेऊन दिली आणि लग्न लावून दिलं, असा खळबळजनक आरोप त्यांनी केला.

"पाच कोटींच्या गाड्या" नाहीत, एकमेव गाडी आम्ही दिलेली – स्पष्टवक्तेपणा

शिवाजीनगर न्यायालयात हगवणे यांचे वकील म्हणाले होते की, "आमच्याकडे पाच कोटींच्या गाड्या आहेत. आम्ही फॉर्च्युनरसाठी छळ का करू?" यावर उत्तर देताना अनिल कस्पटे म्हणाले, "त्यांच्याकडे एकच गाडी आहे, तीही आम्ही दिलेली आहे. पाच कोटींचं हे विधान खोटं आहे."

"मोबाईल काढून घ्यायचा तर मग मागितला कशाला?"

वकिलांनी वैष्णवीच्या मोबाईलवरील चॅटबाबत दावा केला होता. त्यावर संताप व्यक्त करत अनिल कस्पटे म्हणाले, "जर मोबाईल काढून घ्यायचा होता तर मग मागितला का? आरोपी जावयासाठी आम्ही तब्बल १ लाख ५२ हजाराचा मोबाईल दिला. आजही त्या मोबाईलचे हप्ते मीच भरतो आहे." "मोबाईलमध्ये काय होतं, हे आम्हाला सांगितलंच गेलं नाही. उलट वैष्णवीच्या चारित्र्यावर संशय घेणं हे अत्यंत खालच्या पातळीचं आहे," असा जोरदार प्रहार त्यांनी केला.

"माझ्या मुलीचा बळी... आणि आता तिच्या चारित्र्यावर शंका"

अनिल कस्पटे म्हणाले, "माझ्या मुलीचा मृत्यू एक अपघात नव्हता, ती एका पद्धतशीर छळाची शिकार होती. जेव्हा तिचा जीव गेला, तेव्हा आता तिच्याच चारित्र्यावर शंका घेतली जात आहे. वकिलांनी समाजात चुकीचा संदेश देण्याचा प्रयत्न केला आहे."

वैष्णवी हगवणे आत्महत्या प्रकरणात दररोज नवे दावे आणि प्रतिदावे समोर येत आहेत. आरोपी पक्षाच्या युक्तिवादावर वैष्णवीच्या वडिलांनी केलेला हा संतप्त आणि तथ्याधारित खुलासा प्रकरणाला नवे वळण देतो. आता पुढील न्यायालयीन प्रक्रियेकडे संपूर्ण राज्याचे लक्ष लागून आहे.