Ather Voice Control : हो, आता तुमची स्कूटर बोलणार! कसं काम करतं हे नवं फीचर?

इलेक्ट्रिक स्कूटर बनवणारी प्रसिद्ध कंपनी एथर एनर्जीने (Ather Energy) आपल्या ग्राहकांसाठी एक नवीन सुविधा आणली आहे. 'Voice on Ather' नावाच्या या नव्या फीचरबद्दलची संपूर्ण माहिती आपण या फोटो गॅलरीमधून जाणून घेऊया.

कोणत्या स्कूटर्समध्ये हे फीचर आहे?

हे नवीन फीचर कंपनीने नुकत्याच रिलीज केलेल्या AtherStack 7 सॉफ्टवेअर अपडेटसोबत दिलं आहे. एथरचं 'Voice on Ather' फीचर सध्या फक्त Gen 3 किंवा त्यापेक्षा नवीन हार्डवेअर असलेल्या स्कूटर्समध्येच काम करतं. यामध्ये Ather 450X, Ather 450 Apex आणि Rizta Z या मॉडेल्सना ही सुविधा मिळाली आहे. मात्र, Ather 450S आणि Rizta S या मॉडेल्ससाठी हे फीचर उपलब्ध नाही. कंपनी हे अपडेट OTA (Over The Air) पद्धतीने देत आहे, त्यामुळे तुम्हाला सर्व्हिस सेंटरला न जाता घरबसल्या सॉफ्टवेअर अपडेट करून हे फीचर वापरता येईल.

व्हॉईस कमांडने काय काय करता येतं?

या नवीन फीचरमुळे स्कूटर चालवताना स्क्रीनला सारखं टच करण्याची गरज नाही. उदाहरणार्थ, 'घरी जाण्यासाठी नेव्हिगेशन सुरू कर' किंवा 'जवळचं चार्जिंग स्टेशन कुठे आहे?' असं विचारल्यावर ती लगेच माहिती दाखवते. एवढंच नाही, तर स्क्रीनची ब्राइटनेस कमी-जास्त करणे, ट्रॅक्शन कंट्रोल मोड बदलणे आणि मॅजिक ट्विस्ट रिजनरेशन लेव्हल सेट करणे, यांसारखी वाहन सेटिंग्जही तुम्ही आवाजाने बदलू शकता. शिवाय, तुमचा स्मार्टफोन ब्लूटूथने कनेक्ट असेल, तर लोकांना कॉल करणे, गाणी प्ले/पॉज करणे असे मीडिया कंट्रोल्सही व्हॉईस कमांडने वापरता येतात.

AI मुळे सिस्टीम झाली अधिक स्मार्ट

या फीचरसाठी एथरने लार्ज लँग्वेज मॉडेल्स (LLMs) आणि नॅचरल लँग्वेज प्रोसेसिंग (NLP) सारख्या अत्याधुनिक AI टेक्नॉलॉजीचा वापर केला आहे. त्यामुळे तुम्ही नेहमीच्या बोलण्याच्या भाषेत जरी कमांड दिली, तरी स्कूटर ती समजून घेते. विशेष म्हणजे, ही सिस्टीम भारतीय भाषांमधील वेगवेगळे उच्चार आणि बोलण्याच्या पद्धती सहज ओळखू शकेल, अशाप्रकारे बनवली आहे. हे फीचर तुम्ही एथर हॅलो (Ather Halo) स्मार्ट हेल्मेटद्वारे किंवा साध्या ब्लूटूथ हेडसेटद्वारेही वापरू शकता.

लवकरच स्कूटर तुमच्याशी संवाद साधणार

सध्या 'Voice on Ather' फीचर फक्त युझरने दिलेल्या कमांड्सवर काम करतं. पण भविष्यात कंपनी याला आणखी डेव्हलप करून AI आधारित टू-वे कम्युनिकेशन (Two-Way Communication) फीचर आणणार आहे. हे फीचर आल्यानंतर स्कूटर गरजेच्या वेळी स्वतः युझरशी बोलू शकेल. उदाहरणार्थ, बॅटरी कमी झाल्यावर अलर्ट देणे, जवळचे चार्जिंग स्टेशन सुचवणे, गाडीच्या सर्व्हिसिंगची आठवण करून देणे आणि सुरक्षेसाठी धोक्याचा इशारा देणे, अशा अनेक गोष्टी ती करेल. यामुळे स्कूटर फक्त एक वाहन न राहता, तुमचा AI स्मार्ट असिस्टंट बनेल.

रायडर्सना याचा काय फायदा?

रायडिंग करताना मोबाईल किंवा टचस्क्रीन वापरल्यामुळे अपघाताचा धोका वाढतो. या नवीन व्हॉईस कंट्रोल फीचरमुळे, तुमचे हात नेहमी हँडलवर आणि डोळे रस्त्यावर ठेवून तुम्ही आवाजानेच सगळी आवश्यक कामं करू शकता. यामुळे तुमचा प्रवास अधिक सुरक्षित आणि सोयीस्कर होतो. आर्टिफिशियल इंटेलिजन्सचा वापर करून रायडिंगचा अनुभव सुधारण्याच्या उद्देशाने एथरने आणलेले हे फीचर, भारतीय इलेक्ट्रिक स्कूटर मार्केटमधील एक महत्त्वाचं पाऊल मानलं जात आहे.