वजनदार नेत्याची दिशा बदलणार! सिद्धाराम म्हेत्रेंच्या भूमिकेकडे राज्याचे लक्ष

अक्कलकोटचे माजी आमदार सिद्धाराम म्हेत्रे काँग्रेस सोडून शिवसेना शिंदे गटात प्रवेश करणार आहेत. ३१ मे रोजी ते आपल्या समर्थकांसह शिवसेनेत प्रवेश करण्याची शक्यता आहे. यामुळे सोलापूर जिल्ह्यातील काँग्रेस पक्षाला मोठा धक्का बसला आहे.

सोलापूर जिल्ह्यातील काँग्रेस पक्षाला मोठा धक्का बसला आहे. अक्कलकोटचे माजी आमदार आणि माजी गृहराज्यमंत्री सिद्धाराम म्हेत्रे यांनी काँग्रेस पक्ष सोडण्याचा निर्णय घेतला असून, ते लवकरच उपमुख्यमंत्री एकनाथ शिंदे यांच्या नेतृत्वाखालील शिवसेना शिंदे गटात प्रवेश करणार आहेत. म्हेत्रे यांनी अलीकडेच एकनाथ शिंदे यांची भेट घेतली असून, ३१ मे रोजी ते आपल्या समर्थक कार्यकर्त्यांसह शिवसेनेत प्रवेश करणार असल्याची माहिती समोर आली आहे. 

या घडामोडीमुळे सोलापूर जिल्ह्यातील काँग्रेस पक्षाच्या संघटनात्मक ताकदीवर परिणाम होण्याची शक्यता आहे. सोलापूर महानगरपालिकेसह जिल्ह्यातील अक्कलकोट, बार्शी, पंढरपूर, करमाळा, मंगळवेढा, सांगोला या नगरपरिषदांमध्ये आगामी स्थानिक स्वराज्य संस्थांच्या निवडणुका होणार आहेत. या पार्श्वभूमीवर म्हेत्रे यांचा शिवसेनेत प्रवेश महत्त्वाचा मानला जात आहे.

सिद्धाराम म्हेत्रे हे काँग्रेस पक्षाचे जेष्ठ नेते असून, त्यांनी अक्कलकोट विधानसभा मतदारसंघातून प्रतिनिधित्व केले आहे. त्यांच्या पक्षांतरामुळे सोलापूर जिल्ह्यातील राजकीय समीकरणांवर परिणाम होण्याची शक्यता आहे.  या घडामोडीमुळे आगामी स्थानिक स्वराज्य संस्थांच्या निवडणुका अधिक चुरशीच्या होण्याची शक्यता आहे.