World Heart Day 2025 : प्रत्येक वर्षी 29 सप्टेंबरला वर्ल्ड हार्ट डे साजरा केला जातो. जेणेकरुन नागरिकांना हृदयाच्या आरोग्याप्रति जागृक करता येईल. सध्याच्या काळात हृदयासंबंधित समस्या अधिक वाढल्या गेल्या आहेत. अशातच हृदयाचे आरोग्य राखण्यासाठी टिप्स.
हृदय हा आपल्या शरीराचा सर्वात महत्त्वाचा अवयव आहे. रक्ताभिसरणाची जबाबदारी सांभाळणाऱ्या या अवयवाची काळजी घेणे म्हणजे दीर्घायुष्य आणि निरोगी जीवनाचे गुपित होय. बदलत्या जीवनशैलीमुळे हृदयविकाराचे प्रमाण वाढताना दिसत आहे. त्यामुळे दररोजच्या आयुष्यात काही सकारात्मक सवयी अंगीकारल्यास हृदय मजबूत राहू शकते.
26
संतुलित आणि पौष्टिक आहार
हृदयाच्या आरोग्यासाठी योग्य आहार हा पहिला टप्पा आहे. जास्त प्रमाणात तेलकट, तळलेले, प्रक्रियायुक्त (प्रोसेस्ड) अन्न टाळणे महत्त्वाचे आहे. आहारामध्ये फळे, भाज्या, पूर्ण धान्ये, डाळी, कमी चरबीयुक्त दुग्धजन्य पदार्थ, सुकेमेवे आणि ओमेगा-३ फॅटी ऍसिडयुक्त मासे यांचा समावेश केल्याने हृदय बळकट राहते. तसेच मीठ आणि साखरेचे प्रमाण मर्यादित ठेवणे गरजेचे आहे. योग्य प्रमाणात पाणी पिणे आणि पचायला हलका आहार घेणे हृदयाला फायदेशीर ठरते.
36
नियमित व्यायाम आणि सक्रिय जीवनशैली
शारीरिक क्रियाशीलता हृदयासाठी औषधासारखी काम करते. दररोज किमान ३० मिनिटे चालणे, धावणे, सायकलिंग किंवा योगासने करणं हृदयाच्या स्नायूंना बळकट करते. दीर्घकाळ बसून राहण्याची सवय टाळणे आवश्यक आहे. जिना चढणे, थोड्या अंतरासाठी वाहनाऐवजी चालणे अशा छोट्या सवयी देखील हृदयाच्या आरोग्यासाठी उपयुक्त ठरतात. नियमित व्यायामामुळे रक्तदाब नियंत्रणात राहतो आणि शरीरातील जास्तीचे चरबीचे प्रमाण कमी होते.
आधुनिक जीवनशैलीत ताणतणाव हा मोठा शत्रू ठरतो. मानसिक तणाव थेट हृदयावर परिणाम करतो. ध्यान, प्राणायाम, श्वसनक्रिया, वाचन किंवा छंद जोपासणे यामुळे मन शांत राहते आणि तणाव कमी होतो. पुरेशी झोप घेणेही तितकेच महत्त्वाचे आहे. झोपेची कमतरता ही हृदयविकारासाठी एक महत्त्वाचा धोका ठरू शकते.
56
धूम्रपान आणि मद्यपान टाळणे
धूम्रपान व जास्त मद्यपान या सवयी हृदयविकाराला आमंत्रण देतात. सिगारेटमधील निकोटीन रक्तवाहिन्या अरुंद करून रक्ताभिसरणावर परिणाम करतो. तर मद्याचे अति सेवन रक्तदाब वाढवते आणि हृदयाचे स्नायू कमकुवत करतो. त्यामुळे या सवयींपासून दूर राहणे हृदयाच्या आरोग्यासाठी अत्यावश्यक आहे.
66
नियमित आरोग्य तपासणी
हृदयविकाराच्या दृष्टीने उच्च रक्तदाब, मधुमेह आणि स्थूलता हे महत्त्वाचे जोखीम घटक आहेत. त्यामुळे नियमित रक्तदाब, शुगर, कोलेस्ट्रॉल तपासून घेणे आवश्यक आहे. लवकर निदान आणि योग्य उपचाराने हृदयविकाराचे गंभीर परिणाम टाळता येतात. स्वतःच्या आरोग्याबाबत जागरूक राहणे ही सर्वात महत्त्वाची सवय आहे.
(Disclaimer : सदर लेख केवळ सामान्य माहिती देण्याकरिता आहे. Asianet News या माहितीची जबाबदारी घेत नाही. अधिक माहितीसाठी आपण तज्ज्ञ किंवा आपल्या ओळखीच्या डॉक्टरांचा सल्ला घ्यावा.)
