Blinkit Delivery Boy: एलएलबी करणाऱ्या विद्यार्थ्याने ब्लिंकिटमध्ये केली डिलिव्हरी, पहिल्या दिवशी किती कमाई झाली?
सार
एलएलबीचे शिक्षण घेणाऱ्या कवल देसाई या विद्यार्थ्याने आपला खर्च भागवण्यासाठी ब्लिंकिटमध्ये पार्ट-टाइम डिलिव्हरी बॉय म्हणून काम सुरू केले. त्याने आपल्या इलेक्ट्रिक स्कूटरवरून ६ तासांत ५०८ रुपयांची कमाई केली. त्याचा हा अनुभव सोशल मीडियावर व्हायरल झाला असून, नेटकऱ्यांनी त्याच्या या निर्णयाचे खूप कौतुक केले आहे.
सध्या सोशल मीडियावर एका कॉलेज विद्यार्थ्याची जोरदार चर्चा सुरू आहे. कवल देसाई नावाचा हा तरुण एलएलबीचे शिक्षण घेत आहे. स्वतःचा खर्च स्वतःच भागवता यावा, यासाठी त्याने ब्लिंकिट (Blinkit) मध्ये डिलिव्हरी पार्टनर म्हणून काम करायला सुरुवात केली. पहिल्याच दिवशी त्याने आपल्या स्कूटरवरून सहा तास काम केले आणि ५०८ रुपये कमावले. यामध्ये टार्गेट पूर्ण केल्याबद्दल मिळालेला बोनस आणि इन्सेंटिव्हचाही समावेश आहे.
कवलने आपला हा अनुभव सोशल मीडियावर शेअर केला आहे. त्याला फिरण्याची आवड आहे, त्यामुळे ब्लिंकिटसोबत काम करताना फिरता-फिरता पैसेही कमावता येतात, असे तो म्हणाला. "मी हे काम पार्ट-टाइम करत आहे. एलएलबी पूर्ण करून वकील बनणे हेच माझे मुख्य ध्येय आहे. पण सध्याचा माझा खर्च भागवण्यासाठी मी हे काम निवडले आहे," असे कवलने स्पष्ट केले.
आपल्या साडेसहा तासांच्या शिफ्टमध्ये त्याने तब्बल १९ ऑर्डर्स पोहोचवल्या. यासाठी त्याने जवळपास ५१ किलोमीटरचा प्रवास केला (यात परतीचा प्रवास मोजलेला नाही).
कवलने आपल्या पोस्टमध्ये लिहिले की, "पहिला दिवस खूप छान गेला. साधारण साडेसहा तासांत मी १९ ऑर्डर्स डिलिव्हर केल्या. यासाठी ५१ किलोमीटर गाडी चालवली. एकूण ५०८ रुपये कमावले (यात ७५ रुपये इन्सेंटिव्ह आणि टार्गेट पूर्ण केल्याचा १०० रुपये बोनस आहे)."
This is a part time gig I am doing for some obvious reasons. I’m pursing LLB as my primary profession. Along side working to support some obvious expenses incurred.
Day 1 ended on a good note.
Ended up delivering 19 orders in ~ 6:30 hours.
Did around ~51 kms just for the order delivery (return kms not counted).
Earned : ₹508 (₹75 incentive included) and ₹100 as bonus for achieving target.
Cost - ₹0 (I own Ather EV and charging costed me ₹0 home charging still 0)
Had to end the gig due to commitment to studies and at the same time battery was about to die.
@letsblinkit @deepigoyal @albinder You guys really made Blinkit a boon for people like me. It’s just so efficient to work with it and it’s smooth too.
— Kaval Desai (@thecurious_12) October 13, 2026
"अभ्यासाला वेळ द्यायचा होता आणि स्कूटरची बॅटरीही संपत आली होती, त्यामुळे मला काम थांबवावे लागले," असे कवलने सांगितले. त्याच्यासारख्या विद्यार्थ्यांसाठी अशी कामे खूप फायद्याची ठरतात, असेही तो म्हणाला. विशेष म्हणजे, त्याच्याकडे स्वतःची इलेक्ट्रिक स्कूटर (Ather EV) आहे आणि ती तो घरीच चार्ज करतो. त्यामुळे पेट्रोलचा किंवा इतर कोणताही खर्च त्याला आला नाही. म्हणजेच, त्याने कमावलेले ५०८ रुपये हा त्याचा निव्वळ नफा होता.
सोशल मीडियावर नेटकऱ्यांच्या प्रतिक्रिया
कवलची ही पोस्ट व्हायरल झाल्यानंतर नेटकऱ्यांनी त्याच्यावर कौतुकाचा वर्षाव केला. 'गिग इकॉनॉमी' (Gig Economy) मधील नोकऱ्यांवर पूर्णपणे अवलंबून राहण्यापेक्षा, त्यांचा असा पार्ट-टाइम वापर करणे हाच योग्य मार्ग असल्याचे अनेकांनी म्हटले आहे.
एका युजरने कमेंट करत लिहिले की, "भावा, गाडी जपून चालव आणि तुला पुढील वाटचालीसाठी शुभेच्छा." तर दुसऱ्याने सल्ला दिला की, "तुझे काम थोडे रिस्की आहे, त्यामुळे गाडीचा आणि स्वतःचा इन्शुरन्स नक्की काढून ठेव."
तिसऱ्या एका युजरने लिहिले, "भारताला अशाच बदलाची गरज आहे. शिक्षण घेताना विद्यार्थ्यांनी अशी पार्ट-टाइम कामे केली पाहिजेत. यातून त्यांना बाहेरच्या जगाचा अनुभव मिळतो आणि थोडे पैसेही मिळतात."
आणखी एकाने म्हटले की, "अशा नोकऱ्यांचा मूळ उद्देशच हा आहे. हे एक पार्ट-टाइम काम आहे. पण दुर्दैवाने भारतात लोक याला फुल-टाइम जॉब समजतात."