गीझर स्फोटात नववधूचा मृत्यू

दरवाजा न उघडल्याने कुटुंबियांना काळजी वाटू लागली. घाबरलेल्या कुटुंबियांनी बाथरूमचा दरवाजा तोडला. दामिनी बेशुद्धावस्थेत जमिनीवर पडलेली आढळली.

बरेली: आंघोळ करताना गीझरचा स्फोट होऊन नववधूचा मृत्यू झाला. उत्तर प्रदेशातील बुलंदशहरची २२ वर्षीय दामिनीचा दुर्दैवी मृत्यू झाला. २२ नोव्हेंबर रोजी तिचा विवाह झाला होता. विवाहानंतर पाच दिवसांनी बरेलीतील तिच्या पतीच्या घरी हा अपघात झाला. पोलिसांनी घटनास्थळी पोहोचून मृतदेह शवविच्छेदनासाठी पाठवला. शवविच्छेदन अहवाल आल्यानंतरच मृत्यूचे कारण कळेल, असे पोलिसांनी सांगितले.

बरेलीतील भोजीपुरा पोलीस ठाण्याच्या हद्दीतील पिपलसाना चौधरी गावातील दीपक यादव याने बुलंदशहरच्या काले का नगला गावातील सूरज पाल यांची मुलगी दामिनीशी २२ नोव्हेंबर रोजी विवाह केला होता. बुधवारी नेहमीप्रमाणे दामिनी आंघोळीसाठी बाथरूममध्ये गेली. मात्र बराच वेळ झाला तरी ती बाहेर आली नाही. पती दीपकने अनेकदा हाक मारली तरी दामिनीने प्रतिसाद दिला नाही किंवा बाथरूमचा दरवाजा उघडला नाही.

दरवाजा न उघडल्याने कुटुंबियांना काळजी वाटू लागली. घाबरलेल्या कुटुंबियांनी बाथरूमचा दरवाजा तोडला. दामिनी बेशुद्धावस्थेत जमिनीवर पडलेली आढळली. पाणी गरम करण्यासाठी वापरला जाणारा गीझर फुटला होता. कुटुंबियांनी तातडीने दामिनीला रुग्णालयात नेले, मात्र डॉक्टरांनी तिला मृत घोषित केले.