Vande Mataram: 'पूर्ण राष्ट्रगीतच म्हणणार!', काँग्रेसच्या भूमिकेविरोधात भाजपचा ठराव

काँग्रेसने वंदे मातरम् फक्त दोन कडव्यांपुरतं मर्यादित ठेवण्याच्या निर्णयाचा भाजपने तीव्र निषेध केला आहे. संपूर्ण राष्ट्रगीताच्या सन्मानासाठी आणि त्याचा ऐतिहासिक वारसा जपण्यासाठी देशव्यापी मोहीम राबवणार असल्याचंही भाजपने जाहीर केलं आहे.

भारतीय जनता पक्षाने (भाजप) शनिवारी भारताचे राष्ट्रगीत असलेल्या 'वंदे मातरम्'चा सन्मान, प्रतिष्ठा आणि ऐतिहासिक वारसा जपण्यासाठी एक महत्त्वाचा ठराव मंजूर केला. काँग्रेस कार्यकारिणीने १९३७ च्या ठरावाला पुढे नेत राष्ट्रगीत फक्त पहिल्या दोन कडव्यांपुरते मर्यादित ठेवण्याचा जो निर्णय घेतला, त्याचा तीव्र निषेध करत असल्याची माहिती भाजपचे राष्ट्रीय अध्यक्ष नितीन नबीन यांनी दिली.

काँग्रेसच्या १९३७ च्या ठरावाचा भाजपकडून निषेध

नितीन नबीन यांनी 'X' या सोशल मीडिया प्लॅटफॉर्मवर या ठरावाची अधिकृत माहिती शेअर केली आणि 'वंदे मातरम्'चे ऐतिहासिक महत्त्व अधोरेखित केले. त्यांनी स्पष्ट केले की, काँग्रेस कार्यकारिणीने १९ ऑगस्ट २०२६ रोजी १९३७ च्या ठरावाला पुन्हा दुजोरा दिला. यानुसार वंदे मातरम् फक्त पहिल्या दोन कडव्यांपर्यंतच गायले जाईल. भाजप या निर्णयाचा तीव्र निषेध करत आहे. संपूर्ण वंदे मातरम् गीताचा सन्मान, प्रतिष्ठा, वारसा आणि राष्ट्रीय स्वरूप जपण्याचा संकल्प भाजपने केला आहे. हे भारताचे राष्ट्रगीत, राष्ट्रीय चेतनेचे प्रतीक आणि स्वातंत्र्यलढ्याचा गौरवशाली वारसा आहे, असेही भाजपने म्हटले आहे.

नबीन पुढे म्हणाले की, १९५० मध्ये संविधान सभेने दिलेल्या घोषणेनुसार आणि २०२६ मध्ये संसदेने 'जन गण मन' प्रमाणेच राष्ट्रगीताला समान वैधानिक संरक्षण दिले आहे. या भूमिकेवर भाजप ठाम आहे.

जातीय दबाव, राजकीय तुष्टीकरण किंवा मतांच्या राजकारणासाठी राष्ट्रगीताचा वापर करण्याच्या प्रत्येक प्रयत्नाला पक्ष विरोध करेल. काँग्रेसच्या कार्यकारिणीचा कोणताही ठराव देशाच्या संवैधानिक संस्था आणि संसदेने बनवलेल्या कायद्यांपेक्षा मोठा असू शकत नाही, याची आठवणही काँग्रेसला करून देण्यात आली आहे, असेही नबीन म्हणाले.

ते म्हणाले, "१९३७ ची राजकीय तडजोड ही १९५० च्या घटनात्मक निर्णयापेक्षा आणि २०२६ मध्ये संसदेने केलेल्या कायद्यापेक्षा मोठी असू शकत नाही."

याशिवाय, ज्या ऐतिहासिक आणि राजकीय परिस्थितीत वंदे मातरम् गायनावर बंधनं घालण्यात आली, ती परिस्थिती लोकांसमोर आणण्याचा संकल्पही भाजपने केला आहे. यामध्ये मुस्लिम लीगचा विरोध आणि त्यानंतर वाढलेल्या जातीयवादी आणि फुटीरतावादी मागण्यांच्या राजकारणाचा समावेश आहे, असेही त्यांनी सांगितले.

