Diwali ST Fare Hike Cancelled: एसटी महामंडळाने दिवाळीनिमित्त प्रस्तावित १० टक्के हंगामी भाडेवाढ रद्द करण्याचा मोठा निर्णय घेतला आहे. पूरस्थिती आणि आर्थिक अडचणींमुळे त्रस्त असलेल्या जनतेला दिलासा देण्यासाठी सरकारने हा निर्णय घेतला.
मुंबई: दिवाळीच्या तोंडावर महाराष्ट्रातील सर्वसामान्य प्रवाशांसाठी एक दिलासादायक बातमी समोर आली आहे. एसटी महामंडळाने यंदाची 10 टक्के हंगामी भाडेवाढ रद्द करण्याचा मोठा निर्णय घेतला आहे. त्यामुळे ग्रामीण आणि शहरी भागातील लाखो प्रवाशांना दिवाळीमध्ये गावी जाताना अधिकचा खर्च करावा लागणार नाही.
26
भाडेवाढीचा प्रस्ताव रद्द, सरकारचा जनतेच्या भावना ओळखून घेतलेला निर्णय
एसटी महामंडळाने 15 ऑक्टोबर ते 5 नोव्हेंबर 2025 या कालावधीत 10 टक्के हंगामी भाडेवाढ करण्याचा निर्णय घेतला होता. परंतु, या निर्णयामुळे सामान्य जनतेत नाराजीचे वातावरण निर्माण झाले होते.
ग्रामीण भागात एसटी ही लोकांच्या दैनंदिन प्रवासाची मुख्य साधनं आहे. त्यामुळे ही भाडेवाढ केवळ आर्थिक भार वाढवणारी नव्हे, तर जनतेच्या श्रद्धेला धक्का देणारी ठरली असती.
ही परिस्थिती लक्षात घेऊन उपमुख्यमंत्री एकनाथ शिंदे यांनी हस्तक्षेप केला आणि परिवहन विभागाला भाडेवाढ मागे घेण्याचे स्पष्ट निर्देश दिले. त्यानंतर परिवहन मंत्री प्रताप सरनाईक यांनी ही भाडेवाढ रद्द केल्याची अधिकृत घोषणा केली.
36
पूरस्थिती, ओला दुष्काळ आणि आर्थिक अडचणींचा विचार
सध्या राज्यातील अनेक भागांत अतिवृष्टी आणि ओल्या दुष्काळामुळे गंभीर परिस्थिती निर्माण झाली आहे. अनेक शेतकऱ्यांचे नुकसान झाले आहे, घरं उद्ध्वस्त झाली आहेत आणि अनेक कुटुंबं अडचणीत सापडली आहेत. अशा स्थितीत एसटीची भाडेवाढ ही जनतेसाठी अति बोचरी ठरली असती. सरकारने हे भान राखत सामाजिक संवेदनशीलतेचे दर्शन घडवले आहे.
दरवर्षी दिवाळीच्या काळात एसटी महामंडळ हंगामी भाडेवाढ करून सुमारे ३० कोटी रुपयांचा अतिरिक्त महसूल मिळवतो. पण यंदा, माणुसकीच्या निकषावर निर्णय घेत, महसूलाच्या मागे न धावता जनतेचा विचार केंद्रस्थानी ठेवण्यात आला आहे. उपमुख्यमंत्री एकनाथ शिंदे म्हणाले, “राज्यातील पूरस्थिती आणि अडचणी पाहता, एसटी महामंडळाने यंदा अपवादस्वरूप 10% हंगामी भाडेवाढ रद्द करण्याचा निर्णय घ्यावा, अशी सूचना परिवहन विभागाला केली होती.”
56
सामान्यांसाठी दिवाळी अधिक गोड!
या निर्णयामुळे लाखो प्रवाशांना दिवाळीच्या काळात नेहमीच्या दरात प्रवास करण्याची सुविधा मिळणार आहे. ग्रामीण भागातील नागरिक, शेतकरी आणि कामगार वर्ग यांना यातून मोठा दिलासा मिळणार आहे.
दिवाळीसारख्या आनंदाच्या सणात आर्थिक भार न वाढवता सरकारने सामान्यांच्या खिशाला दिलासा दिला, ही एक स्वागतार्ह बाब आहे.
हा निर्णय केवळ भाडेवाढ थांबवण्यापुरता मर्यादित नाही, तर तो सरकारच्या जनतेप्रती असलेल्या बांधिलकीचा आणि सामाजिक उत्तरदायित्वाचा दाखला आहे. एसटी महामंडळाच्या या निर्णयामुळे अनेक घरांच्या दिवाळीत खरा प्रकाश पडणार आहे.
