ठाण्याच्या खासदार नरेश म्हस्केंना सलग दुसऱ्यांदा ‘संसद रत्न’ पुरस्कार; खासदार श्रीकांत शिंदेंचाही सन्मान
सार
Sansad Ratna 2026 : ठाणे लोकसभेचे खासदार नरेश म्हस्के आणि खासदार श्रीकांत शिंदे यांना सलग दुसऱ्यांदा प्रतिष्ठेचा ‘संसद रत्न’ पुरस्कार जाहीर झाला आहे. संसदेतील प्रभावी उपस्थिती, अभ्यासपूर्ण भाषणे, प्रश्नोत्तरांमधील सक्रिय सहभाग आणि संसदीय कामगिरीच्या आधारे हा सन्मान देण्यात आला आहे.
Sansad Ratna 2026 : संसदेत प्रभावी मांडणी, अभ्यासपूर्ण भाषणे आणि सातत्यपूर्ण उपस्थितीच्या जोरावर ठाणे लोकसभेचे खासदार नरेश म्हस्के यांनी पुन्हा एकदा राष्ट्रीय पातळीवर ठसा उमटवला आहे. त्यांना सलग दुसऱ्यांदा प्रतिष्ठेचा ‘संसद रत्न’ पुरस्कार जाहीर झाला असून, खासदार श्रीकांत शिंदे यांनाही दुसऱ्यांदा या सन्मानासाठी निवडण्यात आले आहे. संसदेतील उत्कृष्ट कामगिरीबद्दल मिळालेल्या या गौरवामुळे ठाण्याच्या राजकीय वर्तुळात आनंदाचे वातावरण निर्माण झाले आहे.
संसदेतील कामगिरीची राष्ट्रीय स्तरावर दखल
संसदेतील विविध विषयांवर अभ्यासपूर्ण भूमिका मांडणे, अर्थसंकल्पावरील चर्चांमध्ये सहभाग, सरकारच्या धोरणांवर प्रभावी भाष्य आणि विविध विभागांवर प्रश्न उपस्थित करून नरेश म्हस्के यांनी संसदेत स्वतःची वेगळी ओळख निर्माण केली आहे. संसदेतील उपस्थितीतही त्यांनी अव्वल स्थान कायम ठेवले आहे. त्यांच्या या सक्रिय संसदीय कार्याची दखल घेत सलग दुसऱ्यांदा ‘संसद रत्न’ पुरस्कार जाहीर करण्यात आला आहे.
श्रीकांत शिंदेंनाही दुसऱ्यांदा गौरव
ठाण्याचे खासदार श्रीकांत शिंदे यांनाही दुसऱ्यांदा ‘संसद रत्न’ पुरस्कार जाहीर झाला आहे. संसदेत धडाकेबाज आणि तथ्याधारित भाषणांमुळे त्यांनी विरोधकांनाही अनेकदा घेरले आहे. विविध राष्ट्रीय विषयांवर प्रभावी मांडणी आणि संसदीय चर्चांमधील सक्रिय सहभागामुळे त्यांची निवड करण्यात आल्याचे सांगण्यात आले.
जुलैमध्ये नवी दिल्लीमध्ये होणार पुरस्कार सोहळा
‘संसद रत्न’ पुरस्कारांचा १६ वा सोहळा जुलै २०२६ मध्ये नवी दिल्ली येथे पार पडणार आहे. यंदा या पुरस्कारांचा १५० वा टप्पा पूर्ण होत आहे. प्राइम पॉइंट फाउंडेशनचे संस्थापक श्रीनिवासन आणि पुरस्कार समितीच्या अध्यक्षा प्रियदर्शनी राहुल यांनी विजेत्यांची घोषणा केली.
समितीच्या माहितीनुसार, यावर्षी १० लोकसभा खासदार, २ राज्यसभा खासदार आणि ४ संसदीय स्थायी समित्यांची निवड करण्यात आली आहे. संसदेतील अधिकृत आकडेवारी, पीआरएस लेजिस्लेटिव्ह रिसर्च तसेच लोकसभा आणि राज्यसभा सचिवालयातील माहितीच्या आधारे निवड प्रक्रिया पार पडते.
‘संसद रत्न’ पुरस्काराचे महत्त्व काय?
चेन्नईस्थित प्राइम पॉईंट फाउंडेशनने २०१० मध्ये माजी राष्ट्रपती डॉ. ए. पी. जे. अब्दुल कलाम यांच्या सूचनेनुसार ‘संसद रत्न’ पुरस्काराची स्थापना केली होती. पहिल्या पुरस्कार सोहळ्याचे उद्घाटन स्वतः डॉ. कलाम यांनी केले होते. संसदीय क्षेत्रातील हा अत्यंत प्रतिष्ठेचा आणि विश्वासार्ह पुरस्कार मानला जातो.या पुरस्कारासाठी निवड करताना खासदारांची उपस्थिती, चर्चांमधील सहभाग, विचारलेले प्रश्न, खासगी विधेयके आणि संसदीय कामगिरीचा सर्वंकष आढावा घेतला जातो.
नरेश म्हस्के यांची पहिली प्रतिक्रिया
पुरस्कार जाहीर झाल्यानंतर खासदार नरेश म्हस्के यांनी आनंद व्यक्त करत हा सन्मान पक्ष नेतृत्व, कार्यकर्ते आणि मतदारांना समर्पित केला. “उपमुख्यमंत्री एकनाथ शिंदे यांचा भक्कम पाठिंबा आणि खासदार श्रीकांत शिंदे यांचे मार्गदर्शन यामुळेच हा पुरस्कार मिळाला. महायुतीचे पदाधिकारी, महिला आघाडी, युवा कार्यकर्ते आणि मतदारराजा यांनाच या पुरस्काराचे श्रेय आहे,” अशी भावना त्यांनी व्यक्त केली.