Medicine Mistakes : गोळ्या घेताना किती पाणी प्यावं? या चुका अजिबात करू नका

आजारी पडल्यावर आपण वेळेवर औषधं घेतो. पण ती घेण्याची पद्धत चुकली तर? गोळ्या घेताना नकळत होणाऱ्या चुकांमुळे औषधांचा प्रभाव कमी होऊ शकतो.

औषधं कशी घ्यावीत?

डॉक्टर देतात ती औषधं आपण वेळेवर घेतो. पण ती कशी घ्यावीत, याकडे आपलं लक्ष नसतं. गोळी कशासोबत घ्यावी, किती पाणी प्यावं आणि गोळी घेतल्यावर लगेच झोपावं का? या छोट्या वाटणाऱ्या गोष्टी खूप महत्त्वाच्या आहेत. औषधं घेताना कोणत्या चुका टाळल्या पाहिजेत?

किती पाणी प्यावं?

गोळ्या किंवा कॅप्सूल नेहमी साध्या पाण्यासोबतच घ्या. तुम्ही भरपूर पाणी प्यायल्यास गोळी घशात किंवा अन्ननलिकेत न अडकता थेट पोटात जाते. कमी पाण्यासोबत गोळी गिळली, तर ती अन्ननलिकेत अडकण्याचा धोका असतो. यामुळे घशात जळजळ किंवा वेदना होऊ शकतात. काही औषधांमुळे अन्ननलिका आणि पोटाच्या आतील थराला त्रास होऊ शकतो, त्यामुळे पाण्याचे प्रमाण महत्त्वाचे ठरते.

गोळी सहज पोटात जावी यासाठी नेहमी पुरेसं पाणी प्या. तज्ज्ञांच्या मते, ६० मिली पेक्षा कमी पाण्यासोबत गोळी घेतल्यास काही वेळा त्रास होऊ शकतो. तरीही, औषधाच्या कव्हरवर दिलेल्या सूचना किंवा डॉक्टरांचा सल्ला नेहमी पाळा.

चहा, दुधासोबत औषधं घ्यावीत का?

अनेकांना चहा, कॉफी किंवा दुधासोबत औषधं घेण्याची सवय असते. पण दूध आणि चहामुळे काही औषधांचा शरीरावरील प्रभाव कमी होतो. त्यामुळे डॉक्टरांनी सांगितल्याशिवाय औषधं साध्या पाण्यासोबतच घ्या.

इतर महत्त्वाच्या गोष्टी: गोळी गिळल्यावर लगेच झोपू नका. यामुळे गोळी अन्ननलिकेत अडकून जळजळ होऊ शकते.

गोळ्या तोडून खाऊ नका - गोळी मोठी आहे म्हणून ती तोडून किंवा कॅप्सूल उघडून खाऊ नका. काही गोळ्या शरीरात विशिष्ट पद्धतीने विरघळण्यासाठी बनवलेल्या असतात. त्यामुळे डॉक्टर किंवा फार्मासिस्टच्या सल्ल्याशिवाय यात बदल करू नका.

तुमच्या या छोट्या सवयी औषधांच्या प्रभावावर मोठा परिणाम करू शकतात. त्यामुळे गोळ्या घेण्याची वेळ आणि पद्धत यावर लक्ष द्या.