Bhopal Police: 'जय जोहार'च्या नाऱ्यावर भडकला भोपाळचा पोलीस, आदिवासी विद्यार्थ्यांना दिली शिवीगाळ; व्हिडिओ व्हायरल होताच निलंबन
सार
भोपाळमध्ये एका आंदोलनादरम्यान आदिवासी विद्यार्थ्यांना शिवीगाळ करणाऱ्या पोलीस निरीक्षकाला निलंबित करण्यात आलं आहे. या घटनेचा व्हिडिओ व्हायरल झाल्यानंतर विरोधी पक्ष आणि आदिवासी संघटनांनी तीव्र संताप व्यक्त केला होता.
भोपाळमध्ये एका आंदोलनादरम्यान आदिवासी विद्यार्थ्यांना शिवीगाळ करणाऱ्या आणि त्यांच्याबद्दल आक्षेपार्ह भाषा वापरणाऱ्या एका पोलीस निरीक्षकाला निलंबित करण्यात आलं आहे. या घटनेनंतर विरोधी पक्ष आणि आदिवासी संघटनांनी जोरदार संताप व्यक्त केला. मिसरोद पोलीस ठाण्याचे प्रभारी रतन सिंह परिहार असं या अधिकाऱ्याचं नाव असून, मंगळवारी घडलेल्या या प्रकारानंतर बुधवारी त्यांच्यावर निलंबनाची कारवाई झाली. भोपाळचे पोलीस आयुक्त संजय कुमार यांनी या प्रकरणाची विभागीय चौकशी करण्याचे आदेश दिले आहेत, अशी माहिती पीटीआय या वृत्तसंस्थेने दिली आहे.
"या प्रकरणातील तथ्यांची विभागीय चौकशी केली जाईल आणि त्यातून जे काही समोर येईल, त्यानुसार पुढील कारवाई केली जाईल," असं एका अधिकाऱ्याने सांगितलं.
गोंडवाना गणतंत्र पार्टीच्या युवा आघाडीने आदिवासी विद्यार्थ्यांच्या प्रश्नांवर हे आंदोलन पुकारलं होतं. याच आंदोलनादरम्यान हा सगळा वाद उफाळून आला. सोशल मीडियावर व्हायरल झालेल्या या व्हिडिओमध्ये आंदोलक 'जय जोहार'च्या घोषणा देताना दिसत आहेत. 'जय जोहार' हे आदिवासी समाजाचं पारंपरिक अभिवादन मानलं जातं.
(सूचना: या व्हिडिओमध्ये शिवीगाळ आणि आक्षेपार्ह भाषेचा वापर करण्यात आला आहे.)
‘जय जोहार’ का नारा भी अब पुलिस को चुभने लगा? आदिवासी युवाओं के हक़-अधिकारों की आवाज़ का अपमान करने वाले पुलिसकर्मी की वर्दी में इतनी गर्मी किस बात की है? भोपाल में आजबेहतर शिक्षा, होस्टल और छात्रवृत्ति की मांग को लेकर आदिवासी छात्र पहुंचे थे।
मुख्यमंत्री एवं गृहमंत्री @DrMohanYadav51 जी, इस कथित अपमानजनक टिप्पणी पर संज्ञान लेकर संबंधित पुलिसकर्मी को तत्काल निलंबित करें और जांच के बाद SC/ST एक्ट सहित लागू कानूनी प्रावधानों के तहत FIR दर्ज करें।
@DGP_MP वर्दी जनता की सेवा के लिए है, आदिवासियों के स्वाभिमान को कुचलने के लिए नहीं, कानून के रखवाले को भी कानून का जवाब देना होगा।
@CMMadhyaPradesh @JansamparkMP
— Sunil Astay (@SunilAstay) October 13, 2026
पण या व्हिडिओमध्ये पोलीस अधिकारी परिहार या घोषणांना विरोध करताना आणि आंदोलक विद्यार्थ्यांना शिवीगाळ करताना स्पष्ट दिसत आहेत. यानंतर त्यांच्यावर सर्व स्तरातून जोरदार टीका होत आहे.
हा व्हिडिओ व्हायरल झाल्यानंतर काँग्रेससह अनेक आदिवासी संघटनांनी या पोलीस अधिकाऱ्यावर कठोर कारवाई करण्याची मागणी केली.
मध्य प्रदेश विधानसभेचे विरोधी पक्षनेते उमंग सिंघार यांनी या घटनेचा तीव्र शब्दांत निषेध केला. संविधान आणि लोकशाहीच्या रक्षणासाठी आवाज उठवणाऱ्या आणि 'जोहार'चा नारा देणाऱ्या आदिवासी विद्यार्थ्यांना शिवीगाळ करणं अत्यंत गंभीर आणि अस्वीकार्य असल्याचं ते म्हणाले.
"‘जोहार’ ही कोणतीही शिवी नसून ती आमच्या आदिवासी संस्कृती, ओळख, स्वाभिमान आणि सन्मानाचं प्रतीक आहे! या अभिवादनातून प्रेम, आदर आणि बंधुभावाचा संदेश दिला जातो. आमच्या संस्कृतीचा आणि ओळखीचा अपमान कोणत्याही किंमतीत खपवून घेतला जाणार नाही," असा इशारा सिंघार यांनी दिला.
मुख्यमंत्री मोहन यादव यांच्यावर निशाणा साधत सिंघार पुढे म्हणाले की, पोलिसांच्या वर्दीचा वापर नागरिकांचा अपमान करण्यासाठी कधीही होऊ नये, तर त्यांच्या हक्कांचं रक्षण करण्यासाठी व्हायला हवा.
"कायद्याचं रक्षण करणाऱ्यांनी कायदा आणि संविधानाचा आदर करणं अपेक्षित आहे. जर कोणत्याही पोलीस अधिकाऱ्याने आपल्या पदाचा गैरवापर केला असेल, तर त्याला जबाबदार धरलंच पाहिजे," असंही ते म्हणाले.
यासह परिहार यांच्यावर एफआयआर (FIR) दाखल करून त्यांच्यावर कडक कारवाई करावी, अशी मागणीही सिंघार यांनी केली आहे.