Hyderabad Murder: हैदराबादमध्ये कपड्यांच्या दुकानात घुसून महिला कर्मचाऱ्याची हत्या; माजी कर्मचारी अटकेत

शनिवारी रात्री ९.४० च्या सुमारास आरोपीने दुकानात घुसून महिलेवर चाकूने सपासप वार केले. रक्ताच्या थारोळ्यात पडलेल्या या महिलेला तातडीने रुग्णालयात नेण्यात आले, पण तिचा जीव वाचू शकला नाही.

हैदराबाद: हैदराबादमध्ये एका धक्कादायक घटनेत कपड्यांच्या दुकानात काम करणाऱ्या एका महिलेची चाकू भोसकून हत्या करण्यात आली आहे. याच दुकानात आधी काम करणाऱ्या एका माजी कर्मचाऱ्यानेच हा खून केलाय. पोलिसांनी आरोपीला ताब्यात घेतलं आहे.

ही घटना हैदराबादच्या आझमपुरा भागातील 'मन्हा' (Manha) नावाच्या कपड्यांच्या दुकानात शनिवारी रात्री घडली. चंचलगुडा येथे राहणारी ३५ वर्षीय ताहिरा बानू या होलसेल कपड्यांच्या दुकानात काम करत होती. मोहम्मद इब्राहिम नावाच्या माजी कर्मचाऱ्याने तिची हत्या केली.

पोलिसांनी दिलेल्या माहितीनुसार, शनिवारी रात्री ९.४० च्या सुमारास आरोपी इब्राहिम दुकानात घुसला. त्याने सोबत आणलेल्या चाकूने ताहिरावर सपासप वार केले. गंभीर जखमी झालेल्या ताहिराला लगेचच रुग्णालयात दाखल करण्यात आलं, पण उपचारापूर्वीच तिचा मृत्यू झाला. या घटनेनंतर पोलिसांनी आरोपी मोहम्मद इब्राहिमला लगेचच ताब्यात घेतलं.

आरोपीने पोलिसांना दिलेल्या जबाबात सांगितलं की, एकत्र काम करत असताना त्याचे आणि ताहिराचे प्रेमसंबंध होते. पण नंतर ताहिराने त्याच्यापासून दुरावा निर्माण केला, याच रागातून त्याने तिची हत्या केली. आरोपी मोहम्मद इब्राहिम हा विवाहित असून त्याला दोन मुले आहेत. पोलिसांनी स्पष्ट केलंय की, ते आरोपीच्या जबाबाची पडताळणी करत आहेत आणि हत्येचं नेमकं कारण अद्याप अधिकृतपणे निश्चित झालेलं नाही.

दरम्यान, लोकांच्या संतापाचा भडका उडून आरोपीवर हल्ला होण्याची शक्यता असल्याने, सुरक्षेच्या कारणास्तव त्याला मलकपेठ (Malakpet) पोलीस ठाण्यात हलवण्यात आलं आहे.