Bahubali रॉकेटने घेतली यशस्वी झेप, ISRO ने अमेरिकन उपग्रह अवकाशात केला प्रक्षेपित!

ISRO Bahubali Rocket Successfully Launches : भारतीय अंतराळ संशोधन संस्था ISRO ने LVM3 M6 रॉकेटचे यशस्वी प्रक्षेपण केले. 'बाहुबली' म्हणून ओळखल्या जाणाऱ्या या रॉकेटने अमेरिकन कंपनी AST SpaceMobile च्या ब्लू-बर्ड ब्लॉक 2 उपग्रहाला कक्षेत पोहोचवले.

ISRO Bahubali Rocket Successfully Launches : ISRO ने LVM3 M6 चे प्रक्षेपण केले. श्रीहरिकोटा येथील सतीश धवन अंतराळ केंद्रातून सकाळी 8.55 वाजता हे प्रक्षेपण झाले. हे LVM3 चे तिसरे व्यावसायिक प्रक्षेपण मिशन आहे. 'बाहुबली' म्हणून ओळखले जाणारे भारताचे सर्वात शक्तिशाली रॉकेट, या मोहिमेद्वारे अमेरिकन कंपनी AST SpaceMobile च्या ब्लू-बर्ड ब्लॉक 2 उपग्रहाला अवकाशात पोहोचवत आहे. उपग्रहाचे वजन 6100 किलो आहे. AST SpaceMobile ही उपग्रह-आधारित इंटरनेट सेवा पुरवणारी कंपनी आहे. थेट मोबाईल फोनवर सॅटेलाइट इंटरनेट उपलब्ध करून देण्याची त्यांची योजना आहे. दोन महिन्यांतील हे LVM3 चे दुसरे प्रक्षेपण आहे. इतक्या कमी वेळेत LVM3 मिशन होण्याची ही पहिलीच वेळ आहे.

सुमारे 15 मिनिटांच्या प्रवासानंतर, ब्लू-बर्ड ब्लॉक-2 हे अंतराळयान वेगळे होऊन सुमारे 520 किलोमीटर उंचीवर कक्षेत पोहोचेल, असे इस्रोने सांगितले. इस्रोची व्यावसायिक शाखा न्यूस्पेस इंडिया लिमिटेड (NSIL) आणि यूएस-आधारित AST SpaceMobile (AST & Science, LLC) यांच्यात झालेल्या व्यावसायिक कराराचा भाग म्हणून ही मोहीम होती.

टक्कर टाळण्यासाठी प्रक्षेपण 90 सेकंद उशिरा

ISRO ने प्रक्षेपण 90 सेकंद उशिरा केले. आधी सकाळी 8:54 वाजता प्रक्षेपण करण्याचे ठरले होते, परंतु नंतर वेळ 8 वाजून 55 मिनिटे 30 सेकंदांवर बदलण्यात आली. बाहुबली रॉकेटच्या मार्गात मोडतोड किंवा इतर उपग्रहांशी टक्कर होण्याची शक्यता असल्याचे इस्रोने सांगितले होते. श्रीहरिकोटावरील अवकाशातून हजारो उपग्रह जात असल्याने, वेळ बदलणे ही एक सामान्य प्रक्रिया असल्याचेही इस्रोने स्पष्ट केले.