एसटी महामंडळात १७,७४२ पदांची 'मेगाभरती'! कंत्राटी कर्मचाऱ्यांचे नशीब फळफळणार; परिवहन मंत्र्यांची मोठी घोषणा

MSRTC recruitment for 17742 posts: राज्य सरकारने एसटी महामंडळात तब्बल १७,७४२ पदांच्या महाभरतीची घोषणा केली आहे. या भरती प्रक्रियेत कंत्राटी तत्त्वावर कार्यरत असलेल्या कर्मचाऱ्यांना कायमस्वरूपी सेवेत प्राधान्य दिले जाणार आहे. 

एसटी महामंडळात १७,७४२ पदांची 'मेगाभरती'!

मुंबई: राज्याची जीवनवाहिनी असलेल्या 'लाल परी'च्या प्रवाशांसाठी आणि नोकरीच्या प्रतीक्षेत असलेल्या तरुणांसाठी एक अतिशय आनंदाची बातमी समोर आली आहे. एसटी महामंडळाचा (MSRTC) कायापालट करण्यासाठी राज्य सरकारने कंबर कसली असून, तब्बल १७ हजार ७४२ पदांच्या महाभरतीची घोषणा परिवहन मंत्री प्रताप सरनाईक यांनी केली आहे.

कोणाला मिळणार संधी?

विधीमंडळात आमदार श्रीकांत भारतीय यांनी विचारलेल्या प्रश्नाला उत्तर देताना मंत्र्यांनी ही माहिती दिली. या भरती प्रक्रियेत सर्वात महत्त्वाचा निर्णय म्हणजे, सध्या कंत्राटी तत्त्वावर कार्यरत असलेल्या कर्मचाऱ्यांना प्रथम प्राधान्य दिले जाणार आहे. २०२२ च्या संपकाळात नियुक्त केलेल्या २,१२५ कंत्राटी चालकांच्या अनुभवाचा विचार करून त्यांना कायमस्वरूपी सेवेत घेण्याची सुवर्णसंधी मिळणार आहे.

५ हजार नवीन बसेसचा ताफा येणार

एसटी महामंडळाला पुन्हा एकदा वैभवाचे दिवस मिळवून देण्यासाठी केवळ कर्मचारीच नव्हे, तर गाड्यांची संख्याही वाढवली जात आहे.

दरवर्षी ५,००० नवीन बसेस खरेदी करण्याचा सरकारचा मानस आहे.

यापैकी ३,००० बसेसची निविदा प्रक्रिया पूर्ण झाली आहे.

टाटा मोटर्सला २,१०० बसेस पुरवण्याचे आदेशही देण्यात आले आहेत.

वाढत्या गाड्यांच्या संख्येमुळे चालक आणि वाहकांची मोठी कमतरता भासत असल्याने ही भरती तातडीने केली जाणार आहे.

भरती प्रक्रिया कधी सुरू होणार?

महाभरतीचा सविस्तर प्रस्ताव सध्या वित्त विभागाकडे (Finance Department) मंजुरीसाठी पाठवण्यात आला आहे. तिथून हिरवा कंदील मिळताच अधिकृत जाहिरात प्रसिद्ध होऊन भरती प्रक्रियेला वेग येईल, असे स्पष्ट करण्यात आले आहे.

महत्त्वाची टीप

कंत्राटी तरुणांना सरकारी नोकरीत सामावून घेण्याच्या या निर्णयामुळे अनेक वर्षांपासून अल्प मानधनावर काम करणाऱ्या कर्मचाऱ्यांना मोठा दिलासा मिळणार आहे.