मराठवाड्यासाठी गुड न्यूज! उन्हाळी सुट्टीत 'दिल्लीवारी' झाली सोपी; नांदेड-संभाजीनगरमार्गे धावणार स्पेशल ट्रेन, पाहा संपूर्ण वेळापत्रक

nanded sambhajinagar delhi summer special train: दक्षिण मध्य रेल्वेने मराठवाड्यातील प्रवाशांसाठी उन्हाळी सुट्ट्यांमध्ये नांदेड ते हजरत निजामुद्दीन (दिल्ली) दरम्यान एक विशेष साप्ताहिक एक्स्प्रेस सुरू केली आहे. 

मराठवाड्यासाठी गुड न्यूज! उन्हाळी सुट्टीत 'दिल्लीवारी' झाली सोपी

छत्रपती संभाजीनगर: उन्हाळी सुट्ट्या सुरू झाल्या की वेध लागतात ते सहलीचे! पण ऐनवेळी रेल्वेचे कन्फर्म तिकीट मिळवणे म्हणजे एक दिव्यच असते. प्रवाशांची हीच अडचण ओळखून दक्षिण मध्य रेल्वेने मराठवाड्यातील प्रवाशांना मोठं गिफ्ट दिलं आहे. हुजूर साहिब नांदेड ते हजरत निजामुद्दीन (नवी दिल्ली) दरम्यान विशेष उन्हाळी एक्स्प्रेस धावणार आहे. विशेष म्हणजे, सचखंड आणि संपर्क क्रांतीनंतर दिल्लीला जाणारी ही चौथी थेट रेल्वे ठरणार असल्याने प्रवाशांमध्ये उत्साहाचे वातावरण आहे. 

रेल्वेचे वेळापत्रक आणि फेऱ्या (ट्रेन नं. ०७६२१ / ०७६२२)

ही विशेष रेल्वे साप्ताहिक असून एप्रिल आणि मे महिन्यात एकूण ८ फेऱ्या पूर्ण करेल.

१. नांदेड ते दिल्ली (०७६२१)

कालावधी: ११ एप्रिल ते ३० मे (प्रत्येक शनिवारी).

वेळ: नांदेडहून सकाळी ८:४५ वाजता सुटेल.

संभाजीनगर आगमन: सकाळी ११:४० वाजता पोहोचेल आणि ११:५० ला दिल्लीकडे रवाना होईल.

दिल्लीत आगमन: दुसऱ्या दिवशी दुपारी २:०० वाजता (हजरत निजामुद्दीन).

२. दिल्ली ते नांदेड (०७६२२)

कालावधी: १२ एप्रिल ते ३१ मे (प्रत्येक रविवारी).

वेळ: दिल्लीहून (निजामुद्दीन) रात्री ९:४० वाजता सुटेल.

संभाजीनगर आगमन: दुसऱ्या दिवशी रात्री ८:३० वाजता.

नांदेडमध्ये पोहोचण्याची वेळ: मध्यरात्री १२:३५ वाजता. 

प्रवासाचे मुख्य थांबे

ही रेल्वे मराठवाडा आणि उत्तर भारताला जोडणाऱ्या महत्त्वाच्या स्थानकांवर थांबेल.

नांदेड, पूर्णा, परभणी, सेलू, परतूर, जालना, छत्रपती संभाजीनगर, मनमाड, जळगाव, भुसावळ, खंडवा, इटारसी, भोपाळ, बीना, झाशी, ग्वाल्हेर, आग्रा कँट आणि मथुरा. 

आरक्षणाची तारीख विसरू नका!

या विशेष रेल्वेसाठीचे आरक्षण ५ एप्रिल २०२६ रोजी सकाळी ८ वाजेपासून सुरू होणार आहे. उन्हाळी सुट्ट्यांमुळे या गाडीला मोठी गर्दी होण्याची शक्यता आहे, त्यामुळे प्रवाशांनी आपले तिकीट त्वरित बुक करण्याचे आवाहन रेल्वेने केले आहे. 

मराठवाड्यातील प्रवाशांना मोठा दिलासा

याआधी जाहीर झालेल्या २९ विशेष गाड्यांमध्ये संभाजीनगरचा समावेश नसल्याने प्रवाशांमध्ये नाराजी होती. मात्र, नव्या निर्णयामुळे आता जालना, परभणी आणि संभाजीनगरच्या प्रवाशांना दिल्ली, आग्रा आणि मथुरा येथे जाण्यासाठी एक हक्काचा पर्याय उपलब्ध झाला आहे.