Mamata Banerjee: ममता बॅनर्जी काँग्रेसमध्ये परतणार? दिल्लीत काँग्रेसची तातडीची बैठक, राजकीय वर्तुळात चर्चांना उधाण

तृणमूल काँग्रेसच्या नेत्या ममता बॅनर्जी यांनी काँग्रेस नेत्या सोनिया गांधी यांची भेट घेतली आहे. यानंतर काँग्रेस हायकमांडने गुरुवारी दिल्लीत सर्व राज्यांतील नेत्यांची तातडीची बैठक बोलावली आहे. त्यामुळे ममता बॅनर्जी पुन्हा काँग्रेसमध्ये परतणार का, यावर राजकीय वर्तुळात जोरदार चर्चा सुरू झाली आहे.

Mamata Banerjee Congress: राजकारणात कधी काय होईल याचा अंदाज बांधणं खूप अवघड असतं. आता देशाच्या राजकारणासाठी गुरुवारचा दिवस खूप महत्त्वाचा ठरू शकतो. तृणमूल काँग्रेसच्या नेत्या आणि राज्याच्या माजी मुख्यमंत्री ममता बॅनर्जी (Mamata Banerjee) यांनी काँग्रेस नेत्या सोनिया गांधी यांची भेट घेतली आहे. तर दुसरीकडे, बुधवारी तृणमूल काँग्रेसचे राष्ट्रीय सरचिटणीस आणि खासदार अभिषेक बॅनर्जी (Abhishek Banerjee) यांनी राहुल गांधी यांची भेट घेतली.

ममता बॅनर्जी सहकाऱ्यांसोबत काँग्रेसमध्ये येणार?

या भेटीगाठींनंतर काँग्रेस हायकमांड आता मोठा निर्णय घेण्याच्या तयारीत असल्याची चर्चा आहे. गुरुवारी दिल्लीत सर्व राज्यांच्या नेत्यांची तातडीची बैठक बोलावण्यात आली आहे. सूत्रांच्या माहितीनुसार, ममता बॅनर्जी आपल्या सहकाऱ्यांसोबत काँग्रेसमध्ये प्रवेश करू शकतात किंवा आपला पक्ष तृणमूल काँग्रेस (TMC) थेट काँग्रेसमध्ये विलीन करू शकतात. म्हणजे ज्या काँग्रेसमधून बाहेर पडून त्यांनी तृणमूलची स्थापना केली, त्याच पक्षात त्या पुन्हा एकदा परतण्याच्या तयारीत आहेत!

यासोबतच आणखी एक चर्चा सुरू आहे. दोन्ही पक्षांच्या वरिष्ठ नेत्यांमध्ये झालेल्या बैठकीत ममता आणि अभिषेक यांच्या काँग्रेस प्रवेशावर सविस्तर चर्चा झाली आहे. इतकंच नाही, तर काँग्रेसकडून ममता बॅनर्जींना राष्ट्रीय स्तरावर मोठं पद देण्याचा प्रस्तावही देण्यात आल्याचं बोललं जातंय. त्यांना पक्षाचं उपाध्यक्षपद मिळण्याची दाट शक्यता आहे. अभिषेक बॅनर्जींसाठीही राष्ट्रीय सरचिटणीस पदासारख्या मोठ्या पदाचा विचार सुरू असल्याची माहिती सूत्रांनी दिली आहे. या सर्व घडामोडींच्या पार्श्वभूमीवर, काँग्रेसने गुरुवारी तातडीची बैठक बोलावली आहे. देशातील सर्व राज्यांचे अध्यक्ष आणि सरचिटणीस यांना दिल्लीतील इंदिरा भवनमध्ये या महत्त्वाच्या बैठकीसाठी बोलावण्यात आलं आहे. फक्त काही तासांच्या नोटीसवर ही बैठक बोलावल्याने चर्चांना आणखी बळ मिळालं आहे.

