NEET Paper Leak: अखेर मास्टरमाइंडला अटक, राजस्थानमधून असं उघड झालं संपूर्ण रॅकेट
सार
NEET पेपरफुटीचं प्रकरण उघडकीस आल्यानंतर देशातील सर्वात मोठी वैद्यकीय प्रवेश परीक्षा (NEET) रद्द करण्यात आली आहे. ३ मे रोजी झालेल्या या परीक्षेला जवळपास २२.७९ लाख विद्यार्थी बसले होते. आता ही परीक्षा पुन्हा घेतली जाईल, असं नॅशनल टेस्टिंग एजन्सीने (NTA) स्पष्ट केलं आहे.
देशातील सर्वात मोठी वैद्यकीय प्रवेश परीक्षा NEET मंगळवारी रद्द करण्यात आली. ३ मे रोजी झालेल्या या परीक्षेला तब्बल २२.७९ लाख विद्यार्थी बसले होते. पण पेपरफुटीचं प्रकरण समोर आल्यानंतर हा निर्णय घेण्यात आला. आता ही परीक्षा पुन्हा घेतली जाईल, असं नॅशनल टेस्टिंग एजन्सीने (NTA) स्पष्ट केलं आहे. दरम्यान, या पेपरफुटीच्या मास्टरमाइंडला अटक करण्यात आल्याचा दावा केला जात आहे.
कोण आहे नीट पेपरफुटीचा मास्टरमाइंड?
मीडिया रिपोर्ट्सनुसार, या पेपरफुटीचा मुख्य सूत्रधार जयपूरचा रहिवासी आहे. त्याला सोमवारी ताब्यात घेण्यात आलं. या प्रकरणात आतापर्यंत सीकर, झुंझुनूं आणि देहरादूनमधून एकूण १५ जणांना अटक करण्यात आली आहे. सूत्रांनी दिलेल्या माहितीनुसार, या प्रकरणाची पहिली तक्रार ८ मे रोजी आली होती. त्यानंतर स्पेशल ऑपरेशन ग्रुपच्या (SOG) टीमने सीकर आणि झुंझुनूंमध्ये तपास सुरू केला.
केरळमधून सीकरच्या विद्यार्थ्याला मिळाला होता पेपर
नीटचा पेपर सर्वात आधी राजस्थानमध्ये फुटला होता. हा गेस पेपर परीक्षेच्या काही दिवस आधी, म्हणजे १ मे रोजी सीकरमधील एका विद्यार्थ्याला मिळाला होता. असं म्हटलं जातंय की, केरळमध्ये शिकणाऱ्या चुरू जिल्ह्यातील एका MBBS विद्यार्थ्याने हा पेपर सीकरमधील आपल्या मित्राला पाठवला होता. यातील १२० ते १४० प्रश्न मुख्य परीक्षेत जसेच्या तसे आले होते. म्हणजेच, ७२० पैकी तब्बल ६०० गुणांचे प्रश्न या गेस पेपरमध्ये होते.
कसं उघड झालं नीट पेपरफुटीचं प्रकरण?
सीकरच्या विद्यार्थ्याकडून हा पेपर झुंझुनूंमधील विद्यार्थ्यांपर्यंत पोहोचला. त्यानंतर हा गेस पेपर एका पीजी चालकाच्या हाती लागला. त्याने आपल्याकडे राहणाऱ्या विद्यार्थ्यांना तो दिला. यामध्ये फिजिक्स, केमिस्ट्री आणि बायोलॉजीचे ३०० पेक्षा जास्त प्रश्न होते. परीक्षा झाल्यानंतर सीकरमधील एका पीजी चालकाने याची तक्रार पोलीस आणि नॅशनल टेस्टिंग एजन्सीकडे (NTA) केली. त्यानंतर हे संपूर्ण प्रकरण समोर आलं आणि अखेर परीक्षा रद्द करण्याचा मोठा निर्णय घेण्यात आला.