Apple Smoothie For Weight Loss: वजन कमी करायचंय? मग डायटमध्ये 'ही' खास स्मूदी नक्की ट्राय करा

सफरचंदात भरपूर फायबर आणि पाणी असतं, ज्यामुळे पोट भरलेलं राहतं. शिवाय, जास्तीच्या कॅलरीज न वाढवता भूक कंट्रोल करायलाही याची खूप मदत होते.

सफरचंद हे फायबर आणि जीवनसत्त्वांचा (व्हिटॅमिन्स) उत्तम स्रोत आहे. रोज सफरचंद खाल्ल्याने शरीराचा वाढलेला बीएमआय (BMI) कमी व्हायला मदत होते. यात पेक्टिन नावाचं फायबर आणि पॉलिफेनोल्स, क्वेर्सेटिनसारखे अँटीऑक्सिडंट्स असतात. हे घटक शरीरातील खराब कोलेस्ट्रॉल (LDL) कमी करतात. याशिवाय ब्लड प्रेशर कंट्रोलमध्ये ठेवून हृदयविकार आणि स्ट्रोकचा धोकाही टाळतात.

सफरचंदात पाण्याचा अंश आणि फायबर भरपूर असतं. त्यामुळे ते खाल्ल्यावर खूप वेळ पोट भरल्यासारखं वाटतं आणि पचनक्रियाही संथ होते. सर्वात महत्त्वाचं म्हणजे, शरीरात जास्तीच्या कॅलरीज न वाढवता सतत लागणारी भूक कंट्रोल करायला याची मदत होते. जर तुम्ही वजन कमी करण्याचा विचार करत असाल, तर तुमच्या डायटमध्ये सफरचंदाच्या स्मूदीचा नक्की समावेश करा.

स्मूदी बनवण्यासाठी लागणारे साहित्य:

२ सफरचंद (बारीक चिरलेले)

३ कप दूध

वेलची पूड (चवीनुसार)

साखर (आवडीनुसार)

बर्फाचे तुकडे

कृती:

सगळ्यात आधी सफरचंद स्वच्छ धुवून घ्या. त्याची साल आणि बिया काढून छोटे तुकडे करा. आता मिक्सरच्या भांड्यात सफरचंदाचे तुकडे, आवडीनुसार साखर आणि ३ कप दूध घालून छान वाटून घ्या. या तयार मिश्रणात थोडी वेलची पूड घाला आणि एका बाऊलमध्ये काढून घ्या. सर्व्ह करताना एका ग्लासमध्ये थोडे ड्रायफ्रुट्स (नट्स) घाला, त्यावर ही तयार स्मूदी ओता आणि बर्फाचे तुकडे टाकून थंडगार स्मूदीचा आस्वाद घ्या.