Rainbow Dosa Recipe : मुलं भाजी खात नाहीत? मग नाश्त्यात बनवा या पद्धतीने रंगीबेरंगी डोसे, प्लेट होईल रिकामी

तुमची मुलं नाश्त्याच्या वेळी खाण्यासाठी कटकट करतात का? मग हे रंगीबेरंगी 'रेनबो डोसे' नक्की ट्राय करा. या मजेदार पद्धतीने भाज्या मुलांच्या पोटात जातील आणि ते आवडीने खातील.

मुलांच्या नाश्तासाठी सोपी रेसिपी

हे विविध रंगांचे 'रेनबो डोसे' पाहून तुमची मुलं नक्कीच खूश होतील. ते एकमेकांशी स्पर्धा करून हे डोसे खातील, ज्यामुळे त्यांचं पोटही भरेल. आकर्षक रंगामुळे मुलं कोणतीही कुरकुर न करता ताट रिकामं करतील.

गाजराचा डोसा

गाजराच्या नैसर्गिक गोडव्यामुळे डोशाला एक वेगळीच चव येते. तुम्ही गाजर किसून किंवा उकडून त्याची पेस्ट करून पिठात मिसळू शकता. गाजर रोगप्रतिकारशक्ती वाढवतं आणि त्वचेच्या आरोग्यासाठीही उत्तम असतं.

बीटाचा डोसा

बहुतेक मुलांना बीट आवडत नाही, पण गुलाबी रंग मात्र खूप आवडतो! फक्त बीटाचा एक छोटा तुकडा उकडून त्याची बारीक पेस्ट करा. ही पेस्ट डोशाच्या पिठात घातल्यावर त्याला सुंदर गुलाबी रंग येतो. बीटामध्ये लोह आणि फॉलिक ॲसिड असतं, ज्यामुळे मुलांमधील ॲनिमिया कमी होतो.

मुग डाळीचा डोसा

पिवळ्या रंगाचे डोसे मुलांचं लक्ष पटकन वेधून घेतात. तुम्ही मुगाच्या डाळीचं पीठ (पेसरट्टू) वापरू शकता किंवा नेहमीच्या पिठात चिमूटभर हळद घालू शकता. हळद नैसर्गिक अँटीसेप्टिक म्हणून काम करते आणि मूग डाळ प्रथिनांचा उत्तम स्रोत आहे.

पालेभाज्यांचा करा वापर

पालेभाज्या खाण्यासाठी कटकट करणाऱ्या मुलांसाठी हा सर्वोत्तम पर्याय आहे. पालकाची काही पानं गरम पाण्यात थोडावेळ ठेवून (blanch) घ्या. नंतर आलं आणि हिरवी मिरची घालून त्याची पेस्ट बनवा. ही पेस्ट पिठात मिसळून पौष्टिक हिरवे डोसे तयार करा. पालकमध्ये व्हिटॅमिन ए आणि कॅल्शियम भरपूर असतं, जे चांगल्या दृष्टीसाठी आणि मजबूत हाडांसाठी आवश्यक आहे.

स्पेशल डोसा

तुम्ही ही ट्रिकसुद्धा वापरू शकता. 'मिनी डोसे' बनवण्यासाठी आप्पेपात्र वापरा किंवा डोशाला हार्टचा आकार द्या. डोसा तयार झाल्यावर त्यावर किसलेलं चीज किंवा पनीर टाका. मुलांना पिझ्झा खाल्ल्यासारखं वाटेल आणि ते आवडीने खातील. तुम्ही चटणी किंवा सॉसने डोशावर स्मायली फेसही काढू शकता. ही 'रंगीबेरंगी' युक्ती मुलांवर नक्कीच जादू करते. उद्या सकाळी तुमच्या मुलांसाठी हे रेनबो डोसे नक्की करून बघा!