Taj Mahal At Night : ताजमहालमध्ये एकही लाईट का नाही? रात्री तिथे अंधार का असतो?

ताजमहाल पाहायला जगभरातून पर्यटक येतात. पण या सुंदर वास्तूत एकही लाईट नाही, हे तुम्ही पाहिलं असेलच. रात्रीच्या वेळी तिथे साधा बल्बही लावला जात नाही. यामागचं नेमकं कारण काय आहे?

कृत्रिम लाईट्स लावत नाहीत

ताजमहालचं सौंदर्य पाहायला जगभरातून लाखो लोक येतात. देशातील अनेक ऐतिहासिक वास्तू रात्रीच्या वेळी लाईट्सने उजळून निघतात. पण ताजमहालवर रात्री कोणताही लाईट लावला जात नाही. पौर्णिमेच्या रात्री चंद्राच्या प्रकाशात हा पांढरा संगमरवर नैसर्गिकरित्या चमकतो. हे नैसर्गिक सौंदर्य टिकवण्यासाठी आणि रसायनांचा किंवा प्रकाशाचा वाईट परिणाम टाळण्यासाठी तिथे कृत्रिम लाईट्स लावले जात नाहीत.

भारतीय पुरातत्व सर्वेक्षणाकडून लाईट्सवर बंदी

यामागे एक मोठं पर्यावरणीय कारण आहे. ताजमहाल यमुना नदीच्या काठावर असल्याने तिथे मोठ्या प्रमाणावर कीटक असतात. रात्रीच्या वेळी पांढऱ्या संगमरवरावर लाईट्स लावले, तर लाखो कीटक त्या प्रकाशाकडे आकर्षित होतील. त्यांच्या विष्ठेमुळे संगमरवरावर हिरवे आणि काळे डाग पडून वास्तूचं नुकसान होईल. १९९७ मध्ये एका संगीत कार्यक्रमासाठी इथे लाईट्स लावले होते, तेव्हा दुसऱ्या दिवशी भिंतींवर कीटक साचून संगमरवराचा रंग बदलला होता. तेव्हापासून भारतीय पुरातत्व सर्वेक्षणाने (ASI) इथे कृत्रिम लाईट्सवर पूर्ण बंदी घातली आहे.

अंधारात का? कारण...

सुरक्षेचा मुद्दाही यात खूप महत्त्वाचा आहे. युद्धाच्या वेळी शत्रूच्या विमानांना ताजमहाल दिसू नये म्हणून तो अंधारात ठेवला जायचा. १९७१ च्या युद्धादरम्यान शत्रूच्या हल्ल्यापासून वाचवण्यासाठी ताजमहालवर मोठे हिरवे कपडे झाकले होते. तीच सुरक्षा परंपरा आणि काळजी लक्षात घेऊन आजही रात्रीच्या वेळी तिथे लाईट्स लावले जात नाहीत. संगमरवराची शुद्धता आणि ऐतिहासिक वारसा जपण्यासाठी ताजमहाल असा अंधारातच ठेवला जातो.