Maharashtra Weather : उत्तर भारतात थंडीचा कडाका, महाराष्ट्रात ढगाळ वातावरणामुळे गारठ्यात चढउतार

Maharashtra Weather : उत्तर भारतात कडाक्याच्या थंडीने जनजीवन विस्कळीत झाले असून IMDने अनेक राज्यांना थंडीच्या लाटेचा इशारा दिला आहे. महाराष्ट्रात मात्र ढगाळ वातावरणामुळे गारठ्यात चढउतार होत असून धुळे येथे राज्यातील सर्वात कमी तापमानाची नोंद झाली आहे.

Maharashtra Weather : देशभरात थंडीने जोर पकडला असून उत्तर भारतात कडाक्याच्या थंडीचा इशारा भारतीय हवामान विभागाने दिला आहे. अनेक उत्तरेकडील राज्यांमध्ये तापमान सातत्याने घसरत असून थंडीच्या लाटेमुळे जनजीवन विस्कळीत झाले आहे. त्याचवेळी महाराष्ट्रात मात्र ढगाळ वातावरणामुळे गारठ्यात चढउतार होत असल्याचे चित्र दिसून येत आहे.

-उत्तर भारतात थंडीची लाट, IMDचा मोठा इशारा

उत्तर भारतातील उत्तर प्रदेश, पंजाब, हरियाणा, राजस्थान, जम्मू-काश्मीर आणि हिमाचल प्रदेश या राज्यांमध्ये प्रचंड थंडी वाढली आहे. भारतीय हवामान विभागाने उत्तर प्रदेशातील 17 जिल्ह्यांना थंडीच्या लाटेचा थेट इशारा दिला आहे. सकाळच्या वेळी तापमान मोठ्या प्रमाणात खाली जात असून पुढील काही दिवस ही स्थिती कायम राहण्याचा अंदाज आहे.

 धुके आणि वायू प्रदूषणामुळे नागरिक त्रस्त

थंडीबरोबरच देशातील अनेक भागांत दाट धुके आणि वाढलेले वायू प्रदूषण नागरिकांसाठी डोकेदुखी ठरत आहे. दृश्यता कमी झाल्यामुळे वाहनचालकांना मोठ्या अडचणींचा सामना करावा लागत आहे. वाढलेल्या प्रदूषणामुळे श्वसनासंबंधित आजारांचे प्रमाणही वाढले असून घराबाहेर पडणेही कठीण झाले आहे.

मुंबईसह महाराष्ट्रात थंडीचा प्रभाव कमी

उत्तर भारतात थंडी वाढत असली तरी महाराष्ट्रात सध्या ढगाळ वातावरणामुळे तापमानात वाढ होत आहे. उत्तरेकडून येणाऱ्या थंड वाऱ्यांचा अभाव असल्याने राज्यात अपेक्षित शीतलहरी दाखल झालेल्या नाहीत. मुंबईत सकाळच्या वेळेत हलकी थंडी जाणवत असली तरी संपूर्ण जानेवारीत गारठा कायम राहील, असा अंदाज हवामान विभागाने वर्तवला आहे.

ढगाळ वातावरणामुळे गारठा कमी होण्याची शक्यता

भारतीय हवामान विभागाच्या माहितीनुसार ढगाळ वातावरणामुळे आज राज्यातील काही भागांत गारठा कमी होण्याची शक्यता आहे. तसेच काही ठिकाणी धुके आणि दव पडण्याची शक्यता वर्तवण्यात आली आहे. हवामानातील या बदलांमुळे तापमानात चढउतार जाणवणार आहेत.

धुळे राज्यात सर्वात थंड, 8.5 अंशांची नोंद

महाराष्ट्रात धुळे येथे राज्यातील नीचांकी तापमानाची नोंद झाली असून किमान तापमान 8.5 अंश सेल्सिअस इतके नोंदवले गेले आहे. जळगावमध्ये 9.2 अंश, तर भंडाऱ्यात 10 अंश सेल्सिअस तापमानाची नोंद झाली आहे. सकाळच्या वेळेत गारठा अधिक जाणवत असून दिवसभर ढगाळ वातावरण राहण्याची शक्यता आहे.