गुरुवारी सर्व राज्यांच्या नेत्यांची दिल्लीत काँग्रेसची तातडीची बैठक

विशेष म्हणजे, सोमवारी झालेल्या भाजप-एनडीए विरोधी 'इंडिया' आघाडीच्या बैठकीत ममता बॅनर्जी काँग्रेस नेत्या सोनिया गांधी यांच्या अगदी बाजूच्या खुर्चीवर बसल्या होत्या. तर सोनियांच्या उजवीकडे काँग्रेसचे राष्ट्रीय अध्यक्ष मल्लिकार्जुन खर्गे आणि लोकसभेतील विरोधी पक्षनेते राहुल गांधी बसले होते.

एकेकाळी विरोधी आघाडीच्या बैठकांमध्ये राहुल गांधी, सोनिया गांधी, मल्लिकार्जुन खर्गे यांच्यासोबत नितीश कुमार, ममता बॅनर्जी, अरविंद केजरीवाल, एम. के. स्टॅलिन आणि सीताराम येचुरी हे प्रमुख चेहरे असायचे. पण नंतरच्या काळात या पक्षांची राजकीय ताकद कमी झाली आणि काँग्रेससोबतच्या मतभेदांमुळे विरोधी आघाडीतील राजकीय समीकरणंही बरीच बदलली आहेत.

काँग्रेस मोठ्या निर्णयाच्या तयारीत?

ममता बॅनर्जी यांची राहुल आणि सोनिया गांधी यांच्याशी जवळीक वाढली आहे. निवडणुकीतील पराभवानंतर आणि सोनारपूरमध्ये अभिषेक बॅनर्जींवर झालेल्या हल्ल्यानंतर राहुल गांधींनी ममता आणि अभिषेक यांच्याशी स्वतंत्रपणे चर्चा केली होती. पण खरं पाहिलं तर, 'इंडिया' आघाडी पूर्वीपेक्षा खूपच कमकुवत झाली आहे. याचं कारण म्हणजे, भाजपविरोधी आघाडीतील अनेक पक्ष वेगवेगळ्या राज्यांमध्ये पराभूत झाले आहेत आणि काही पक्षांनी तर आघाडीतून बाहेर पडण्याचा निर्णय घेतला आहे.

सध्याच्या प्रादेशिक राजकारणामुळे काँग्रेस आणि मित्रपक्षांमधील मतभेदही वाढत आहेत. उदाहरणार्थ, आम आदमी पार्टीने (AAP) स्वतःला दूर केलं आहे. ते सोमवारच्या बैठकीलाही हजर नव्हते. दुसरीकडे, सीपीएम (CPI(M)) आणि डीएमके (DMK) सोबतही काँग्रेसचे संबंध ताणले गेले आहेत. केरळचे माजी मुख्यमंत्री आणि सीपीएम नेते पिनराई विजयन यांच्या घरी ईडीने केलेल्या कारवाईनंतर केरळमधील सीपीएम राज्य समिती काँग्रेसवर प्रचंड नाराज आहे. त्यांनी काँग्रेसच्या अनेक धोरणांना विरोधही केला आहे.

तर दुसरीकडे, तामिळनाडू विधानसभा निवडणुकीत मोठा पराभव झाल्यानंतर काँग्रेसने डीएमकेची (DMK) साथ सोडली आहे. त्यांनी थेट टीव्हीके (TVK) सोबत युती केली आहे. सध्या तामिळनाडूमध्ये टीव्हीके सरकारमध्ये काँग्रेस एक महत्त्वाचा भागीदार आहे. त्यामुळे, निवडणुकीनंतर डीएमके आणि काँग्रेसचे संबंध बिघडले आहेत. अशा परिस्थितीत, एक मजबूत विरोधी चेहरा म्हणून ममता बॅनर्जी यांची स्वीकारार्हता वाढली आहे. मग याच कारणामुळे काँग्रेस काही मोठा निर्णय घेण्याच्या तयारीत आहे का?