आपला पराभव: भाजपचा मोठा निर्णय, SIT चौकशीची घोषणा

नवी दिल्ली: सत्तावीस वर्षांनंतर दिल्ली विधानसभा निवडणुकीत अभूतपूर्व विजय मिळवून आपला पराभव केल्यानंतर, भाजप आता आणखी एक धक्का देण्याच्या तयारीत आहे. निवडणूक प्रचारा दरम्यान आपवर भ्रष्टाचाराचे आरोप करणाऱ्या भाजपने नवीन सरकारच्या पहिल्या मंत्रिमंडळ बैठकीतच आप सरकारच्या भ्रष्टाचाराची चौकशी करण्यासाठी विशेष तपास पथक (SIT) स्थापन करण्याची घोषणा केली आहे.

भाजपचे प्रदेशाध्यक्ष विरेंद्र सचदेव म्हणाले की, भाजप भ्रष्टाचाराबाबत शून्य सहनशीलता बाळगतो आणि ज्यांनी घोटाळ्यात भाग घेतला आहे त्यांना जबाबदार धरले जाईल. सीएजी अहवाल पहिल्या मंत्रिमंडळात सादर करण्याचे पंतप्रधान नरेंद्र मोदी यांनी अनेक वेळा सांगितले आहे. त्यानुसार आम्ही पहिल्या मंत्रिमंडळ बैठकीतच तो अहवाल सादर करू. यासोबतच सर्व घोटाळ्यांच्या चौकशीसाठी एसआयटीची स्थापना करू, असेही ते म्हणाले.

आतिशींचा डान्स व्हिडिओ व्हायरल 
विधानसभा निवडणुकीत आम आदमी पक्षाचा पराभव झाला असला तरी निवृत्त मुख्यमंत्री आतिशी सिंह यांनी कालकाजी मतदारसंघातून विजय मिळवला आहे. त्यांच्या विजय साजरा दरम्यान त्यांनी केलेल्या नृत्यावर टीका होत आहे. याबाबत राज्यसभा खासदार स्वाती मालीवाल यांनी एक्सवर ट्विट करत ‘ही कसली लाजिरवाणी कृती आहे? पक्ष पराभूत झाला आहे, सर्व दिग्गज नेते पराभूत झाले आहेत, फक्त आतिशीच जल्लोष करत आहेत’ असा टोला लगावला आहे.

आपच्या पराभवाची कारणे काय?

• १० वर्षे सत्तेत असलेल्या आम आदमी पक्षाविरोधातील वाढलेली प्रशासनविरोधी लाट
• दारू घोटाळा, शीश महल प्रकरणांमुळे केजरीवालसारख्या प्रमुख नेत्यांच्या प्रतिमेला धक्का.
• मागील निवडणुकीत काँग्रेसचा अप्रत्यक्ष पाठिंबा मिळालेल्या आपला यावेळी एकटा लढा.
• आप सरकारने अनेक मोफत योजना दिल्या हे खरे. पण दिल्लीचा विकास करण्यात अपयशी ठरले.
• यावेळी भाजपने आपली रणनीती बदलली. हिंदुत्वापेक्षा स्थानिक समस्यांना प्राधान्य दिल्याने यश मिळाले.
• आंतरिक कलहामुळे अनेक नेत्यांनी पक्ष सोडल्याने आपल्या संघटनेला धक्का.
• वायू प्रदूषण, यमुना नदी प्रदूषण समस्या सोडवण्यात अपयश
• विकासापेक्षा केंद्र सरकारशी वारंवार संघर्ष करणे
• हरियाणा सरकारने यमुना नदीत विष टाकले असे आप नेत्यांचे अनावश्यक वक्तव्य