फेंगल चक्रीवादळ: पुडुचेरी, तामिळनाडू; ४ मृत

फेंगल चक्रीवादळामुळे पुडुचेरी आणि तामिळनाडूमध्ये मुसळधार पाऊस आणि जनजीवन विस्कळीत. ४ जणांचा मृत्यू झाला असून, पुडुचेरीत ३ दशकांतील सर्वाधिक पाऊस झाला आहे. मदतकार्य सुरू आहे.

पुडुचेरी/चेन्नई: शनिवारी पुडुचेरीच्या किनाऱ्यावर धडकलेले ‘फेंगल’ चक्रीवादळ रविवारी कमकुवत झाले असले तरी मुसळधार पावसामुळे या छोट्या केंद्रशासित प्रदेशात आणि शेजारच्या तामिळनाडूमध्ये जनजीवन विस्कळीत झाले आहे आणि ४ जणांचा बळी घेतला आहे. ३ दशकांमध्ये पुडुचेरीत प्रथमच इतका पाऊस झाला आहे.

मोठ्या प्रमाणात पिकांचे नुकसान, मालमत्तेचे नुकसान झाल्याचे वृत्त आहे, सर्वेक्षणानंतर नेमकी आकडेवारी मिळेल. पूरग्रस्तांना स्थलांतरित करण्यासाठी आता सैन्यही मदत करत आहे.

पुडुचेरी विस्कळीत
रविवारच्या आकडेवारीनुसार रविवारी २४ तासांत पुडुचेरीत ४६ सें.मी. पाऊस झाला आहे. ३१ ऑक्टोबर २००४ रोजी पुडुचेरीत २१ सें.मी. पावसाची नोंद झाली होती. त्यानंतर इतक्या प्रमाणात पाऊस झाला नव्हता. पुडुचेरीत मोठे नुकसान झाले आहे. अनेक निवासी, व्यावसायिक परिसर पाण्याखाली गेले आहेत, मदत आणि बचाव कार्यात सैन्यही सहभागी झाले असून, २०० हून अधिक लोकांना वाचवण्यात आले आहे.

तामिळनाडूमध्येही अस्थिरता
चक्रीवादळाचा परिणाम शेजारच्या तामिळनाडू जिल्ह्यातील विल्लुपुरम जिल्ह्यातही मुसळधार पाऊस झाला असून, मैलाम भागात ५० सें.मी. पावसाची नोंद झाली आहे. चक्रीवादळामुळे शनिवारी बंद करण्यात आलेले चेन्नई विमानतळाचे कामकाज पुन्हा सुरू झाले असून, रविवारी सकाळपासून अनेक विमानांचे उड्डाण विलंबित आणि रद्द झाले आहेत, बंगळुरूकडे अनेक विमाने वळवण्यात आली होती. दुपारनंतर विमानसेवा पूर्वपदावर आली.

चक्रीवादळ कमकुवत झाले असले तरी पुढील २४ तासांत पुडुचेरी, तामिळनाडूच नव्हे तर आंध्रच्या तिरुपती, नेल्लोर आणि चित्तूरमध्येही मुसळधार पावसाचा इशारा हवामान खात्याने दिला आहे.

थोडक्यात टळला मोठा विमान अपघात
फेंगल चक्रीवादळाने त्रस्त असलेल्या तामिळनाडूच्या चेन्नईमध्ये शनिवारी थोडक्यात मोठा विमान अपघात टळला. मुंबईहून येणारे इंडिगो विमान चक्रीवादळाच्या प्रकोपाच्या दरम्यान धावपट्टीवर उतरण्याचा प्रयत्न केला. विमान जमिनीवर आदळण्याच्या वेळी वाऱ्यात अडकले आणि एका बाजूला झुकले. तातडीने धोका ओळखून वैमानिकांनी विमानाचे उतरणे रद्द केले आणि पुन्हा उड्डाण केले.

वैमानिकाच्या या साहसी आणि समयसूचकतेचे इंडिगोने कौतुक केले आहे. आमचे वैमानिक सर्व प्रकारच्या प्रतिकूल हवामानातही सुरक्षितता राखतात असे ते म्हणाले.