Nashik Car Accident : नाशिक दिंडोरीत भीषण अपघात; विहिरीत कोसळलेल्या कारमधील 9 जणांचा मृत्यू

Nashik Car Accident : नाशिकच्या दिंडोरी येथे कार विहिरीत कोसळून नऊ जणांचा मृत्यू झाल्याची धक्कादायक घटना घडली. मृतांमध्ये एकाच कुटुंबातील सदस्यांचा समावेश असून बचावकार्याला अंधार आणि पाण्यामुळे अडथळे आले. अपघाताचे कारण अद्याप अस्पष्ट आहे. दरम्यान, भंडाऱ्यात प्रसंगावधानाने मोठी दुर्घटना टळली.

Nashik Car Accident : नाशिक जिल्ह्यातील दिंडोरी येथे शुक्रवारी रात्री एक हृदयद्रावक अपघात घडला. भरधाव कार थेट विहिरीत कोसळल्याने गाडीत प्रवास करणाऱ्या नऊ जणांचा दुर्दैवी मृत्यू झाला. या घटनेमुळे परिसरात एकच खळबळ उडाली असून मृतांमध्ये लहान मुलांचाही समावेश असल्याची माहिती समोर आली आहे.

एकाच कुटुंबातील 9 जणांचा मृत्यू

मिळालेल्या माहितीनुसार, दिंडोरी शहरातील शिवाजीनगर परिसरात MH15-JS-1053 क्रमांकाची कार रात्री सुमारे दहा वाजता विहिरीत कोसळली. या भीषण अपघातात एकाच कुटुंबातील पाच जणांसह एकूण नऊ जणांचा मृत्यू झाला. मृतांमध्ये सुनील दत्तू दरगोडे, राखी दरगोडे, उषा दरगोडे, श्रद्धा दरगोडे आणि श्रावणी दरगोडे यांचा समावेश आहे. सर्व मृतक इंदोरे गावातील रहिवासी असल्याचे समजते.

बचावकार्याला तांत्रिक अडचणी

अपघातानंतर स्थानिक नागरिक, प्रशासन आणि NDRF च्या मदतीने तत्काळ बचावकार्य सुरू करण्यात आले. मात्र, विहिरीतील पाणी आणि रात्रीचा अंधार यामुळे शोधमोहीमेत अडथळे आले. अखेर क्रेनच्या सहाय्याने कार बाहेर काढण्यात आली, त्यावेळी गाडीत नऊ जण असल्याचे स्पष्ट झाले. दुर्दैवाने सर्वांचा पाण्यात बुडून मृत्यू झाल्याचे निष्पन्न झाले.

अपघाताचे कारण अद्याप अस्पष्ट

ही कार एका खासगी कार्यक्रमावरून परतत असताना हा अपघात घडल्याची प्राथमिक माहिती आहे. मात्र, वाहन विहिरीत कसे कोसळले याचे नेमके कारण अद्याप समजू शकलेले नाही. पोलिसांकडून पुढील तपास सुरू असून या घटनेने संपूर्ण परिसर हादरला आहे.

भंडाऱ्यात प्रसंगावधानाने टळली मोठी दुर्घटना

दरम्यान, भंडाऱ्यातील तुमसर येथे आणखी एक अपघात घडला. अज्ञात वाहनाने विद्युत खांबाला धडक दिल्याने जिवंत वीजतारा रस्त्यावर पडल्या. एका जागरूक वाहनचालकाने तत्काळ वाहतूक थांबवल्यामुळे मोठी जीवितहानी टळली. वीज वितरण विभागाने पुरवठा बंद करून परिस्थिती नियंत्रणात आणली.