Congress : निवडणुकीपूर्वी काँग्रेस पक्षाला दिलासा, IT न्यायाधिकरणाने बँक खाती केली अनलॉक

Congress : काँग्रेस पक्षाशी संबंधित असलेली बँक खाती आयकर विभागाने (IT) गोठवली होती. पण यानंतर आयटी न्यायाधिकरणाकडून काँग्रेसला मोठा दिलासा मिळाला आहे. शुक्रवारी झालेल्या सुनावणीनंतर कर विभागाने खाती अनलॉक केली आहेत, अशी माहिती काँग्रेसचे नेते विवेक तन्खा यांनी दिली आहे.  

नेमके काय प्रकरण?

काँग्रेस पक्षाशी संबंधित असलेल्या बँक खात्यांमध्ये जवळपास 14 लाख रुपयांचे रोख व्यवहार आणि वर्ष 2018-19च्या कर परतावा प्रक्रियेमध्ये उशीर झाल्याने 14 फेब्रुवारी रोजी खाती गोठवण्याची कारवाई करण्यात आली. पक्षाचे ज्येष्ठ नेते अजय माकन यांनी शुक्रवारी (16 फेब्रुवारी) पत्रकार परिषद घेऊन याबाबतची माहिती दिली.

काँग्रेस नेते विवेक तन्खा यांनी काय सांगितले?

काँग्रेस नेते विवेक तन्खा यांनी X वर पोस्ट करत म्हटले की, कोर्टाने माझे संपूर्ण म्हणणे ऐकून घेतले. मी त्यांना सांगितले की, आमच्याकडे सर्व पुरावे आहेत, त्यामुळे आम्हाला अन्यायकारक पद्धतीने शिक्षा होऊ शकत नाही. मी न्यायालयात असेही सांगितले की आमच्यावर (काँग्रेस) 15 कोटी रुपयांचा कर कसा लावला जाऊ शकतो? आम्हाला यावर चर्चा करण्याची परवानगी हवी आहे. दरम्यान आता न्यायालयाकडून दिलासा मिळाल्यानंतर काँग्रेस पक्षाला बँक खाती वापरता येणार आहेत. या प्रकरणाची पुढील सुनावणी बुधवारी (21 फेब्रुवारी) होणार आहे.

अजय माकन यांनी दिलेली माहिती

काँग्रेसचे ज्येष्ठ नेते अजय माकन यांनी पत्रकार परिषदेमध्ये सांगितले की, "काही आठवड्यांपूर्वी पक्षाची बँक खाती गोठवली गेली होती आणि पक्षाकडे वीज बिल भरण्यासाठीही पैसे नाहीत. आमच्याकडून बँकांना पाठवण्यात येणाऱ्या धनादेशाची पूर्तता होत नसल्याची माहिती एक दिवस आधी मिळाली. अधिक चौकशी केली असता, युवक काँग्रेसची बँक खाती गोठवण्यात आल्याचे कळले. काँग्रेस पक्षाची खातीही जप्त करण्यात आली आहेत. आमच्या खात्यातील क्राउडफंडिंगचीही रक्कम गोठवली गेली".

आयकर विभागाने का केली कारवाई, काय आहे नेमके प्रकरण?

• काँग्रेस पक्षाकडे 2018-19 वर्षासाठीचे आयकर विभागाचे 135 कोटी रुपये थकीत आहेत. यापैकी 103 कोटी रुपये आयकर आणि 32 कोटी रुपये (अंदाजे) व्याज आहे. आयकर कायदा 1961अंतर्गत कलम 143(3) अंतर्गत मूल्यांकन 06/07/2021 रोजी पूर्ण झाले. कलम 13A अंतर्गत कोणतीही सूट देण्यात आलेली नाही. कलम 13A (D) च्या तरतुदींचे पालन न केल्यामुळे आणि रीटर्न न भरल्याने काँग्रेसला सूट मिळाली नाही. किती उत्पन्न मिळाले याची माहिती देण्यामध्येही उशीर केला गेला. 199 कोटी रुपयांच्या उत्पन्नावर मूल्यांकन केले गेले. यानुसार 105 कोटी रुपयांच्या कराची मागणी करण्यात आली होती.
• यानंतर एओ (AO) समोरील स्थगिती कार्यवाही प्रक्रियेमध्ये काँग्रेस पक्षाला आताच्या प्रक्रियेनुसार एकूण मागणीच्या 20% (म्हणजे अंदाजे 21 कोटी रुपये) देण्यास सांगण्यात आले. काँग्रेसने केवळ 78 लाख रुपये जमा केले. काँग्रेसला 20 टक्के थकबाकीची रक्कम जमा करता आली नाही. त्यामुळे उर्वरित 104 कोटी रुपये जमा करण्याचे पत्र जारी करण्यात आले. काँग्रेसने CIT(A) समोर दाखल केलेले निवेदन देखील फेटाळण्यात आले.
• काँग्रेसने मे 2023मध्ये ITAT समोर दुसरे निवेदन दाखल केले. दरम्यान मागणीवर स्थगिती मिळवण्यासाठी कोणतीही याचिका ITAT किंवा अन्य कोणत्याही न्यायिक प्राधिकरणासमोर दाखल करण्यात आलेली नाही. यानंतर ऑक्टोबर 2023मध्ये काँग्रेसने 1.72 कोटी रुपये जमा केले. काँग्रेसच्या वेगवेगळ्या बँक खात्यांमधून रक्कम काढून 115 कोटी रुपयांची वसुली करण्यात आली.
• शुक्रवारी (16 फेब्रुवारी ITAT समोर झालेल्या कार्यवाहीमध्ये आयकर विभागाने सांगितले की, खात्यांमधून रक्कम काढून घेतलेली वसुली हा नियमित होणारा वसुली उपाय आहे. खात्यांचे ऑपरेशन थांबवले गेले नाहीत. याशिवाय काँग्रेसकडे आणखी बरीच खाती आहेत. आता यापुढील सुनावणी 21 फेब्रुवारीला होणार आहे.

आणखी वाचा

Pradhan Mantri Fasal Bima Yojana : 8 वर्षात शेतकऱ्यांना 1.54 लाख कोटी रुपयांची दिली नुकसान भरपाई, योजनेची ही आहेत वैशिष्ट्ये

सुप्रीम कोर्टाकडून Electoral Bonds योजना रद्द, SBIला 3 आठवड्यांत द्यावा लागेल अहवाल

'आम्हाला मोदींची लोकप्रियता कमी करायचीय...', शेतकऱ्यांच्या आंदोलनामागील अजेंडा VIRAL VIDEOद्वारे उघड