Diya Krishna: 'सगळंच फुकट मिळतं असं मी म्हणाले नव्हते, सोनं आम्ही स्वकष्टानं घेतो'; दिया कृष्णाचं स्पष्टीकरण

कपडे कोलॅबोरेशनमधून मिळतात, या दिया कृष्णाच्या खुलाशानंतर अनेकांनी तिला सोनंही फुकट मिळतं का, असा सवाल केला होता. यावर आता दियाने सडेतोड उत्तर दिलं आहे.

इन्फ्लुएन्सर, उद्योजिका आणि अभिनेता कृष्णकुमारची मुलगी दिया कृष्णा हिने नुकतंच कपड्यांबद्दल केलेलं एक वक्तव्य खूप चर्चेत आलं होतं. इव्हेंटसाठी आपण जे कपडे घालतो, ते बहुतांश वेळा कोलॅबोरेशनमधून मिळालेले असतात, असं दिया म्हणाली होती. यासाठी कोणतेही पैसे द्यावे लागत नाहीत आणि अनेकदा ते कपडे डिझायनर्सना परत केले जातात, असंही तिने सांगितलं होतं. यानंतर दियाच्या कुटुंबातील सदस्यांच्या व्हिडिओवर 'तुम्हाला सगळंच फुकट मिळतं का?' अशा कमेंट्स येऊ लागल्या. अगदी सोनं खरेदी करण्याच्या व्हिडिओवरही लोकांनी 'हे फुकट आहे का?' असे प्रश्न विचारले. आता या सगळ्यावर दियाने स्पष्टीकरण दिलं आहे. सोनं कोणीही फुकट देत नाही, ते घरचे लोक स्वतःच्या कष्टाच्या पैशातून गुंतवणुकीसाठी खरेदी करतात, असं दियाने तिच्या इन्स्टाग्राम स्टोरीमध्ये स्पष्ट केलं आहे.

"मी जेव्हा एक क्यू अँड ए (Q&A) सेशन घेतलं होतं, तेव्हा आमचे कपडे आणि इतर गोष्टी कोलॅबोरेशनच्या असतात असं मी म्हणाले होते. पण 'सगळं' म्हणजे 'बहुतांश गोष्टी' असा माझा अर्थ होता. हंसिका आणि ईशानी सोनं खरेदी करत असल्याच्या व्हिडिओवर अनेक जण 'हे फुकट आहे का?' असं विचारत असल्याचं मी पाहिलं. सोनं फुकट मिळायला आपण काय अंबानींच्या कुटुंबातले नाही आहोत. सोनं असं कुणीही फुकट देत नाही. आमच्या घरातले लोक स्वतःच्या पैशातून गुंतवणुकीसाठी सोनं खरेदी करतात. ते कोणीही आम्हाला फुकट दिलेलं नाही. तुमची एखाद्या दुकानाशी कितीही वर्षांची ओळख असली, तरी ते तुम्हाला सोनं फुकट देणार नाहीत. मला या गोष्टीवर स्पष्टीकरण द्यायचं होतं. काहींना हे माहीत असतं, तरीही ते मुद्दाम डिवचण्यासाठी अशा कमेंट्स करतात. आपण अशा लोकांकडे दुर्लक्ष करूया," असं दिया म्हणाली.