MHADA Lottery 2025: दिवाळीपूर्वी हजारो स्वप्नांना मिळणार घर, कोकण मंडळाची लॉटरी काही तासांवर

MHADA Lottery 2025: म्हाडा कोकण विभागाची ५,३५४ घरांसाठीची लॉटरी ११ ऑक्टोबर रोजी जाहीर होणार आहे. ठाणे, नेरुळ, डोंबिवली अशा मोक्याच्या ठिकाणी बाजारभावापेक्षा कमी दरात घरे उपलब्ध असल्याने १.५७ लाखांहून अधिक अर्जदारांमध्ये मोठी उत्सुकता आहे. 

दिवाळीपूर्वी हजारो स्वप्नांना मिळणार घर

ठाणे: दिवाळीच्या रोषणाईत यंदा ५,३५४ कुटुंबांच्या आयुष्यात खराखुरा प्रकाश पडणार आहे! म्हाडा कोकण विभागाच्या बहुप्रतीक्षित घरांच्या लॉटरीस आता फक्त काही तासच उरले आहेत, आणि हजारो अर्जदारांच्या मनात आशा, उत्सुकता आणि थोडीशी धडधड निर्माण झाली आहे.

काय आहे आकडेवारी?

एकूण घरे – ५,३५४

एकूण अर्ज – १,८४,९९४

अनामत रकमेसह पात्र अर्जदार – १,५७,४२४

घर मिळण्याची शक्यता – केवळ ३ टक्के अर्जदारांना!

कोठे आहेत ही घरे?

या घरांचा समावेश कोकणातील ठाणे, वसई, पालघर, डोंबिवली, नेरुळ (नवी मुंबई), सिंधुदुर्ग (ओरोस), अंबरनाथ, बदलापूर अशा मोठ्या आणि मोक्याच्या भागांमध्ये आहे. यात काही घरे प्रसिद्ध बिल्डर्सनी बांधलेली असून, अनेक घरांची जागा अत्यंत महागड्या परिसरात आहे.

उदाहरणार्थ:

पाम बीच रोड, नेरुळ – स्टेशनलगत लक्झरी अपार्टमेंट

रुनवाल, लोढा प्रोजेक्ट – डोंबिवली

बाळकूम, ठाणे

वसई व पालघरमधील मुख्य लोकेशन्स 

कोणत्या योजनांतर्गत आहेत ही घरे?

योजना सदनिकांची संख्या

विखुरलेल्या सदनिका योजना 1,746

50% परवडणाऱ्या सदनिका 41

15% एकात्मिक शहर गृहनिर्माण योजना 3,002

20% सर्वसमावेशक योजना 565

याशिवाय, सिंधुदुर्ग (ओरोस) व बदलापूर-कुळगाव येथे ७७ भूखंडांची विक्री होणार आहे.

बाजारभाव विरुद्ध म्हाडा दर

जिथे 1RK/1BHK घरांची किंमत ३०-४५ लाख, आणि 2BHK साठी ६० लाख ते १ कोटी रुपये आहे, तिथे म्हाडा ही घरे १८ लाखांपासून ८४ लाखांपर्यंत विकत आहे. त्यामुळे सामान्य नागरिकांनाही लक्झरी परिसरात राहण्याची संधी मिळणार आहे.

घर नशिबाचं, पण आशा सोडू नका!

इतकी मोठी स्पर्धा असूनही, हे ५,३५४ नशीबवान जण दिवाळीपूर्वीच आपले 'स्वप्नील घर' मिळवून उत्सव साजरा करतील. वर्षानुवर्षे चाळीत, सार्वजनिक शौचालयांच्या समस्यांमध्ये अडकलेल्या हजारो कुटुंबांना आता निवांत, स्वच्छ आणि सुरक्षित घर मिळवण्याची आशा आहे. 

कधी आणि कुठे?

सोडत तारीख: ११ ऑक्टोबर (शनिवार)

ठिकाण: डॉ. काशिनाथ घाणेकर नाट्यगृह, ठाणे

शेवटचा सल्ला

जर तुम्ही अर्ज केला असेल, तर लॉटरीची थेट सोडत ऑनलाइन आणि ऑफलाइन पाहणे नक्कीच विसरू नका. आणि पुढील वर्षीची तयारी आधीच करा कारण अशा संधी वारंवार येत नाहीत!