आम्ही सरकारमध्ये असलो तरी सर्व काही... मंत्री सरनाईक यांनी व्यक्त केली खंत

शिवसेना (शिंदे गट) चे आमदार आणि मंत्री प्रताप सरनाईक यांनी केलेल्या वक्तव्यामुळे राजकीय वर्तुळात खळबळ उडाली आहे. सरकारमध्ये असूनही सर्व गोष्टी आपल्या हातात नसल्याचे त्यांनी म्हटल्याने विरोधकांना टीकेची संधी मिळाली आहे.

मुंबई | प्रतिनिधी राजकारणात वक्तव्यं अनेकदा रणनीतीचा भाग असतात, मात्र शिवसेना (शिंदे गट) चे आमदार आणि मंत्री प्रताप सरनाईक यांनी केलेलं विधान भाजपसाठी अडचणीचं ठरताना दिसत आहे. त्यांच्या शब्दांमुळे सत्ताधाऱ्यांना बॅकफुटवर जावं लागत असून विरोधकांनी यावरून भाजप आणि सरकारला चिमटे काढायला सुरुवात केली आहे.

प्रताप सरनाईक यांनी एका स्थानिक कार्यक्रमात बोलताना, "आम्ही सरकारमध्ये असलो तरी सर्व गोष्टी आमच्या हातात नाहीत..." असा इशाराच त्यांनी दिला. त्यांच्या या वक्तव्याचा रोख थेट शिंदे-फडणवीस सरकारच्या कार्यपद्धतीकडे होता का? असा प्रश्न सध्या राजकीय वर्तुळात चर्चेचा विषय ठरत आहे

सरनाईक यांच्या या विधानावर लगेचच विरोधी पक्षनेते, काँग्रेस आणि राष्ट्रवादीच्या नेत्यांनी सरकारवर टीकास्त्र सोडलं. "हीच खरी भाजपची कार्यशैली आहे. शिवसेनेचे मंत्री सुद्धा नाराज आहेत," असं म्हणत सरकारमध्ये अंतर्गत विसंवाद असल्याचा आरोप त्यांनी केला.

विवाद उफाळण्याआधीच भाजपने या वक्तव्यावर स्पष्टीकरण देण्याचा प्रयत्न केला. “सरनाईक यांचे विधान चुकीच्या पद्धतीने समजलं गेलं,” असा बचाव करत सत्ताधाऱ्यांनी प्रसारमाध्यमांतून तणाव कमी करण्याचा प्रयत्न केला. मात्र यामागे सत्तेत असलेल्या घटकांतील सामंजस्याची चाचणी स्पष्टपणे दिसून येत आहे.