Fat Loss : कॉफी पिऊन खरंच चरबी कमी होते का? जाणून घ्या काय सांगतोय अभ्यास

कॉफीमध्ये कॅफीन नावाचा घटक असतो, जो आपल्या मज्जासंस्थेवर आणि मेटाबॉलिझमवर परिणाम करतो. पूर्वीच्या संशोधनातून असं दिसून आलंय की कॅफीनमुळे ऊर्जा वापर वाढतो, भूक कमी होते आणि चरबी पचायला मदत होते.

मुंबई : कॉफी हे जगातल्या सगळ्यात लोकप्रिय पेयांपैकी एक आहे. आता एका नवीन अभ्यासानुसार, जे लोक जास्त कॉफी पितात, त्यांच्या शरीरातील एकूण चरबी आणि पोटावरची चरबी (बेली फॅट) कमी असते. फिनलँडमधील 'युनिव्हर्सिटी ऑफ औलू'च्या संशोधकांनी हा निष्कर्ष काढला आहे. यासाठी त्यांनी 'नॉर्दन फिनलँड बर्थ कोहोर्ट 1966' या अभ्यासाचा भाग असलेल्या 46 वर्षांच्या 2264 लोकांच्या डेटाचं विश्लेषण केलं.

कॉफीमध्ये कॅफीन नावाचा घटक असतो, जो आपल्या मज्जासंस्थेवर (Nervous System) आणि एनर्जी मेटाबॉलिझमवर परिणाम करतो. याआधीच्या संशोधनातूनही असं समोर आलं आहे की, कॅफीनमुळे शरीरातील ऊर्जेचा वापर वाढतो, भूक नियंत्रणात राहते आणि चरबी पचवण्याच्या प्रक्रियेवरही (Fat Metabolism) त्याचा प्रभाव पडतो.

या नवीन अभ्यासाने आधीच्या संशोधनाला आणखी बळकटी दिली आहे. नियमित कॉफी पिण्याचा संबंध शरीरातील कमी चरबीशी जोडला गेला आहे. संशोधकांच्या मते, जे लोक नियमितपणे कॉफी पितात, त्यांच्यात बॉडी-फॅटचं प्रमाण कमी, व्हिसरल फॅट (म्हणजे अवयवांभोवती जमा होणारी चरबी) कमी आणि हाडं व स्नायूंचं वस्तुमान (Bone-Muscle Mass) जास्त असल्याचं दिसून आलं.

साखर न घालता ब्लॅक कॉफी प्यायल्यास वजन कमी करण्यासाठी मदत होऊ शकते. यातील कॅफीनमुळे मेटाबॉलिझम तात्पुरता वाढतो, चरबी वितळण्याची प्रक्रिया वेगाने होते आणि भूक कमी होण्यासही मदत मिळते. पण, जर तुम्ही त्यात साखर, क्रीम किंवा सिरप टाकलं, तर कॅलरीज वाढतात आणि कॉफीचे हे फायदे नाहीसे होतात.

दिवसातून 1 ते 3 कप कॉफी पिणं साधारणपणे सुरक्षित मानलं जातं. इतकंच नाही, तर यामुळे किडनीच्या आरोग्यालाही फायदा होऊ शकतो. पण, प्रमाणापेक्षा जास्त कॉफी प्यायल्यास रक्तदाब (Blood Pressure) किंवा पोटॅशियमची पातळी वाढण्याचा धोका असतो.