Tanaji Sawant: माजी मंत्री तानाजी सावंत यांचा बंगला पुराच्या विळख्यात!, दोन टोयोटा फॉर्च्युनर गाड्या पाण्यात बुडाल्या

Tanaji Sawant: सोलापूर जिल्ह्यातील माढा तालुक्यात माजी मंत्री तानाजी सावंत यांच्या बंगल्यात पुराचे पाणी शिरले असून, त्यांच्या महागड्या गाड्या पाण्याखाली गेल्या आहेत. 

सोलापूर: राज्यात सुरू असलेल्या मुसळधार पावसाने संपूर्ण महाराष्ट्राला अक्षरशः झोडपून काढलं आहे. याच पार्श्वभूमीवर माढा तालुक्यातील वाकाव गावात स्थित माजी मंत्री तानाजी सावंत यांच्या बंगल्यावर पुराचे पाणी शिरल्याचा थरारक व्हिडीओ समोर आला आहे. या व्हिडीओत त्यांच्या घराबाहेर उभ्या असलेल्या दोन टोयोटा फॉर्च्युनर गाड्या आणि ट्रॅक्टर पूर्णपणे पाण्याखाली गेलेले दिसतात.

बोटीने कुटुंबियांची सुटका

परिस्थिती इतकी बिकट झाली की तानाजी सावंत यांच्या कुटुंबियांची सुटका थेट बोटीच्या माध्यमातून करण्यात आली. काही सदस्य बंगल्याच्या टेरेसवर अडकले होते, त्यांनाही सुरक्षित स्थळी हलवण्यात येत आहे. हे दृश्य स्थानिक नागरिकांमध्ये भीतीचं वातावरण निर्माण करत आहे.

सोलापूर जिल्ह्यात अतिवृष्टीचा कहर

2 लाख हेक्टरपेक्षा अधिक शेतीचे नुकसान

2 लाख 22 हजार 881 शेतकरी संकटात

11 तालुक्यांतील 729 गावे पाण्याखाली

या आपत्तीत आतापर्यंत 6 जणांचा दुर्दैवी मृत्यू

जिल्हाधिकाऱ्यांनी ही माहिती देताना नैसर्गिक आपत्तीमुळे शेती, घरे, वाहतूक यंत्रणा आणि जनजीवन पूर्णपणे विस्कळीत झाल्याचे सांगितले आहे.

सीना नदीला महापूर, महामार्ग बंद होण्याची शक्यता

सीना नदीला आलेल्या महापुरामुळे सोलापूर-विजयपूर महामार्ग बंद पडण्याची शक्यता वर्तवली जात आहे. या मार्गावर प्रवास करणाऱ्यांनी खबरदारी घेण्याचं आवाहन करण्यात आलं आहे.

व्हिडीओमध्ये दिसलेले भयावह दृश्य

व्हायरल झालेल्या व्हिडीओमध्ये तानाजी सावंत यांच्या बंगल्याच्या आवारात पुराचे पाणी तुडुंब भरलेले, महागड्या गाड्या पूर्णपणे जलमय झालेल्या दिसतात. स्थानिक प्रशासन व आपत्ती निवारण पथक घटनास्थळी तातडीने पोहोचले असून मदत कार्य सुरू आहे.

सोलापूर जिल्ह्यासह राज्यभरात झालेल्या अतिवृष्टीमुळे माणसांचे, जनावरांचे आणि शेतकऱ्यांच्या उदरनिर्वाहाचे मोठे नुकसान झाले आहे. तानाजी सावंत यांचा बंगला आणि त्यांची वाहने पुरात अडकणं ही घटना या संकटाच्या भयावहतेचं उदाहरण ठरते.