उन्हाळ्यात घरच्याघरी तयार करा हे 5 टोनर, त्वचा राहिल फ्रेश आणि हाइड्रेट

स्किन केअर रुटीनमध्ये टोनरचा समावेश करणे महत्वाचे आहे. मार्केटमध्ये वेगवेगळ्या ब्रँड्सचे टोनर मिळतात. पण घरच्याघरी काही नॅच्युरल प्रोडक्ट्स वापरुन टोनर तयार करू शकता. जेणेकरुन सध्याच्या उन्हाळ्याच्या दिवसात त्वचा फ्रेश आणि हाइड्रेट राहण्यास मदत होईल.

टोनरचे फायदे

टोनरमुळे त्वचा फ्रेश आणि पोर्स टाइट होतात. अशातच त्वचेवर ग्लो येतो. खरंतर, टोनरचा स्किन केअर रुटीनमध्ये वापर करणे फार महत्वाचे आहे. टोनरमुळे त्वचा हाइड्रेट राहण्यासह पीएच स्तर बॅलेन्स राहतो. क्लिंजिंगनंतर टोनरचा वापर केल्याने त्वचेवरील राहिलेला मेकअप, धूळ-माती हटवण्यास मदत होते. जाणून घेऊया घरच्याघरी कोणत्या 5 प्रकारचे टोनर तयार करू शकता याबद्दल सविस्तर...

कडुलिंबाचा टोनर

कडुलिंबाच्या पानांपासून टोनर तयार करू शकता. यासाठी कडुलिंबाची पाने घेऊन स्वच्छ धुवा. यानंतर एका भांड्यात पाणी गरम करुन त्यामध्ये कडुलिंबाची पाने बुडवून उकळवा. पाणी उकळल्यानंतर गॅस बंद करुन पाणी गाळून घ्या. अशाप्रकारे कडुलिंबाचा टोनर तयार होईल. या टोनरमध्ये एक चमचा एलोवेरा जेलही मिक्स करु शकता. यामुळे पिंपल्सच्या समस्येपासून दूर राहण्यास मदत होईल.

काकडीचा टोनर

उन्हाळ्याच्या दिवसात त्वचा फ्रेश आणि हाइड्रेट राहण्यासाठी काकडीचा टोनर तयार करू शकता. यासाठी काकडीचा रस काढून त्यामध्ये गुलाब पाणी, एलोवेरा जेलसह लिंबाचे काही थेंब घाला. सर्व सामग्री व्यवस्थितीत मिक्स करुन स्प्रे बॉटलमध्ये भरा.

ग्रीन टी चे टोनर

पिंपल, एक्ने किंवा तेलकट त्वचेच्या समस्येपासून दूर राहण्यासाठी ग्रीन टी पासून टोनर तयार करा. या टोनरमुळे त्वचा फ्री रेडिकल्सपासून संरक्षित राहते. टोनर तयार करण्यासाठी ग्रीन टी पाण्यामध्ये उकळून घ्या आणि थंड होऊ द्या. थंड झाल्यानंतर टी ट्री ऑइल त्यामध्ये मिक्स करा.

गुलाब टोनर

नॅच्युरल टोनर तयार करण्यासाठी गुलाबाचा वापर करू शकता. गुलाबांच्या पाकळ्यांपासून टोनर तयार करण्यासाठी पाकळ्या गरम पाण्यामध्ये उकळून घ्या. यानंतर गाळून स्प्रे बॉटलमध्ये त्याचे पाणी भरुन ठेवा. यामध्ये विच हेजर फ्लॉवरही मिक्स करू शकता.

तांदळाच्या पाण्याचे टोनर

स्किन केअर रुटीनमध्ये तांदळाच्या पाण्याचा वापर करू शकता. टोनर तयार करण्यासाठी तांदूळ 6-7 तास उकळून घ्या आणि त्याला फेस येऊ द्या. यानंतर पाणी गाळून त्यामध्ये गुलाब पाणी मिक्स करा.

असा वापरा टोनर

सर्वप्रथम चेहरा स्वच्छ धुवून घ्या. यानंतर डबल क्लीजिंग केल्यानंतर क्लींजर कॉटनवर घेऊन चेहरा स्वच्छ करा. हे टोनर चेहऱ्याला लावून घ्या. टोनर सुकल्यानंतर मॉइश्चराइजर त्वचेला लावा. खरंतर, टोनर रात्रीच्या वेळेस लावणे फायद्याचे ठरू शकते.

(Disclaimer : सदर लेख केवळ सामान्य माहिती देण्याकरिता आहे. Asianet News या माहितीची जबाबदारी घेत नाही. अधिक माहितीसाठी आपण तज्ज्ञ किंवा आपल्या ओळखीच्या डॉक्टरांचा सल्ला घ्यावा.)