IVF Treatment India: 'भारताच्या आरोग्य व्यवस्थेने मला वेड लावलं', ब्रिटिश नागरिकाने केले कौतुक

लखनौमध्ये आयव्हीएफ उपचारासाठी आलेल्या एका ब्रिटिश नागरिकाने भारतातील आरोग्य व्यवस्थेचे तोंडभरून कौतुक केले आहे. ब्रिटनच्या तुलनेत भारतातील उपचार खूप वेगवान आणि परवडणारे असल्याचे त्याने म्हटले आहे.

भारतातील आरोग्य व्यवस्था ब्रिटनपेक्षा खूपच चांगली आणि परवडणारी असल्याचा दावा एका ब्रिटिश नागरिकाने केला आहे. डेव्ह फ्लू (Dave Flew) असे या व्यक्तीचे नाव आहे. डेव्ह आपल्या पत्नीसोबत आयव्हीएफ (IVF) उपचारासाठी लखनौमध्ये आला आहे. त्याने इन्स्टाग्रामवर "The Indian healthcare system blew my mind" या कॅप्शनसह एक व्हिडिओ शेअर केला आहे. या संपूर्ण प्रक्रियेतील अनुभवाने तो चांगलाच भारावून गेला आहे.

डेव्हने सांगितले की, तो इथल्या उपचारांवर खूप खूश आहे कारण इथली सगळीच कामं खूप वेगाने होतात. इथल्या सुविधा अप्रतिम असून इंटरनॅशनल लाउंजमधील कर्मचारी खूप मदत करणारे आहेत, असेही तो म्हणाला.

"भारतातील आरोग्य व्यवस्था ब्रिटनपेक्षा खूप चांगली आहे, आणि मी असं का म्हणतोय ते सांगतो! मी आणि माझी पत्नी लखनौच्या मॅक्स सुपर स्पेशालिटी हॉस्पिटलमध्ये (Max Speciality Hospital) आयव्हीएफ उपचार घेत आहोत. खरं सांगायचं तर, हा संपूर्ण अनुभव माझ्यासाठी डोळे उघडणारा ठरला आहे," असे डेव्हने व्हिडिओत म्हटले आहे.

दोन्ही देशांमधील फरक सांगताना डेव्ह म्हणाला की, ब्रिटनमध्ये एक्स-रे रिपोर्ट मिळायला चक्क एक महिना लागू शकतो. पण भारतात त्याला हाच रिपोर्ट अवघ्या एका तासात मिळाला.

"इथे वेळेचं खूप छान नियोजन आहे. मला एकाच इमारतीत वेगवेगळ्या टेस्ट करायला सांगितल्या. मी गेलो, टेस्ट केल्या आणि जास्तीत जास्त १५ मिनिटे ते एका तासात मला रिपोर्ट्स मिळाले. ब्रिटनमध्ये असं अजिबात होत नाही. तिथे फक्त एक्स-रे रिपोर्टसाठी तुम्हाला एक महिना किंवा त्याहून अधिक काळ वाट पाहावी लागते," असे तो म्हणाला.

"त्यामुळे अशा ठिकाणी येऊन इतक्या कमी खर्चात आणि इतक्या वेगाने उपचार मिळणं, यावर माझा अजूनही विश्वास बसत नाहीये!"

सोशल मीडियावर हा व्हिडिओ सध्या चांगलाच व्हायरल होत आहे. अनेक युजर्स डेव्हच्या या मताशी सहमती दर्शवत असून भारतीय आरोग्य व्यवस्थेचे कौतुक करत आहेत.