नागपूर-पुणे वंदे भारत एक्सप्रेस आजपासून होणार सुरु, या स्थानकांवर घेणार थांबा, मोदी दाखवणार झेंडा, वाचा रेल्वेची प्रेसनोट तशीची तशी

पुणे - नागपूर (अजनी) ते पुणे बहुप्रतिक्षित वंदे भारत एक्सप्रेस १० ऑगस्टपासून सुरू होणार असून, या गाडीला पंतप्रधान नरेंद्र मोदी हिरवा झेंडा दाखवणार आहेत. या ट्रेनचा नागपूरकर आणि पुणेकर यांना मोठा लाभ होईल. या शिवाय ही ट्रेन ९ ठिकाणी थांबा घेणार आहे.

या स्थानकांवर असेल थांबा

ही एक्सप्रेस आठवड्यातून तीन वेळा धावणार असून, अजनी रेल्वे स्थानकावरून सुरू होऊन पुण्यातील हडपसर स्थानकावर पोहोचेल. अंदाजे ८५० किलोमीटरहून अधिकचा प्रवास ही गाडी १२ तासांपेक्षा कमी वेळेत पूर्ण करणार आहे. अजनी (नागपूर), वर्धा, बडनेरा, अकोला, भुसावळ, जळगाव, मनमाड, कोपरगाव, अहमदनगर, दौड, हडपसर (पुणे) या रेल्वे स्थानकांवर ही गाडी थांबा घेणार आहे. ही रेल्वे अजनी रेल्वे स्टेशन येथूून सकाळी ९.५० वाजता सुटेल आणि हडपसरला सायंकाळी ६.२५ वाजता पोहोचेल. त्यामुळे या शहरांमधील प्रवाशांना या गाडीचा लाभ होणार असल्याचे दिसून येत आहे.

प्रवासाच्या तासांमध्ये लक्षणीय बचत

या सेवेमुळे विद्यमान महाराष्ट्र एक्सप्रेस (१८+ तास) आणि इतर एक्सप्रेस गाड्यांपेक्षा प्रवास वेळेत लक्षणीय बचत होणार आहे. मात्र, स्लीपर डब्यांचा अभाव (जो आता पुढील वर्षीपर्यंत लांबवण्यात आला आहे) दीर्घ अंतराचा प्रवास करणाऱ्या प्रवाशांसाठी अडचणीचा ठरू शकतो. सध्या ही गाडी फक्त चेअरकार डब्यांसह धावणार आहे.

हडपसरपासून होणार सुरु

पुणे रेल्वे स्थानकावर आधीच ताण असल्यामुळे आणि अधिक गाड्या स्वीकारण्याची क्षमता नसल्याने हडपसरला पर्यायी टर्मिनस म्हणून निवडण्यात आले आहे. ही सेवा विशेषतः पुण्यातील आयटी क्षेत्रात कार्यरत असलेल्या विदर्भातील व्यावसायिकांसाठी उपयुक्त ठरणार आहे.

मोदींच्या हस्ते उद्घाटन

या गाडीचे थांबे, वेळा आणि ट्रेन क्रमांकाबाबतची संपूर्ण माहिती गाडी सुरू होण्याच्या दोन दिवस आधी प्रवासी आरक्षण प्रणाली (PRS) मध्ये प्रसिद्ध केली जाईल. पंतप्रधान मोदी या उद्घाटन सोहळ्यादरम्यान बंगळुरू–बेळगाव आणि अमृतसर–श्री माता वैष्णो देवी कटरा मार्गांवरील वंदे भारत गाड्यांचाही शुभारंभ करणार आहेत.

अजनी रेल्वे स्थानकांवर विकास काम

मात्र अजनी स्थानकाच्या परिस्थितीबाबत काही चिंता व्यक्त करण्यात आल्या आहेत. वंदे भारत गाडी निघणार असलेला प्लॅटफॉर्म क्रमांक २ सध्या पुरेशा निवाऱ्याविना असून, तेथे सुरू असलेले विकास काम धीम्या गतीने सुरू आहे. सध्या सुरू असलेल्या पावसामुळे प्रवाशांना पुरेशा प्रतीक्षागृहाच्या अभावामुळे मोठ्या गैरसोयींचा सामना करावा लागू शकतो. रेल्वे अधिकाऱ्यांनी मान्य केले आहे की, स्थानक पूर्णपणे तयार नसेल तर उद्घाटनापूर्वी काम वेगाने पूर्ण करण्याची गरज आहे.

वाचा रेल्वेची प्रेसनोट जशीची तशी

वाचा रेल्वेची प्रेसनोट जशीची तशी