Cleaning Tips: प्लास्टिकचे डबे स्वच्छ करायचेत? हे स्मार्ट ट्रिक्स नक्की वापरून पाहा!

Cleaning Tips: डाळी, मीठ, तिखट अशा प्रत्येक गोष्टीसाठी आपण प्लास्टिकचे डबे वापरतो. पण ते स्वच्छ करणे खूप अवघड असते. त्यावरील डाग इतक्या सहजासहजी जात नाहीत. पण काही सोप्या टिप्स वापरून तुम्ही हे डाग सहज काढू शकता.

प्लास्टिकचे डबे कसे स्वच्छ करायचे?

लग्न, सण किंवा शुभ कार्यावेळीच नाही, तर महिला महिन्यातून एकदा तरी स्वयंपाकघर आणि त्यातील भांडी स्वच्छ करतात. स्टीलची भांडी स्वच्छ करणे सोपे असते, पण स्वयंपाकघरातील प्लास्टिकचे डबे इतक्या सहज स्वच्छ होत नाहीत. स्वयंपाकघरात असल्यामुळे या डब्यांना तेल आणि घाण चिकटते. हे डाग सहजासहजी जात नाहीत. हे स्वच्छ करायला जमत नसल्याने अनेक महिला जुने डबे फेकून नवीन विकत घेतात. पण काही सोप्या टिप्स वापरून तुम्ही हे प्लास्टिकचे डबे स्वच्छ करू शकता. ते कसे, चला जाणून घेऊया.

किचनमधील डबे कसे स्वच्छ करावेत?

कोमट पाणी आणि व्हिनेगर...

घाणेरडे झालेले प्लास्टिकचे डबे स्वच्छ करण्यासाठी कोमट पाणी आणि व्हिनेगर खूप प्रभावीपणे काम करतात. यासाठी तुम्हाला जास्त कष्ट करण्याची गरज नाही. एका टबमध्ये गरम पाणी घेऊन त्यात दोन-तीन चमचे व्हिनेगर घालून चांगले मिसळा. टबमध्ये तुम्ही एकाच वेळी अनेक डबे टाकू शकता. या पाण्यात डबे टाकून 20 मिनिटे भिजवून ठेवा आणि नंतर हाताने घासून स्वच्छ करा. पण, पाणी जास्त गरम नसावे, नाहीतर डबे वितळू शकतात.

डिटर्जंट पावडरने स्वच्छ करा

डिटर्जंट पावडरनेही तुम्ही स्वयंपाकघरातील प्लास्टिकचे डबे स्वच्छ करू शकता. यासाठी कोमट पाण्यात एक चमचा डिटर्जंट पावडर घालून चांगले मिसळा. त्यात प्लास्टिकचे डबे टाका. रात्रभर तसेच ठेवा आणि सकाळी घासून स्वच्छ करा. यामुळे चिकटपणा आणि घाण पूर्णपणे निघून जाईल. जास्त न घासताही डबे स्वच्छ होतील.

मीठ आणि डिश वॉश लिक्विड

डिश वॉश लिक्विड वापरूनही तुम्ही घाणेरडे झालेले प्लास्टिकचे डबे स्वच्छ करू शकता. यामुळे डबे नव्यासारखे चमकतील. यासाठी दोन चमचे मीठामध्ये थोडे डिश वॉश लिक्विड घालून चांगले मिसळा. हे मिश्रण कापडाने किंवा स्क्रबरने डब्यांना लावा. 5 मिनिटांनंतर ब्रशने डबे घासून स्वच्छ करा. यामुळे डब्यांवरील सर्व घाण निघून जाईल आणि वासही येणार नाही.