"महात्मा गांधींनी वंदे मातरम् ला 'साम्राज्यवादाविरोधी घोषणा' आणि 'सर्वात शुद्ध राष्ट्रीय भावना' म्हटले होते, हे त्यांचे ऐतिहासिक विधान प्रत्येक व्यक्तीपर्यंत पोहोचवले जाईल. भाजप कार्यकर्ते देशभरात एक मोहीम राबवणार आहेत, ज्याअंतर्गत वंदे मातरम् चा इतिहास, अर्थ, राष्ट्रीय महत्त्व आणि गौरवशाली वारसा भारताच्या कानाकोपऱ्यात पोहोचवला जाईल," असेही ते म्हणाले.

ठरावानुसार, "तरुण पिढीमध्ये एक विशेष जनजागृती मोहीम राबवली जाईल, जेणेकरून सहा कडव्यांचे संपूर्ण राष्ट्रगीत आणि त्याचा इतिहास विस्मरणात जाणार नाही. तसेच, भारताच्या स्वातंत्र्य, संघर्ष, त्याग आणि राष्ट्रीय जागृतीच्या आठवणी वंदे मातरम् शी किती खोलवर जोडलेल्या आहेत, हे भावी पिढ्यांना समजेल."

राजकीय सोय किंवा तुष्टीकरणासाठी वंदे मातरम् च्या सन्मानाशी आणि वारशाशी कोणतीही तडजोड स्वीकारली जाणार नाही, असेही ठरावात म्हटले आहे.

'हा देशाच्या सन्मानाचा प्रश्न': नितीन नबीन

नबीन म्हणाले की, वंदे मातरम् भोवतीची चर्चा राजकारणापेक्षा मोठी आहे. हा देशाच्या सन्मानाचा आणि स्वातंत्र्यसैनिकांच्या वारशाचा प्रश्न आहे.

"हा केवळ कोणत्याही एका राजकीय पक्षाशी संबंधित मुद्दा नाही. ज्या असंख्य देशभक्तांनी देशाच्या स्वातंत्र्यासाठी सर्वस्व अर्पण केले, त्यांच्या सन्मानाचा हा प्रश्न आहे. एकेकाळी वंदे मातरम् या शब्दांमध्ये इतकी ताकद होती की एक साम्राज्य भीतीने थरथर कापायचे. ब्रिटिशांनी हे शब्द दाबण्याचा प्रयत्न केला, कारण या शब्दांनी लोकांमध्ये प्रतिकाराची भावना जागवली होती," असे ते म्हणाले.

"भारताच्या अनेक पिढ्यांनी याला स्वातंत्र्य, त्याग आणि राष्ट्रीय अभिमानाचा मंत्र मानले. या वारशाला आजच्या व्होट बँकेच्या राजकारणात बंदिस्त करता येणार नाही. १९४७ मध्ये भारताच्या स्वातंत्र्याचा विजयघोष 'वंदे मातरम्' होता आणि माननीय पंतप्रधान श्री नरेंद्र मोदीजींच्या नेतृत्वात २०४७ मध्ये 'विकसित भारता'चा महाघोषही 'वंदे मातरम्' असेल," असेही ते म्हणाले.

वंदे मातरम् वादाची ठिणगी कशी पडली?

काँग्रेस कार्यकारिणीने पक्षाच्या कार्यक्रमांमध्ये राष्ट्रगीताची फक्त पहिली दोन कडवी गायली जातील, असा निर्णय घेतला होता. यासाठी त्यांनी पक्षाच्याच १९३७ च्या ठरावाचा आधार घेतला. या निर्णयानंतर हा वाद उफाळून आला. याआधी, १५ ऑगस्ट रोजी स्वातंत्र्य दिनाच्या कार्यक्रमात राष्ट्रगीत सुरू असताना काँग्रेस अध्यक्ष मल्लिकार्जुन खर्गे आणि पक्षाच्या संसदीय अध्यक्ष सोनिया गांधी बोलत असल्याचा आरोप भाजपने केला होता आणि जाहीर माफीची मागणी केली होती.

CWC च्या बैठकीनंतर काँग्रेस खासदार के. सी. वेणुगोपाल म्हणाले की, वंदे मातरम् गायनाबाबत पक्षाची भूमिका स्पष्ट आहे आणि पक्ष महात्मा गांधी, जवाहरलाल नेहरू आणि सरदार वल्लभभाई पटेल यांनी १९३७ मध्ये घेतलेल्या निर्णयांचे पालन करेल.