Health Tips : पावसात भिजताय? थांबा! या चुका पडू शकतात महागात; जाणून घ्या आरोग्याची काळजी कशी घ्याल

Health Tips : पावसात भिजणे आनंददायी असले तरी आरोग्यासाठी धोकादायक ठरू शकते. ओल्या कपड्यांमुळे आणि केसांमुळे सर्दी, खोकला, ताप, फंगल इन्फेक्शनसारखे आजार होऊ शकतात. वेळीच योग्य ती खबरदारी घेणे आवश्यक आहे.

मुंबई : पावसाळा म्हणजे अनेकांसाठी आनंदाचा ऋतू. पहिल्या पावसात मनसोक्त भिजण्याचा मोह आवरता येत नाही. पण ही मजा कधीकधी आरोग्यासाठी धोकादायक ठरू शकते. ओल्या कपड्यांमुळे आणि ओल्या केसांमुळे अनेक समस्या उद्भवतात, ज्या आपल्याला खूप महागात पडू शकतात. सर्दी, खोकला, तापाव्यतिरिक्त, फंगल इन्फेक्शन, त्वचेवर पुरळ, खाज आणि केसांचे आजार होण्याची शक्यता असते. हे आजार एकदा झाले की लवकर बरे होत नाहीत, म्हणून वेळीच योग्य ती खबरदारी घेणे महत्त्वाचे आहे.

पावसात भिजल्यावर काय काळजी घ्यावी?

पावसात भिजणे जरी आनंददायी असले, तरी आरोग्याच्या दृष्टीने ते हानिकारक असू शकते. त्यामुळे, पावसात भिजल्यानंतर खालील गोष्टी लक्षात ठेवणे आवश्यक आहे.

लगेच कपडे बदला

पावसात भिजल्यावर शक्य तितक्या लवकर ओले कपडे बदला. ओले कपडे जास्त वेळ अंगावर राहिल्यास सर्दी, खोकला आणि त्वचेचे आजार होऊ शकतात.

केस कोरडे करा

ओले केस लगेच बांधू नका. केस पूर्णपणे कोरडे करूनच बांधा. ओले केस बांधल्यास केसांच्या मुळांशी बुरशी वाढू शकते आणि त्यामुळे केसांचे आजार होतात.

अँटीसेप्टिक साबणाचा वापर करा

जर जास्त वेळ ओले कपडे अंगात राहिले असतील, तर अँटीसेप्टिक साबणाने अंघोळ करा. यामुळे त्वचेवरील जंतूंचा नाश होण्यास मदत होते.

कपड्यांना इस्त्री करा

वापरण्यासाठी घेतलेले कपडे ओलसर असल्यास, ते लगेच घालू नका. त्या कपड्यांना इस्त्री करून घ्या. उष्णतेमुळे त्यावरील जंतू आणि बुरशी नष्ट होईल.

हेअर ड्रायरचा वापर

पावसाळ्यात केस नैसर्गिकरित्या लवकर सुकत नाहीत. अशावेळी केस लवकर कोरडे करण्यासाठी हेअर ड्रायरचा वापर करणे फायदेशीर ठरते, जेणेकरून केसांमुळे होणारे आजार टाळता येतील.

कोरडा टॉवेल वापरा

चेहरा पुसण्यासाठी कधीही ओलसर किंवा ओल्या टॉवेलचा वापर करू नका. यामुळे त्वचेवर जंतूंचा संसर्ग होण्याची शक्यता वाढते.

डॉक्टरांचा सल्ला घ्या

पावसात भिजल्यानंतर तुम्हाला कोणताही त्रास होत असल्यास लगेच डॉक्टरांचा सल्ला घ्या.

या सर्व सोप्या गोष्टी लक्षात ठेवून तुम्ही पावसाळ्यातील आजारांपासून स्वतःचे संरक्षण करू शकता. पावसाळ्यात स्वच्छतेकडे विशेष लक्ष देणे आवश्यक आहे, कारण या वातावरणात बुरशी (फंगस) लवकर वाढते. त्यामुळे, वापरण्यापूर्वी प्रत्येक वस्तू स्वच्छ आणि कोरडी असल्याची खात्री करा.