Masala Bread : शिळ्या ब्रेडचं काय करायचं? बनवा झटपट कुरकुरीत मसाला ब्रेड, वाचा सोपी रेसिपी संपूर्ण

घरात शिळा ब्रेड उरलाय का? त्याला फेकून देण्याऐवजी एक चविष्ट आणि कुरकुरीत मसाला ब्रेड बनवून नवा लुक द्या. मसालेदार चवीचा हा पदार्थ बनवायला सोपा असून नाश्त्यासाठी एक झटपट आणि पोटभरीचा पर्याय आहे.

Bread Tips: सकाळची ऑफिस आणि शाळेची घाई खरी असते. रोज पराठे बनवणं एक मोठं काम आहे आणि रोज-रोज जॅमसोबत ब्रेड खाऊनही कंटाळा येतो. आणि कालच्या ब्रेडचं काय, जो थोडा वातड झालाय? तो फेकून देण्याचा विचार करत आहात का? अजिबात नाही!

तुम्ही त्याच शिळ्या ब्रेडचा वापर करून रेस्टॉरंटसारखा कुरकुरीत आणि चटपटीत मसाला ब्रेड उपमा बनवू शकता. कांदा, टोमॅटो आणि कढीपत्त्याचा सुगंध घरभर पसरेल आणि चवीला तर तो अप्रतिमच लागतो. चला तर मग, जाणून घेऊया ही रेसिपी.

साहित्य:

• ब्रेड - ६ स्लाइस (छोटे चौकोनी तुकडे केलेले)
• कांदा - १ (बारीक चिरलेला)
• टोमॅटो - १ (बारीक चिरलेला)
• हिरवी मिरची - १ (चिरलेली)
• मोहरी - १ चमचा
• कढीपत्ता - ८-१० पानं
• शेंगदाणे - २ मोठे चमचे
• हळद - अर्धा चमचा
• तेल - १ मोठा चमचा
• मीठ - चवीनुसार
• लिंबाचा रस - १ चमचा
• चिरलेली कोथिंबीर - सजावटीसाठी

कृती:

• सर्वात आधी एका पॅनमध्ये तेल गरम करा. त्यात मोहरी, कढीपत्ता आणि शेंगदाणे घाला. शेंगदाणे हलके सोनेरी होईपर्यंत तळा.
• आता चिरलेला कांदा आणि हिरवी मिरची घालून कांदा पारदर्शक होईपर्यंत परता.
• यानंतर टोमॅटो, हळद आणि चवीनुसार मीठ घाला. टोमॅटो मऊ होईपर्यंत आणि मसाल्यातून तेल सुटेपर्यंत हे मिश्रण शिजवा.
• आता ब्रेडचे तुकडे घालण्याची वेळ आली आहे. सर्व काही अगदी हलक्या हाताने मिक्स करा, जेणेकरून मसाला ब्रेडच्या सर्व तुकड्यांना लागेल पण ते तुटणार नाहीत.
• गॅस बंद करा. उपम्यावर लिंबाचा रस पिळा आणि वरून चिरलेली कोथिंबीर पेरा.

आणि झालं! तुमचा गरमागरम मसाला ब्रेड उपमा तयार आहे. आणखी चव वाढवण्यासाठी तुम्ही वरून किसलेलं ओलं खोबरंही घालू शकता. फक्त १५ मिनिटांत तयार होणारा हा नाश्ता चहासोबत एकदम मस्त लागतो. एकदा करून बघितलात की रोज बनवण्याचा मोह आवरणार नाही. आजच करून बघा!