Doctor Death 'कोविड रुग्णाला मारून टाका', डॉक्टरचा धक्कादायक ऑडिओ क्लिप व्हायरल; पोलिसांकडून चौकशी सुरू
सार
कोरोनाच्या काळात रुग्णालयातील बेड रिकामा करण्यासाठी रुग्णाला मारुन टाका असे सांगणाऱ्या एका डॉक्टरची ऑडिओ क्लीप सोशल मीडियावर व्हायरल झाली आहे. यामुळे या प्रकरणात महाराष्ट्र पोलिसांकडून अधिक तपास सुरू करण्यात आला आहे.
Maharashtra : वर्ष २०२१ मध्ये कोविड महामारीच्या काळात एका वरिष्ठ डॉक्टरने आपल्या सहकाऱ्याला कोविड रुग्णाला "मारण्यास" सूचित केल्याच्या आरोपावरून महाराष्ट्रातील लातूर जिल्ह्यातील डॉक्टरविरोधात पोलिसांनी चौकशी सुरू केली आहे. हा प्रकार समोर आल्यानंतर संबंधित डॉक्टरांची ऑडिओ क्लिप सोशल मीडियावर मोठ्या प्रमाणावर व्हायरल झाली. या क्लिपमध्ये डॉ. शशिकांत देशपांडे आणि डॉ. शशिकांत डांगे यांच्यातील संवाद ऐकू येतो.
यामध्ये डॉ. देशपांडे एका कोविड रुग्णाचा उल्लेख करत, “कोणालाही आत जाऊ देऊ नका, फक्त त्या महिलेला मारून टाका,” असे म्हणताना ऐकू येतात. त्यावर डॉ. डांगे सावधपणे उत्तर देतात आणि सांगतात की त्या रुग्णाचा ऑक्सिजन सपोर्ट आधीच कमी करण्यात आला आहे. ही रुग्ण होती कौसर फातिमा, वय ४१, जी उदगीरच्या सरकारी कोविड केअर सेंटरमध्ये भरती होती. तिच्यावर दहा दिवस उपचार सुरू होते आणि ती नंतर आजारी अवस्थेतून बरी झाली होती. ऑडिओ क्लिपमध्ये वापरलेली भाषा आणि जातिवाचक अपशब्दांचा उल्लेख करत तिच्या पतीने पोलिसात तक्रार दिली. त्यानुसार २४ मे २०२५ रोजी उदगीर शहर पोलीस ठाण्यात डॉ. देशपांडे यांच्या विरोधात धार्मिक भावना दुखावण्याचा आणि द्वेषभावनेतून केलेल्या कथित वक्तव्याचा दाखला देत एफआयआर नोंदवण्यात आला.
एफआयआरमध्ये म्हटले आहे की, कौसर फातिमा यांना १५ एप्रिल २०२१ रोजी उदगीर येथील रुग्णालयात भरती करण्यात आले होते. नांदेड रोडवरील नेत्र रुग्णालयासमोरील एका इमारतीत तात्पुरते कोविड उपचार केंद्र उभारले गेले होते. त्या ठिकाणी डॉ. डांगे कार्यरत होते. रुग्णालयात दाखल झाल्यानंतर सातव्या दिवशी कौसर फातिमाच्या पतीने डॉक्टर डांगे यांच्याशी संवाद साधला आणि त्यावेळी डॉ. देशपांडे यांचा फोन आला. फोन स्पीकरवर ठेवण्यात आला होता आणि त्यात दोघांमध्ये सुरू असलेल्या रुग्णालय व्यवस्थापनविषयक संभाषणात डॉ. देशपांडे यांनी कथितरित्या वादग्रस्त आणि अपमानास्पद विधाने केली.
पीडित पतीने सांगितले की, पत्नीवर उपचार सुरू असल्याने त्यावेळी गप्प राहणे त्याला योग्य वाटले. मात्र, २ मे २०२५ रोजी ती ऑडिओ क्लिप सोशल मीडियावर आली आणि त्यानंतर त्याच्या धार्मिक भावना दुखावल्याने त्याने अधिकृत तक्रार दाखल केली. पोलिसांनी या प्रकरणी चौकशी सुरू केली असून डॉ. देशपांडे यांचे जबाब नोंदवण्यात आले असून त्यांचा मोबाईल फोनही जप्त करण्यात आला आहे. पोलिस निरीक्षक दिलीप गाडे यांनी सांगितले की, ऑडिओ क्लिपची सत्यता तपासली जात आहे. देशपांडे सध्या जिल्ह्याबाहेर आहेत, पण ते लवकरच परत येणार असून त्यानंतर सखोल चौकशी केली जाईल, असे गाडे यांनी स्पष्ट केले.