Palghar News : पालघरमध्ये हॉस्पिटलमध्ये घुसून दादागिरी, शिंदेंचा मोठा दणका; ७ शिवसेना पदाधिकाऱ्यांचं निलंबन

दहीहंडीत जखमी झालेल्या गोविंदांवरच्या उपचारांवरून हॉस्पिटलमध्ये गोंधळ घालणं शिवसेनेच्या पदाधिकाऱ्यांना चांगलंच महागात पडलं आहे. मुख्यमंत्री एकनाथ शिंदे यांनी पालघरमधील ७ पदाधिकाऱ्यांना थेट निलंबित केलं आहे. या प्रकरणी पोलिसात गुन्हाही दाखल झाला आहे.

पालघर : दहीहंडीच्या कार्यक्रमात जखमी झालेल्यांवर उपचार करण्यावरून हॉस्पिटल स्टाफला मारहाण केल्याप्रकरणी शिवसेनेने पालघर जिल्ह्यातील आपल्या सात पदाधिकाऱ्यांना निलंबित केलं आहे. यात जिल्हाध्यक्षाचाही समावेश आहे.

पक्षाच्या प्रसिद्धीपत्रकानुसार, मुख्यमंत्री आणि पक्षाचे मुख्य नेते एकनाथ शिंदे यांच्या आदेशाने शिस्तभंगाच्या कारवाईखाली या सात जणांना निलंबित करण्यात आलं आहे.

पोलिसांची कारवाई

याआधी, दहीहंडीत जखमी झालेल्या गोविंदांवरच्या उपचारांवरून पालघरच्या रिलीफ हॉस्पिटलमधील एका डॉक्टर आणि स्टाफला मारहाण केल्याचा आरोप शिवसेना नेत्यांवर आहे.

या प्रकरणी पोलिसांनी १७ जणांविरोधात गुन्हा दाखल केला आहे. यामध्ये शिवसेना (शिंदे गट) जिल्हाध्यक्ष कुंदन संखे आणि आमदार राजेंद्र गावित यांच्या मुलाचाही समावेश आहे.

हॉस्पिटल संचालकांनी काय सांगितलं?

रिलीफ हॉस्पिटलचे संचालक डॉ. विशाल कोडगीरकर यांनी सांगितलं की, दहीहंडीवेळी ५ गोविंदा जखमी झाले होते आणि त्यांना उपचारासाठी हॉस्पिटलमध्ये आणण्यात आलं होतं.

"दहीहंडीच्या कार्यक्रमात ५ गोविंदा पडले आणि जखमी झाले. त्यांना आमच्याकडे आणण्यात आलं. त्यापैकी दोघांना आम्ही दाखल करून घेतलं. कारण त्यांच्या डोक्याला मार लागला होता आणि ते बेशुद्ध झाले होते. नियमानुसार त्यांना २४ तास निरीक्षणाखाली ठेवणं गरजेचं होतं," असं डॉ. कोडगीरकर म्हणाले.

त्यांनी सांगितलं की, जखमी गोविंदांसोबत आलेले लोक नंतर हॉस्पिटलमध्ये आले आणि रुग्णांना दाखल का करून घेतलं, असा जाब विचारू लागले. त्यांच्या मते, रुग्णांना दाखल करण्याची गरज नव्हती.

वाद आणि मारहाण

डॉ. कोडगीरकर यांच्या म्हणण्यानुसार, या लोकांनी एका महिला डॉक्टरला जाब विचारायला सुरुवात केल्यावर प्रकरण चिघळलं. जेव्हा एक पुरुष रिसेप्शनिस्ट तिला वाचवण्यासाठी मध्ये आला, तेव्हा त्याच्या कानशिलात जोरात मारण्यात आली. "त्यानंतर ते आयसीयूमध्ये घुसले, रुग्णांना लावलेले आयव्ही ड्रिप्स काढले आणि त्यांना घेऊन निघून गेले," असंही त्यांनी सांगितलं.

भीतीचं वातावरण आणि कारवाईची मागणी

हॉस्पिटल संचालकांनी या घटनेला पूर्णपणे चुकीचं म्हटलं आहे. यामुळे हॉस्पिटलच्या कर्मचाऱ्यांमध्ये भीतीचं वातावरण निर्माण झालं आहे, असं ते म्हणाले.

"हा सगळा प्रकार पूर्णपणे चुकीचा होता. आमच्या स्टाफमध्ये भीती पसरली आहे. ज्या कर्मचाऱ्याला मारहाण झाली, तो खूप घाबरला आहे आणि त्याचं कुटुंबही चिंतेत आहे," असं डॉ. कोडगीरकर म्हणाले.

या मारहाणीसाठी आणि हॉस्पिटलमधील गोंधळासाठी जबाबदार असलेल्यांवर कडक कारवाईची मागणी त्यांनी केली आहे. "या घटनेप्रकरणी शक्य तितकी कठोर कारवाई व्हावी, अशी आमची मागणी आहे," असं ते म्हणाले.