Gokulashtami 2025 : गोकुळाष्टमीला कृष्णाची विधीवत पूजा कशी करावी? वाचा सविस्तर

श्रीकृष्णाच्या जन्मोत्सवाचा सोहळा येत्या 15 ऑगस्टला आहे. यावेळी बाळगोपाळची पूजा केली जाते. याशिवाय बाळगोपाळसाठी पाळणा गायला जातो. अशातच त्याची पूजा कशी करायची हे जाणून घेऊया. 

Gokulashtami Puja Vidhi : गोकुळाष्टमी किंवा जन्माष्टमी हा भगवान श्रीकृष्णाचा जन्मोत्सव असून, हा दिवस मोठ्या श्रद्धा आणि उत्साहाने साजरा केला जातो. या दिवशी उपवास, जागरण आणि विशेष पूजेचा कार्यक्रम केला जातो. येत्या 15 ऑगस्टला श्रीकृष्ण जन्माष्टमी साजरी केली जाणार आहे. यावेळी कृष्णाची पूजा सुरू करण्यापूर्वी घरातील देवघर स्वच्छ करून त्यात सुंदर सजावट करावी. पांढरा, पिवळा किंवा निळा रंगाचा कपडा अंथरून त्यावर श्रीकृष्णाची मूर्ती किंवा झोपाळा ठेवावा. मूर्तीला पिवळ्या किंवा रेशमी वस्त्रांनी सजवावे, त्यांना मोरपंखी मुकुट, बासरी आणि हार घालावा. पूजेसाठी पंचामृत, फुले, तुळशीची पाने, मिठाई, लोणी आणि पाणी तयार ठेवावे.

पूजा करताना प्रथम गणपतीची वंदना करून श्रीकृष्णाला पाणी अर्पण करावे. त्यानंतर गंध, अक्षता, फुले, तुळशीदल, आणि नैवेद्य अर्पण करावा. तुळशीचे पान हे श्रीकृष्ण पूजेत अत्यंत महत्त्वाचे मानले जाते. कृष्णजन्माची कथा वाचावी किंवा ऐकावी, तसेच श्रीकृष्णाच्या बाललीला आणि भक्तिगीते गायली जावीत. मध्यरात्री १२ वाजता कृष्णजन्माचा क्षण साजरा करण्यासाठी घंटा वाजवून, शंखनाद करून आनंदोत्सव करावा. त्यानंतर कृष्णाच्या मूर्तीला झोपाळ्यात ठेवून हळुवारपणे झोका द्यावा.

गोकुळाष्टमीच्या पूजेत विशेष प्रसाद म्हणून लोणी, साखर, मिश्री, पेडे, दूध आणि पंचामृत ठेवले जाते. लोणी आणि दूध हे श्रीकृष्णाला अत्यंत प्रिय मानले जाते. पूजा संपल्यानंतर प्रसाद सर्वांना वाटावा. या दिवशी जागरण करून भजन-कीर्तन केल्याने भक्तिभाव वाढतो आणि घरात सकारात्मक ऊर्जा निर्माण होते. काही ठिकाणी दहीहंडी फोडण्याचा उत्सवही होतो, जो श्रीकृष्णाच्या बाललीलेची आठवण करून देतो.

या प्रकारे गोकुळाष्टमीला श्रीकृष्णाची पूजा केल्याने भक्ताला मानसिक शांती, आनंद आणि जीवनात सकारात्मकतेचा अनुभव मिळतो. तसेच, भक्तिभावाने केलेली पूजा केवळ धार्मिक कर्तव्य पूर्ण करत नाही, तर ती आपल्या मनाला अध्यात्मिकतेशी जोडते. श्रीकृष्णाच्या आशीर्वादाने आयुष्यात सुख, समृद्धी आणि प्रेमाचा वास राहतो, असे मानले जाते.

(DISCLAIMER : लेखाद्वारे वाचकांपर्यंत केवळ माहिती पोहोचवण्याचा प्रयत्न करत आहोत. याबाबत Asianet News Marathi कोणताही दावा व समर्थन करत नाही. यासाठी संबंधित क्षेत्रातील तज्ज्ञांचा सल्ला घ्यावा.)