IPL Brand Value : रोहित, धोनीला धक्का! आयपीएलमध्ये 'या' टीमची ब्रँड व्हॅल्यू सर्वात जास्त

आयपीएलमध्ये मुंबई इंडियन्स आणि चेन्नई सुपर किंग्स प्रत्येकी ५ ट्रॉफी जिंकून सर्वात यशस्वी संघ मानले जातात. पण, ब्रँड व्हॅल्यूच्या बाबतीत या दोन्ही दिग्गज संघांना मोठा धक्का बसला आहे.

आयपीएलची व्हॅल्यू १.७५ लाख कोटी! कोणती टीम आहे टॉपवर?

२००७ च्या टी-२० वर्ल्ड कप विजयानंतर भारतात सुरू झालेली इंडियन प्रीमियर लीग (IPL) आता जगातील सर्वात मोठ्या स्पोर्टिंग इव्हेंटपैकी एक बनली आहे. जगभरातील दिग्गज खेळाडू दोन महिने खेळत असल्याने क्रिकेट चाहत्यांसाठी ही एक पर्वणीच असते. बॉलिवूड स्टार्स आणि बड्या उद्योगपतींच्या मालकीच्या या आयपीएल फ्रँचायझींनी बिझनेसमध्येही मोठी झेप घेतली आहे.

अमेरिकन नॅशनल फुटबॉल लीग (NFL) नंतर जगातील दुसरी सर्वात मोठी व्यावसायिक लीग म्हणून आयपीएलने इतिहास रचला आहे. सध्या आयपीएलची एकूण बिझनेस व्हॅल्यू २०.६ अब्ज डॉलर्स (सुमारे १.७५ लाख कोटी रुपये) पार गेली आहे. २०२६ मध्ये रॉयल चॅलेंजर्स बंगळुरू (RCB) सर्वाधिक ब्रँड व्हॅल्यू असलेली फ्रँचायझी ठरली आहे. इतर संघांनीही यात मोठी वाढ नोंदवली आहे.

रॉयल चॅलेंजर्स बंगळुरूची ऐतिहासिक कामगिरी

रॉयल चॅलेंजर्स बंगळुरूने २०२५ आणि २०२६ च्या सीझनमध्ये सलग आयपीएल टायटल जिंकून सलग दोनदा चॅम्पियन होणारा तिसरा संघ होण्याचा मान मिळवला. नुकतंच ब्लॅकस्टोन, बोल्ट व्हेंचर्स, आदित्य बिर्ला ग्रुप आणि टाइम्स ऑफ इंडिया ग्रुपच्या टीमने १.७८ अब्ज डॉलरच्या व्हॅल्यूवर या फ्रँचायझीची मालकी मिळवली.

गेल्या १२ महिन्यांत आरसीबीची व्हॅल्यू २६९ दशलक्ष डॉलरवरून १६% वाढून ३१२ दशलक्ष डॉलर (सुमारे २,६२० कोटी रुपये) झाली आहे. ३०० दशलक्ष डॉलरचा टप्पा ओलांडणारी आरसीबी जगातील पहिली क्रिकेट टीम ठरली आहे.

मुंबई इंडियन्स आणि केकेआरची घोडदौड

पाच वेळा आयपीएल चॅम्पियन मुंबई इंडियन्स (MI) २६४ दशलक्ष डॉलरच्या ब्रँड व्हॅल्यूसह दुसऱ्या क्रमांकावर आहे. गेल्या वर्षीच्या तुलनेत मुंबईच्या व्हॅल्यूमध्ये ९.१% वाढ झाली आहे.

तर तीन वेळा आयपीएल ट्रॉफी जिंकणारी कोलकाता नाईट रायडर्स (KKR) २४५ दशलक्ष डॉलरच्या व्हॅल्यूसह तिसऱ्या स्थानावर आहे. केकेआरच्या व्हॅल्यूमध्ये गेल्या वर्षीच्या तुलनेत ७.९% वाढ नोंदवली गेली आहे.

चेन्नई सुपर किंग्स आणि सनरायझर्स हैदराबाद

पाच वेळा आयपीएल टायटल जिंकणारी चेन्नई सुपर किंग्स (CSK) २४४ दशलक्ष डॉलरच्या ब्रँड व्हॅल्यूसह चौथ्या स्थानावर आहे. सीएसकेच्या व्हॅल्यूमध्ये गेल्या वर्षीच्या तुलनेत ३.८% वाढ दिसून आली आहे.

सनरायझर्स हैदराबाद (SRH) १६८ दशलक्ष डॉलरच्या ब्रँड व्हॅल्यूसह पाचव्या स्थानावर आहे. एसआरएच फ्रँचायझीच्या व्हॅल्यूमध्ये यंदा ९.१% वाढ झाली आहे.

राजस्थान रॉयल्स आणि पंजाब किंग्स

मित्तल फॅमिली आणि आदर पूनावाला यांच्या मालकीची राजस्थान रॉयल्स (RR) १६१ दशलक्ष डॉलरच्या ब्रँड व्हॅल्यूसह सहाव्या क्रमांकावर आहे. गेल्या वर्षीच्या तुलनेत राजस्थानने १०.३% वाढ नोंदवली आहे.

पंजाब किंग्स (PBKS) १५८ दशलक्ष डॉलरच्या व्हॅल्यूसह सातव्या स्थानावर आहे. टायटल जिंकलं नसलं तरी पंजाब टीमची व्हॅल्यू १२.१% ने वाढली आहे.

गुजरात टायटन्स, दिल्ली कॅपिटल्स, एलएसजी

आयपीएलमध्ये पहिल्याच वर्षी (२०२२) टायटल जिंकणारी गुजरात टायटन्स (GT) १५७ दशलक्ष डॉलरच्या व्हॅल्यूसह आठव्या स्थानावर आहे. पाच वर्षांत तीनदा फायनलमध्ये पोहोचलेल्या गुजरातची व्हॅल्यू १०.६% ने वाढली आहे.

आतापर्यंत एकही टायटल न जिंकलेली दिल्ली कॅपिटल्स (DC) १५६ दशलक्ष डॉलरच्या व्हॅल्यूसह (२.६% वाढ) नवव्या स्थानावर आहे. संजीव गोयंका यांच्या नेतृत्वाखालील लखनौ सुपर जायंट्स (LSG) १२२ दशलक्ष डॉलरच्या व्हॅल्यूसह दहाव्या स्थानावर आहे. एलएसजीच्या ब्रँड व्हॅल्यूमध्ये गेल्या वर्षीच्या तुलनेत कोणताही बदल झालेला नाही.