रामरक्षा विरुद्ध हनुमान चालीसा! उद्धव ठाकरे-नवनीत राणा पुन्हा आमनेसामने

नागपूरमध्ये उद्धव ठाकरे यांच्या रामरक्षा आंदोलनाला प्रत्युत्तर म्हणून माजी खासदार नवनीत राणा अमरावतीत हनुमान चालीसा पठण करणार आहेत. भाजपनेही अमरावतीत स्वतंत्र कार्यक्रम आयोजित केला आहे. 

मुंबई : महाराष्ट्राच्या राजकारणात हनुमान चालीसा पठणावरून गाजलेला जुना वाद पुन्हा एकदा चर्चेत आला आहे. शिवसेना उबाठा प्रमुख उद्धव ठाकरे यांच्या नागपूरमधील रामरक्षा आंदोलनाला प्रत्युत्तर दिले जाणार आहे. यासाठी माजी खासदार नवनीत राणा यांनी अमरावतीतील हनुमानगडी येथे हनुमान चालीसा पठण करण्याचा निर्णय घेतला आहे. त्यामुळे विदर्भात धार्मिक आणि राजकीय वातावरण चांगलेच तापले आहे. यामुळे ठाकरे आणि राणा पुन्हा एकदा आमनेसामने आल्याचे चित्र आहे.

मातोश्रीबाहेरील हनुमान चालीसा आंदोलनाची आठवण

महाविकास आघाडी सरकारच्या काळात तत्कालीन मुख्यमंत्री उद्धव ठाकरे यांच्या 'मातोश्री' निवासस्थानाबाहेर नवनीत राणांनी हनुमान चालीसा पठण करण्याचा निर्धार केला होता. पण नवनीत राणा आणि आमदार रवी राणा यांना अटक करण्यात आली होती. या प्रकरणाने राज्याच्या राजकारणात मोठी खळबळ उडवली होती. आता त्याच वादाची पार्श्वभूमी पुन्हा एकदा पुढे आली आहे.

नागपुरात उद्धव ठाकरे, अमरावतीत नवनीत राणा

उद्धव ठाकरे नागपूरमध्ये राम मंदिरात रामरक्षा पठण आणि हिंदुत्वाशी संबंधित कार्यक्रम करणार आहेत. त्याचवेळी अमरावतीतील प्रसिद्ध हनुमानगडी येथे नवनीत राणा हनुमान चालीसा पठण करणार आहेत. दोन्ही कार्यक्रमांकडे राज्याच्या राजकीय वर्तुळाचे लक्ष लागले आहे.

भाजपकडूनही हनुमान चालीसा पठणाचा कार्यक्रम

अमरावतीतील राजकमल चौकात भाजपच्या वतीनेही हनुमान चालीसा पठणाचे आयोजन करण्यात आले आहे. आमदार प्रवीण पोटे आणि भाजप प्रवक्ते शिवराय कुळकर्णी यांच्या नेतृत्वाखाली हा कार्यक्रम होणार आहे. हा भारतीय जनता पक्षाचा अधिकृत कार्यक्रम असल्याचे भाजपने स्पष्ट केले आहे.

उद्धव ठाकरेंवर भाजपची टीका

या पार्श्वभूमीवर भाजप नेत्यांनी उद्धव ठाकरे यांच्यावर जोरदार टीका केली आहे. भाजप प्रवक्ते शिवराय कुळकर्णी यांनी मुख्यमंत्री देवेंद्र फडणवीस हेच खरे रामभक्त असल्याचा दावा केला. बाबरी आंदोलनाच्या काळात फडणवीस प्रत्यक्ष कारसेवेत सहभागी झाले होते. तर उद्धव ठाकरे यांनी बाळासाहेब ठाकरे यांचे हिंदुत्व सोडल्याचा आरोपही त्यांनी केला.

राजकीय आरोप-प्रत्यारोपांना धार्मिक रंग

रामरक्षा आणि हनुमान चालीसा या दोन धार्मिक प्रतीकांच्या माध्यमातून सुरू झालेल्या या कार्यक्रमांमुळे विदर्भातील राजकारणाला नवे वळण मिळाले आहे. आगामी स्थानिक स्वराज्य संस्था निवडणुकांच्या पार्श्वभूमीवर हिंदुत्वाचा मुद्दा पुन्हा केंद्रस्थानी येण्याची चिन्हे दिसत आहेत.