Holi Snacks : होळीसाठी स्पेशल 1 किलो मैद्यात बनवा हे 5 कुरकुरीत पदार्थ, पाहुणेही विचारतील रेसिपी!

Holi Snacks : होळीचा सण म्हणजे रंगांची उधळण आणि सोबतच खमंग पदार्थांची मेजवानी. घरी गोड आणि तिखट पदार्थ बनवले जातात. यंदा तुम्हाला काहीतरी सोपं आणि कुरकुरीत बनवायचं असेल, तर मैद्याच्या या 5 भन्नाट रेसिपी नक्की ट्राय करा...

खाऱ्या शंकरपाळ्या

खाऱ्या शंकरपाळ्या मैद्यापासून बनणारी सर्वात सोपी आणि चविष्ट रेसिपी आहे. हे बनवण्यासाठी, मैद्यात थोडं मीठ, ओवा आणि मोहनासाठी तूप किंवा तेल घालून घट्ट पीठ मळा. नंतर पोळी लाटून त्याला डायमंड शेपमध्ये कापून घ्या. मंद आचेवर सोनेरी-तपकिरी होईपर्यंत तळा. या खाऱ्या शंकरपाळ्या चहासोबत खाण्यासाठी उत्तम आहेत.

कसूरी मेथी मठरी

कसुरी मेथी मठरी चवीला खूपच भन्नाट लागते. मैद्यामध्ये काळी मिरी, कसुरी मेथी आणि तूप घालून पीठ तयार करा. त्याचे छोटे-छोटे गोळे बनवा. त्यांना हलक्या हातांनी दाबून मंद आचेवर खरपूस तळून घ्या. ही मठरी महिनाभर आरामात टिकते.

भाकरवडी

तुम्ही मैद्यापासून गुजराती पदार्थ भाकरवडीसुद्धा बनवू शकता. मैद्यात मीठ आणि मोहन घालून पीठ चांगलं मळून घ्या. आता भाकरवडीच्या सारणासाठी भाजलेलं बेसन, तीळ, ओवा, मीठ, काळं मीठ आणि चाट मसाला घालून मिश्रण तयार करा. मैद्याची पोळी लाटून त्यात हे सारण भरा आणि त्याचा रोल बनवा. त्याचे छोटे-छोटे तुकडे करून खरपूस तळून घ्या.

शंकरपाळ्या

मैद्यापासून तुम्ही शंकरपाळी (शक्करपारे) सुद्धा बनवू शकता, जे खायला खूपच चविष्ट लागतात. यासाठी मैद्यात तुपाचं मोहन घालून घट्ट पीठ मळा. शंकरपाळ्या तुपात किंवा तेलात तळून घ्या. नंतर एक तारी पाक तयार करून त्यात तळलेल्या शंकरपाळ्या टाका आणि चांगल्या प्रकारे घोळवून घ्या. त्या थंड झाल्यावर मोकळ्या करून ठेवा.

मैद्याची चकली

आता चकली बनवण्यासाठी तुम्हाला डाळ-तांदूळ भिजवण्याची गरज नाही, कारण तुम्ही एका वाटी मैद्यापासूनही कुरकुरीत चकली बनवू शकता. मैदा आणि गव्हाचं पीठ समान प्रमाणात घेऊन एका कापडात बांधून वाफवून घ्या. नंतर त्यात मीठ, तिखट घालून घट्ट पीठ मळा. चकलीच्या सोऱ्यात हे पीठ भरून चकल्या पाडा आणि खरपूस तळून घ्या.