Nita Ambani Fitness : 63व्या वर्षीही नीता अंबानी इतक्या फिट कशा? त्यांचं डाएट आणि वर्कआऊटचं सिक्रेट

रिलायन्स फाउंडेशनच्या अध्यक्षा नीता अंबानी यांनी नुकतीच वयाची ६३ वर्षे पूर्ण केली आहेत. या वयातही त्या स्वतःला फिट ठेवण्यासाठी आठवड्यातून ५-६ दिवस व्यायाम, योगा, पोहणे आणि डान्स करतात. शाकाहारी जेवण आणि साखरेपासून दूर राहणे हा त्यांच्या फिटनेसचा मुख्य मंत्र आहे.

मुंबई : रिलायन्स फाउंडेशनच्या अध्यक्षा आणि प्रसिद्ध उद्योजिका नीता अंबानी यांनी १ नोव्हेंबरला आपला ६३ वा वाढदिवस साजरा केला. वय वाढत असलं तरी त्यांचा उत्साह आणि फिटनेस तरुणांनाही लाजवेल असाच आहे. त्यांच्या या फिटनेसची सध्या सगळीकडे चर्चा सुरू आहे. नियमित व्यायाम, संतुलित शाकाहारी आहार आणि शारीरिक हालचालींवर त्या सर्वात जास्त भर देतात.

६३ व्या वर्षीही नीता अंबानींचा फिटनेस: काय आहे त्यांच्या वर्कआऊट आणि डाएटचं सिक्रेट?

आठवड्यातून ५ ते ६ दिवस व्यायाम

नीता अंबानी यांनी याआधी एका मुलाखतीत सांगितलं होतं की, त्या आठवड्यातून पाच ते सहा दिवस न चुकता व्यायाम करतात. रोज एकच व्यायाम करण्याऐवजी त्या शरीराच्या वेगवेगळ्या भागांवर लक्ष केंद्रित करतात. पायांचे स्नायू बळकट करणे, अप्पर बॉडी स्ट्रेंथ आणि पाठीच्या व्यायामाचा त्यांच्या रुटीनमध्ये समावेश असतो.

पायांना बळकटी देणारा व्यायाम करायला त्यांना सर्वात जास्त आवडतं. याचं मुख्य कारण म्हणजे त्यांना लहानपणापासून असलेली भरतनाट्यमची आवड. वयाच्या अवघ्या सहाव्या वर्षापासून त्या भरतनाट्यम शिकत आहेत. या नृत्यामुळे शरीराची लवचिकता आणि पायांची ताकद वाढायला खूप मदत झाली, असं त्या सांगतात.

योगा, स्विमिंग आणि वॉकिंगवरही भर

स्ट्रेंथ ट्रेनिंगसोबतच नीता अंबानी योगा, फ्लेक्सिबिलिटी आणि पोटाचे स्नायू (कोअर) मजबूत करण्यावरही लक्ष देतात. काही दिवस त्या स्विमिंग आणि वॉटर वर्कआऊट करतात. याशिवाय डान्ससाठीही त्या आवर्जून वेळ काढतात.

जेव्हा त्या प्रवासात असतात किंवा इतर व्यायाम करायला वेळ नसतो, तेव्हा त्या चालण्याला (वॉकिंग) प्राधान्य देतात. दिवसाला किमान ५,००० ते ७,००० पावलं चालण्याचं त्यांचं टार्गेट असतं.

शाकाहारी आहाराला पसंती

आहाराच्या बाबतीत नीता अंबानी खूप शिस्तबद्ध आहेत. त्या पूर्णपणे शाकाहारी असून नैसर्गिक आणि सेंद्रिय (ऑरगॅनिक) पदार्थांना पसंती देतात. शरीराला आवश्यक तेवढं प्रोटीन मिळणं खूप गरजेचं आहे, असं त्या मानतात. विशेष म्हणजे, त्यांनी साखर आणि साखरेला पर्याय असलेल्या कृत्रिम पदार्थांना आपल्या आहारातून पूर्णपणे हद्दपार केलं आहे.

शारीरिक आरोग्यासोबतच मानसिक शांती

व्यायाम हा फक्त शरीर सुडौल ठेवण्यासाठी नसून मन प्रसन्न ठेवण्यासाठीही महत्त्वाचा असतो, असं नीता अंबानींचं मत आहे. व्यायामामुळे ताणतणाव कमी होतो आणि दिवसभर सकारात्मक ऊर्जा मिळते, असं त्या सांगतात.

वाढत्या वयाची चिंता करण्यापेक्षा त्याचा स्वीकार करा आणि शरीर सतत सक्रिय ठेवा, असा मोलाचा सल्ला त्यांनी दिला आहे. फिटनेसची सुरुवात करण्यासाठी दिवसातून किमान ३० मिनिटे आणि आठवड्यातून चार दिवस व्यायाम नक्की करा, असंही त्या सुचवतात.