Toothpaste Brands : कोलगेट, क्लोजअप, ओरल-बी... हे सगळे भारतीय ब्रँड्स आहेत असं तुम्हाला वाटतं का?

सकाळी उठल्यावर आपण सर्वात आधी ब्रशवर टूथपेस्ट घेतो. आपल्या घरात कोलगेट, क्लोजअप आणि ओरल-बी हे ब्रँड्स हमखास दिसतात. आपल्यापैकी अनेकांना हे ब्रँड्स भारतीयच वाटतात. पण तुम्हाला माहितीये का, हे ब्रँड्स मूळचे भारताचे नाहीत.

कोलगेट... साबणाच्या व्यवसायापासून टूथपेस्टपर्यंत

विल्यम कोलगेट यांनी १८०६ मध्ये अमेरिकेत साबण आणि मेणबत्त्यांचा व्यवसाय सुरू केला. कोलगेटने १८७३ मध्ये बरण्यांमधून टूथपेस्ट विकायला सुरुवात केली. त्यानंतर १८९६ मध्ये त्यांनी ट्यूबच्या स्वरूपात टूथपेस्ट बाजारात आणली. या ब्रँडने १९३७ मध्ये भारतात पाऊल ठेवले. जाहिराती आणि भक्कम वितरण व्यवस्थेच्या जोरावर कोलगेटने लोकांच्या मनात घर केले. अनेक दशकांचा विश्वास हीच या ब्रँडची ताकद आहे.

क्लोजअप... तरुणाईला भुरळ घालणारी जेल टूथपेस्ट

अमेरिकेत १९६७ मध्ये क्लोजअपची सुरुवात झाली. सामान्य टूथपेस्टपेक्षा वेगळ्या अशा जेलच्या रूपात हा ब्रँड बाजारात आला. त्यांनी ताज्या श्वासावर आणि आत्मविश्वासावर लक्ष केंद्रित केले. खास तरुणांना आकर्षित करणाऱ्या जाहिरातींमुळे क्लोजअपने स्वतःची वेगळी ओळख निर्माण केली. सध्या हा ब्रँड ब्रिटनच्या युनिलिव्हर कंपनीच्या मालकीचा आहे.

ओरल-बी... टूथब्रशपासून सुरू झालेला प्रवास

अमेरिकन दंतवैद्य डॉ. रॉबर्ट हट्सन यांनी १९४९ च्या शेवटी ओरल-बी ब्रँड सुरू केला. मऊ नायलॉनचे केस असलेल्या टूथब्रशमुळे या ब्रँडला मोठी ओळख मिळाली. जिलेट कंपनीने १९८४ मध्ये हा ब्रँड विकत घेतला. त्यानंतर तो प्रॉक्टर अँड गॅम्बल (P&G) कंपनीच्या मालकीचा झाला. आज ओरल-बी सामान्य ब्रशसोबतच इलेक्ट्रिक ब्रश आणि इतर दंत काळजी उत्पादने विकते.

भारतात हे ब्रँड्स इतके कसे रुजले?

या ब्रँड्सच्या यशाचे मुख्य कारण म्हणजे त्यांचे उत्तम मार्केटिंग आणि सहज उपलब्धता. शहरांपासून ते अगदी खेड्यापाड्यांपर्यंत उत्पादने पोहोचवण्यासाठी त्यांनी भक्कम वितरण व्यवस्था उभी केली. टीव्हीवरील जाहिराती आणि ब्रँड कॅम्पेनच्या माध्यमातून ते ग्राहकांपर्यंत पोहोचले. तोंडाच्या स्वच्छतेबद्दल वाढलेली जागरूकता देखील त्यांच्या मार्केट विस्तारासाठी फायदेशीर ठरली.

यांच्या व्यावसायिक यशाचे रहस्य काय?

ग्राहकांचा विश्वास, वेगळी ओळख आणि भक्कम वितरण व्यवस्था ही या कंपन्यांच्या यशाची गुरुकिल्ली आहे. बदलत्या काळानुसार त्यांनी नवीन उत्पादने बाजारात आणली. वेगवेगळ्या किमती आणि आकारात उत्पादने देऊन त्यांनी जास्तीत जास्त ग्राहकांना जोडले. कोलगेट, क्लोजअप आणि ओरल-बी या एकाच कंपनीच्या मालकीच्या नाहीत. परदेशी ब्रँड्सनी स्थानिक मार्केट समजून घेतले आणि ग्राहकांचा विश्वास जिंकला, तर ते किती मोठे यश मिळवू शकतात, हे या प्रवासातून सिद्ध होते.