Festival Special Trains: दिवाळी, दसरा सणांसाठी रेल्वेची प्रवाशांसाठी खास भेट, तब्बल ९४४ 'फेस्टिव्हल स्पेशल' गाड्या!

Festival Special Trains: दसरा, दिवाळी आणि छटपूजा सणांसाठी रेल्वेने ९४४ अतिरिक्त फेऱ्या चालवण्याचा निर्णय घेतला आहे. मुंबई, पुणे, कोल्हापूरसह अनेक शहरांमधून या गाड्या धावणार असून, प्रवाशांना तिकीट मिळण्यात होणारी अडचण दूर होणार आहे.

मुंबई: सणासुदीच्या दिवसांत आपल्या घरी जाणाऱ्या प्रवाशांसाठी एक आनंदाची बातमी आहे! गणेशोत्सवानंतर आता दसरा, दिवाळी आणि छटपूजा हे मोठे सण येत आहेत. या काळात गावी जाणाऱ्या प्रवाशांची मोठी गर्दी होते आणि त्यांना अनेकदा तिकीट मिळत नाही. प्रवाशांची ही गैरसोय टाळण्यासाठी रेल्वे प्रशासनाने एक महत्त्वपूर्ण निर्णय घेतला आहे.

मध्य रेल्वेने ९४४ अतिरिक्त फेऱ्या चालवण्याचा निर्णय घेतला आहे, ज्यामुळे प्रवाशांना मोठा दिलासा मिळणार आहे. विशेषतः उत्तर भारतात जाणाऱ्या प्रवाशांना याचा अधिक फायदा होईल. मुंबई, पुणे आणि कोल्हापूरसह अनेक प्रमुख शहरांमधून या विशेष गाड्या धावणार आहेत. यापैकी काही महत्त्वाच्या गाड्यांची माहिती खालीलप्रमाणे आहे.

कोल्हापूर ते सीएसएमटी (मुंबई) साप्ताहिक विशेष

कोल्हापूरहून सीएसएमटीकडे: गाडी क्र. ०१४१८ ही गाडी २४ सप्टेंबर ते २६ नोव्हेंबर २०२५ या काळात प्रत्येक बुधवारी रात्री १० वाजता कोल्हापूरहून सुटेल आणि दुसऱ्या दिवशी दुपारी १.३० वाजता सीएसएमटीला पोहोचेल.

सीएसएमटीहून कोल्हापूरकडे: गाडी क्र. ०१४१७ ही गाडी २५ सप्टेंबर ते २७ नोव्हेंबर २०२५ या काळात प्रत्येक गुरुवारी दुपारी २.३० वाजता सीएसएमटीहून सुटेल आणि दुसऱ्या दिवशी पहाटे ४.२० वाजता कोल्हापूरला पोहोचेल.

थांबे: मिरज, सांगली, किर्लोस्कर वाडी, कराड, सातारा, लोणंद, जेजुरी, पुणे, लोणावळा आणि कल्याण.

लोकमान्य टिळक टर्मिनस ते तिरुवनंतपुरम नॉर्थ साप्ताहिक विशेष

एलटीटीहून तिरुवनंतपुरमकडे: गाडी क्र. ०१४६३ ही गाडी २५ सप्टेंबर ते २७ नोव्हेंबर या काळात प्रत्येक गुरुवारी दुपारी ४ वाजता एलटीटीहून सुटेल आणि दुसऱ्या दिवशी रात्री ८.४५ वाजता तिरुवनंतपुरम नॉर्थला पोहोचेल.

तिरुवनंतपुरमहून एलटीटीकडे: गाडी क्र. ०१४६४ ही गाडी २७ सप्टेंबर ते २९ नोव्हेंबर या काळात प्रत्येक शनिवारी तिरुवनंतपुरम नॉर्थहून दुपारी ४.२० वाजता सुटेल आणि दुसऱ्या दिवशी रात्री ९.५० वाजता एलटीटीला पोहोचेल.

