Delhi Bomb Blast : देशाची राजधानी 28 वर्षांत 18 वेळा हादरली बॉम्बस्फोटांनी, वाचा टाईमलाईन

Delhi Bomb Blast : दिल्लीत लाल किल्ल्याजवळ झालेल्या कार बॉम्बस्फोटात ८ जणांचा मृत्यू झाला असून २४ जण जखमी झाले आहेत. १९९७ पासून आतापर्यंत शहरात झालेल्या अनेक बॉम्बस्फोटांच्या मालिकेतील ही नवी घटना आहे. 

Delhi Bomb Blast Timeline : दिल्लीतील लाल किल्ल्याजवळ एका कारमध्ये झालेल्या स्फोटाने गेल्या २ दशकांतील दिल्लीतील स्फोटांच्या आठवणी पुन्हा ताज्या केल्या आहेत. सोमवारी आय२० कारमध्ये झालेल्या स्फोटात आतापर्यंत ८ जणांचा मृत्यू झाला आहे, तर २४ जण जखमी आहेत. जखमींमध्ये सर्वाधिक १४ जण दिल्लीचे आणि ४ जण यूपीचे आहेत. जाणून घेऊया गेल्या २८ वर्षांत दिल्ली बॉम्बस्फोटांनी कधी-कधी हादरली.

१९९७ नंतर लाल किल्ल्यावर तिसरा स्फोट

• ९ जानेवारी, १९९७: आयटीओ येथील दिल्ली पोलीस मुख्यालयासमोर झालेल्या बॉम्बस्फोटात ५० जण जखमी झाले.
• १ ऑक्टोबर, १९९७: सदर बाजार परिसरात एका मिरवणुकीजवळ झालेल्या दोन बॉम्बस्फोटांत ३० जण जखमी झाले.
• १० ऑक्टोबर, १९९७: शांतिवन, कौडिया पूल आणि किंग्सवे कॅम्प परिसरात झालेल्या तीन बॉम्बस्फोटांत एका व्यक्तीचा मृत्यू आणि १६ जण जखमी झाले.
• १८ ऑक्टोबर, १९९७: राणी बाग बाजारात झालेल्या दुहेरी बॉम्बस्फोटात एका व्यक्तीचा मृत्यू आणि २३ जण जखमी झाले.
• २६ ऑक्टोबर, १९९७: करोल बागच्या गॅफिटी मार्केटमध्ये झालेल्या दुहेरी बॉम्बस्फोटात एका व्यक्तीचा मृत्यू आणि ३४ जण जखमी झाले.
• ३० नोव्हेंबर, १९९७: लाल किल्ला परिसरात झालेल्या दुहेरी स्फोटांत तीन जण ठार आणि ७० जखमी झाले.
• ३० डिसेंबर, १९९७: पंजाबी बागजवळ बसमध्ये झालेल्या बॉम्बस्फोटात चार प्रवाशांचा मृत्यू आणि सुमारे ३० जण जखमी झाले.
• २६ जुलै, १९९८: काश्मिरी गेट येथील आंतरराज्यीय बस टर्मिनलवर (आयएसबीटी) उभ्या असलेल्या बसमध्ये उच्च तीव्रतेच्या स्फोटात दोन जण ठार आणि तीन जखमी झाले.
• १८ जून, २०००: दिल्लीत लाल किल्ल्याजवळ झालेल्या दोन शक्तिशाली बॉम्बस्फोटांत एका ८ वर्षांच्या मुलीसह दोन जणांचा मृत्यू झाला आणि सुमारे एक डझनहून अधिक जण जखमी झाले.
• १३ डिसेंबर, २००१: दिल्लीतील संसद भवनावर दहशतवादी हल्ला. सुरक्षा दलांसह ९ जण ठार झाले.
• २२ मे, २००५: दिल्लीतील दोन चित्रपटगृहांमध्ये झालेल्या साखळी स्फोटांमध्ये एका व्यक्तीचा मृत्यू आणि ६० जण जखमी झाले.
• २९ ऑक्टोबर, २००५: सरोजिनी नगर आणि पहाडगंज मार्केटमध्ये झालेले तीन स्फोट आणि दिल्लीच्या गोविंदपुरी भागातील बसमध्ये झालेल्या स्फोटात ६० हून अधिक लोक ठार झाले आणि काही परदेशी नागरिकांसह १०० हून अधिक जखमी झाले.
• १४ एप्रिल, २००६: जुन्या दिल्लीतील जामा मशीद परिसरात झालेल्या दोन स्फोटांत किमान १४ जण जखमी झाले.
• १३ सप्टेंबर, २००८: दक्षिण दिल्लीतील कनॉट प्लेस, करोल बागचे गफ्फार मार्केट आणि ग्रेटर कैलाश-I च्या एम-ब्लॉक मार्केटमध्ये ४५ मिनिटांच्या आत झालेल्या ५ साखळी स्फोटांमध्ये किमान २५ जण ठार आणि १०० हून अधिक जखमी झाले.
• २७ सप्टेंबर, २००८: कुतुबमिनारजवळ मेहरौली फूल बाजारात झालेल्या कमी तीव्रतेच्या स्फोटात तीन जण ठार आणि २१ जखमी झाले.
• २५ मे, २०११: दिल्ली उच्च न्यायालयाबाहेर कार पार्किंगमध्ये किरकोळ स्फोट, कोणतीही जीवितहानी नाही.
• २९ जानेवारी, २०२१: इस्रायली दूतावासाजवळ किरकोळ स्फोट. कोणतेही गंभीर नुकसान नाही.
• १० नोव्हेंबर, २०२५: लाल किल्ल्याजवळ सुभाष नगर ट्रॅफिक सिग्नलजवळ एका कारमध्ये बॉम्बस्फोट. १० जणांचा मृत्यू आणि २४ जखमी.