Mathura Viral Video: पैशांच्या वादातून मायलेकींना कारच्या बोनेटवरून २ किमी नेलं
सार
मथुरेमध्ये पैशांच्या वादातून एक धक्कादायक घटना घडली आहे. दोन तरुणांनी पळून जाण्याच्या प्रयत्नात एका महिलेला आणि तिच्या मुलीला कारच्या बोनेटवरून तब्बल दोन किलोमीटरपर्यंत फरफटत नेलं. या घटनेचा सीसीटीव्ही व्हिडीओ व्हायरल झाल्यानंतर पोलिसांनी दोन्ही आरोपींना अटक केली असून त्यांच्यावर हत्येचा प्रयत्न केल्याचा गुन्हा दाखल केला आहे.
उत्तर प्रदेशच्या मथुरेमधून एक अत्यंत धक्कादायक घटना समोर आली आहे. पैशांच्या वादातून एका महिलेला आणि तिच्या मुलीला चालत्या कारच्या बोनेटवर लटकवून नेण्यात आलं. या दोघी मायलेकी तब्बल दोन किलोमीटरपर्यंत कारच्या बोनेटला घट्ट धरून होत्या. त्यानंतर ड्रायव्हरने त्यांना एका पेट्रोल पंपाजवळ सोडून पळ काढला. या घटनेचा सीसीटीव्ही व्हिडीओ आता सोशल मीडियावर चांगलाच व्हायरल झाला आहे. ही घटना २ नोव्हेंबरला सोमवारी रात्री वृंदावन परिक्रमा मार्गावरील पाणीगाव गावाजवळ घडली. याप्रकरणी पोलिसांनी दोन जणांना अटक केली आहे.
पोलिसांनी दिलेल्या माहितीनुसार, प्रेम आणि पुनीत हे दोन आरोपी त्यांच्या एका ओळखीच्या व्यक्तीसोबत पवन नावाच्या माणसाच्या घरी गेले होते. एका कायदेशीर प्रकरणासाठी सर्वांनी मिळून खर्च केलेले पैसे परत मागण्यासाठी ते तिथे गेले होते, असं सांगितलं जातंय.
पैसे न मिळाल्याने त्यांच्यात जोरदार भांडण सुरू झालं. आरोपींनी तिथल्या लोकांना शिवीगाळ आणि मारहाण केल्याचं कळताच जवळपास १०० स्थानिक लोक तिथे जमा झाले.
परिस्थिती हाताबाहेर जात असल्याचं पाहून या तरुणांनी कारमधून पळून जाण्याचा प्रयत्न केला. त्यांना थांबवण्यासाठी पवनची बहीण आणि आई शीला देवी कारच्या समोर उभ्या राहिल्या. पण ड्रायव्हरने कारचा वेग वाढवल्याने या दोघी कारच्या बोनेटवर पडल्या. ड्रायव्हरने गाडी न थांबवता तब्बल दोन किलोमीटरपर्यंत त्यांना तसंच नेलं.
शेवटी मांट रोडवरील एका पेट्रोल पंपाजवळ या महिलांना सोडून कारमधील लोकांनी पळ काढला. या दोघी कारच्या बोनेटवर लटकत असल्याचा सीसीटीव्ही व्हिडीओ इंटरनेटवर व्हायरल झाला आहे. या व्हिडीओमधून महिलांचा जीव किती धोक्यात होता, हे स्पष्ट दिसतंय.
व्हायरल सीसीटीव्ही व्हिडीओ पाहा
Two men allegedly drove nearly 2 km with a mother and daughter stuck on their car's bonnet in UP's Mathura.
The women had stood in front of the car to stop them fleeing after a money dispute.
Both men have been arrested and booked for attempt to murder. https://t.co/0ELFVRnYo4
— The Indian Idiot (@theindianidiot) November 5, 2026
पोलिसांत तक्रार दिल्यानंतर जखमी महिलांना उपचारासाठी रुग्णालयात दाखल करण्यात आलं.
सुरुवातीला पोलिसांनी पीडितांच्या तक्रारीवरून शिवीगाळ आणि मारहाणीचा गुन्हा दाखल केला होता. पण सीसीटीव्ही व्हिडीओ आणि इतर पुरावे पाहिल्यानंतर तपास अधिकाऱ्यांनी या प्रकरणात हत्येचा प्रयत्न केल्याचं कलमही जोडलं आहे.