थांबे: ठाणे, पनवेल, रोहा, चिपळूण, रत्नागिरी, मडगाव, कारवार, मंगलोर, कालिकट आणि कोल्लम यांसारख्या महत्त्वाच्या स्टेशनवर ही गाडी थांबेल.

पुणे ते हजरत निजामुद्दीन साप्ताहिक सुपरफास्ट विशेष

पुण्याहून हजरत निजामुद्दीनकडे: गाडी क्र. ०१४९१ ही गाडी २६ सप्टेंबर ते २८ नोव्हेंबर या काळात प्रत्येक शुक्रवारी संध्याकाळी ५.३० वाजता पुण्यातून सुटेल आणि दुसऱ्या दिवशी रात्री ८ वाजता हजरत निजामुद्दीनला पोहोचेल.

हजरत निजामुद्दीनहून पुण्याकडे: गाडी क्र. ०१४९२ ही गाडी २७ सप्टेंबर ते २८ नोव्हेंबर या काळात प्रत्येक शनिवारी रात्री ९.२५ वाजता हजरत निजामुद्दीनहून सुटेल आणि दुसऱ्या दिवशी रात्री ११.५५ वाजता पुण्याला पोहोचेल.

थांबे: लोणावळा, कल्याण, वसई रोड, वापी, सूरत, वडोदरा, रतलाम, कोटा आणि मथुरा या प्रमुख स्टेशनवर ही गाडी थांबेल.

लोकमान्य टिळक टर्मिनस ते सावंतवाडी रोड साप्ताहिक विशेष

एलटीटीहून सावंतवाडीकडे: गाडी क्र. ०११७९ ही गाडी १७ ऑक्टोबर ते ७ नोव्हेंबर या काळात प्रत्येक शुक्रवारी सकाळी ८.२० वाजता एलटीटीहून सुटेल आणि त्याच दिवशी रात्री ९ वाजता सावंतवाडी रोडला पोहोचेल.

सावंतवाडीहून एलटीटीकडे: गाडी क्र. ०११८० ही गाडी १७ ऑक्टोबर ते ७ नोव्हेंबर या काळात प्रत्येक शुक्रवारी रात्री १०.२० वाजता सावंतवाडी रोडहून सुटेल आणि दुसऱ्या दिवशी सकाळी १०.४० वाजता एलटीटीला पोहोचेल.

थांबे: ठाणे, पनवेल, रोहा, चिपळूण, रत्नागिरी, वैभववाडी रोड, कणकवली आणि कुडाळ.

सीएसएमटी ते गोरखपूर विशेष ट्रेन

सीएसएमटीहून गोरखपूरकडे: गाडी क्र. ०१७९ ही गाडी २६ सप्टेंबर ते ३० नोव्हेंबर या काळात दररोज रात्री १०.३० वाजता सीएसएमटीहून सुटेल आणि तिसऱ्या दिवशी सकाळी १० वाजता गोरखपूरला पोहोचेल.

गोरखपूरहून सीएसएमटीकडे: गाडी क्र. ०१०८० ही गाडी २८ सप्टेंबर ते २ डिसेंबर या काळात दररोज दुपारी २.३० वाजता गोरखपूरहून सुटेल आणि तिसऱ्या दिवशी रात्री १२.४० वाजता सीएसएमटीला पोहोचेल.

थांबे: दादर, ठाणे, कल्याण, नाशिक, मनमाड, जळगाव, भुसावळ, भोपाळ, कानपूर सेंट्रल, लखनऊ आणि बस्ती.

या व्यतिरिक्त इतर विशेष गाड्यांची सविस्तर माहिती तुम्ही रेल्वेच्या अधिकृत वेबसाईटवर पाहू शकता. या गाड्यांमुळे तुमचे सण अधिक आनंददायी होतील आणि प्रवासात कोणतीही अडचण येणार नाही.